ესენია: თელავის, მცხეთის (ქსანი), გორის, ახალციხის, ქუთაისის, ამბროლაურის, ზუგდიდის და ოზურგეთის (მერია) ნაგავსაყრელები.
8 პრიორიტეტული ნაგავსაყრელის კეთილმოწყობისა და ექსპლუატაციის სამუშაოებზე ეტაპობრივად ბიუჯეტიდან გამოყოფილი 5.190.181 ლარი დაიხარჯება.
კომპანიის მიერ წარმოდგენილი 6-თვის სამუშაო ანგარიშის თანახმად, რვა პრიორიტეტულ ნაგავსაყრელზე დაგეგმილი სამუშაოებისათვის საპროექტო-სახარჯთაღრიცხვო დოკუმენტაციის შედგენისა და ობიექტებზე საავტორო ზედამხედველობის საპროექტო მომსახურების შესყიდვის მიზნით გამოცხადდა კონკურსი და გამოვლინდა გამარჯვებული, რაზეც დახარჯულმა თანხამ 140.000 ლარი შეადგინა.
მყარი ნარჩენების კომპანიის დირექტორის გიორგი შუხოშვილის განცხადებით, მათმა კომპანია შეისწავლა დარჩენილ 46 ნაგავსაყრელზე არსებული მდგომარეობაც.
შუხოშვილის თქმით, პოლიგონებზე განხორციელდა და ახალაც მიმდინარეობს შემდეგი სახის აქტივობები: პოლიგონის ექსპლუატაციის პროექტის შემუშავება; ტოპოგეოდეზიური სამუშაოები ნაგავსაყრელების ტერიტორიის ტოპოგადაღება; საინჟინრო-გეოლოგიური კვლევა; ნაგავსაყრელებზე განთავსებული ნარჩენების გადაადგილება განსაზღვრულ უჯრედში, კომპაქტურად დატკეპვნა და საიზოლაციო მიწის ფენებით დაფარვა; ნაგავსაყრელების გარშემო არაორგანიზებულად დაყრილი ნარჩენების პოლიგონის ტანში შემოზვინვა; საკონტროლო-გამშვები ჯიხურების მშენებლობა; სანიაღვრე წყლების არინების სისტემების შექმნა; ნაპირსამაგრი სამუშოების ჩატარება; ნაგავსაყრელების შემოღობვა; სასწორების დამონტაჟება; სანკვანძის მოწყობა; სახანძრო ფარის მოწყობა.
კომპანიის ანგარიშში აღნიშნულია, აგრეთვე, რომ “ქუთაისის მყარი ნარჩენების ინტეგრირებული მართვის პროექტი” უკვე შემუშავებულია.
მყარი ნარჩენების მართვის კომპანიის დირექტორის გიორგი შუხოშვილის თქმით, პროექტის მიზანია, ქუთაისის არსებული ნაგავსაყრელის კონსერვაციის სტრატეგიის მომზადება, იმერეთის რეგიონის თანამედროვე სანიტარული ნაგავსაყრელის ტექნიკურ-ეკონომიკური შეფასება და ქვეყნის მასშტაბით საჭირო, ნაგავსაყრელების/გადამტვირთი სადგურების რაოდენობის განსაზღვრა.
შუხოშვილმა ასევე აღნიშნა, რომ ქუთაისის ძველი ნაგავსაყრელი საერთაშორისო სტანდარტების დაცვით უნდა დაიხუროს, ახალი პრობლემები რომ არ გამოიწვიოს.
შეგახსენებთ, რომ ორგანიზაცია ” მწვანე ალტერნატივას” წარმომადგენელმა ქუთაისში ხვიჩა ვაშაყმაძემ ჩვენთან საუბარში განაცხადა, რომ ნიკეას ნაგავსაყრელი ნელი მოქმედების ნაღმია და მისი დახურვა სასიცოცხლოდ მნიშვნელოვანია.
“ქუთაისის მყარი ნარჩენების ინტეგრირებული მართვის პროექტის” განხორციელება 2014 წელს დაიწყება და დასრულდება 2016-ში.
რეგიონული განვითარების და ინფრასტრუქტურის სამინისტრო დონორი ორგანიზაციების მხარდაჭერით კიდევ რამდენიმე პროექტს ახორციელებს. ესენია: “საქართველოს მთავრობის მხარდაჭერა მყარი ნარჩენების მართვაში” (2 ეტაპი); “ბორჯომში საყოფაცხოვრებო ნარჩენების სანიტარული ნაგავსაყრელის მოწყობის პროექტი”; “ქვემო ქართლის ნარჩენების მართვის პროექტი”; ჰოლანდიის მთავრობის გრანტი (ORIO), რომელიც მიმართულია ინფრასტრუქტურის განვითარებისათვის; (INOGATE) ევროკავშირის ტექნიკური თანამშრომლობის პროგრამა ენერგეტიკის სფეროში.
