სასწრაფოს ექიმების თქმით, მათ მაისიდან ხელფასის 25 პროცენტი ჩამოაჭრეს.
_120 ლარი ჩამოგვაჭრეს, ეს უსამართლობაა. სხვა პროფესიის ადამიანებს ხელფასებს უმატებენ. რა დააშავეს ექიმებმა? ვიყავით მეწარმე იურიდიული პირები. შემდეგ “მედალფას” გადაგვცეს. ჩვენი ამბულატორია 500 ლარს იღებდა ყოველთვიურად, რომელიც უნდა გადანაწილებულიყო ხელფასებზე, მედიკამენტებზე, საკანცელარიო ნივთებზე, გათბობასა და სხვა ხარჯებზე. ამ თანხიდან 20 პროცენტი საშემოსავლოში იქვითება, ამას კიდევ თუ 25 პროცენტს მოაკლებენ, რაღა რჩება, როგორ ვიმუშაოთ?…
ვმუშაობთ წვიმაში, ქარში, პასუხისმგებლობა კი ძალიან დიდია. 200 ლარად შეიძლება მუშაობა?
მათი განცხადებით, ხელშეკრულება ხელფასის დაკავებას არ ითვალისწინებს.
ექიმები აცხადებდნენ, რომ გამაფრთხილებელ გაფიცვას მოაწყობდნენ.
შპს “მედალფას” გენერალური დირექტორის კახი მუხიბულაშვილის განმარტებით, სადაზღვევო კომპანია “ალფამ” ვერ მიიღო ფული სახელმწიფოსაგან და შესაბამისად “მედალფას” კლინიკას ბოლო პერიოდში 35 ათასი ლარი დააკლდა. ეს მცირე თანხა არ არის და ამან გამოიწვია ხელფასების 25 პროცენტის ჩამოჭრა.
_”მედალფა” ჩართული იყო სახელმწიფო პროგრამაში და ჰქონდა ვალდებულება, პროგრამა დაეფინანსებინა 50 პროცენტით, ხოლო ამ თანხის მეორე ნახევარს იხდიდა სახელმწიფო. იგივე სიტუაცია იყო სასწრაფო სამედიცინო დახმარების სამსახურთან მიმართებაში. რამდენიმე თვის წინ “მედალფა” ამ პროგრამიდან (218 დადგენილება) გავიდა, რადგან “მედალფა” წაგებაზე იყო.
ჩვენ ვართ პროვაიდერი კომპანია. სახელმწიფომ აღარ ჩაურიცხა თანხის 25 % “ალფას” და ჩვენც იძულებითი ნაბიჯი გადავდგით. ჩვენ ამ თანხას ექიმებს არ ვართმევთ, როგორც კი გადმოგვირიცხავენ, ავანაზღაურებთ. ვფიქრობთ, ეს აგვისტოს ბოლოს მოხდება… _ განაცხადა კახი მუხიბულაშვილმა.
დეპუტატ ზვიად კვაჭანტირაძის აზრით, პრობლემა არსებობს სახელმწიფოს, სადაზღვევო კომპანია “ალფას” და “მედალფას” შორის. ეს თემა შესასწავლია, რაზედაც იგი, შაბათს, პოლიტსაბჭოს სხდომაზე საქართველოს პრემიერ მინისტრ ბიძინა ივანიშვილთან აპირებს საკითხის დაყენებას. ის დემოკრატიული ჩართულობის ცენტრში შეკრებილ ექიმებს ჯანდაცვის მინისტრ სერგეენკოსთან და პარლამენტის დარგობრივი კომისიის თავმჯდომარესთან შეხვედრასაც შეპირდა.
