“ხეები არ უნდა შეეწიროს ბიზნესს, თუ სხვა ინტერესს”

საქმე ისაა, რომ რეკრეაციულ ზონებს მერიის მიერ სტატუსი აქვს შეცვლილი და ინვესტორებზე ხეების ჭრის ნებართავაც მერიის მიერაა გაცემული. აღნიშნულ პრობლემაზე თბილისის საკრებულოს 9 აგვისტოს სხდომაზეც იმსჯელეს. ჩვენ დავინტერესდით, რა პოზიცია უჭირავს გარემოს დაცვის კომისიის თავმჯდომარეს, კახა ფირუაშვილს დედაქალაქში ხეების ჭრასთან დაკავშირებით და გეგმავს, თუ არა საკრებულო კონკრეტული ქმედითი ღონისძიებების გატარებას პრობლემის მოსაგვარებლად.

_ მერიის გადაწყვეტილებით, არამარტო კუს ტბის ტერიტორიას, არამედ თბილისში ძალიან ბევრ ლანდშაფტურ-სარეკრეაციო ზონას შეეცვალა სტატუსი და რეკრეაციული ზონა 3 მიენიჭა, რაც ამ ტერიტორიებზე მშენებლობის ნებას იძლევა. რატომ არ აქტიურობს თბილისის საკრებულო და არ ცდილობს, ძველ სტატუსი დაუბრუნოს იმ ადგილებს, რომლებიც ადრე რეკრეაციული ზონა იყო?

_ სტატუსის შეცვლის შესაძლებლობა ნამდვილად არსებობს, მაგრამ ეს მხოლოდ შესაძლებლობაა, რაც მოითხოვს მთელ რიგ სამართლებრივ პროცედურებს. რაც შეეხება ტერიტორიებს, იგი უკვე არის გასხვისებული. მყიდველი სამართლებრივად მართალია _ მან შეიძინა ის ტერიტორია, რომელიც ქალაქის თვითმმართველობამ გასაყიდად გამოიტანა და ამ შემთხვევაში მყიდველი ცალსახად ზარალდება. დიდი შანსია, მან ამ შემთხვევაში მიმართოს სასამართლოს.

_ არაფერს გააკეთებთ მომავალში მაინც რომ აღარ გასხვისდეს ასეთი ტერიტორიები?

_ ახალი ხელისუფლება 26 ივლისის შემდეგ მოვიდა საკრებულოში. ფაქტობრივად, ჯერ საქმეების გადაბარებით ვართ დაკავებული. თუმცა, გეტყვით, რომ სანამ მე ვიქნები გარემოს დაცვის კომისიის ხელმძღვანელი, ამგვარი ტერიტორიები აღარ გასხვისდება.

_ ახალი ხელისუფლება რომ მოვიდა საკრებულოში, იმიტომაც ითხოვს თქვენგან მოსახლეობა რეაგირებას მსგავს ფაქტებზე.

_ აქ არის სამართლებრივი პრობლემა, ვიდრე მხარდაჭერის. მე აბსოლუტურად ვიზიარებ იმ პოზიციას, რომ ქალაქში გარემოს დაცვა უნდა გაუმჯობესდეს. ხეები არ უნდა შეეწიროს ბიზნეს, თუ სხვა ინტერესს. მაგრამ იმავდროულად უნდა გავითვალისწინოთ ისიც, რომ მარტო ჰაერით და ხეებით სახელმწიფო ვერ იარსებებს. ისევე, როგორც მარტო რესტორნით ვერ იარსებებს ქალაქი, თუ ჰაერი არ იქნება. ამ შემთხვევაში ჩვენ საქმე გვაქვს კეთილსინდისიერ მყიდველთან. თუ აღმოჩნდება, რომ ტერიტორიის გასხვისება მოხდა უკანონოდ, ან კორუფციულ გარიგებას ჰქონდა ადგილი. ეს ცდება უკვე საკრებულოს კომპეტენციას და სხვა ორგანოების საქმეა.

_ უკანონო ქმედებებზე რეაგირება, გასაგებია, რომ გამოძიების საქმეა, მაგრამ საკრებულოს ხომ აქვს ფუნქცია, თბილისთან დაკავშირებით მიიღოს გადაწყვეტილებები და შეცვალოს, მაგალითად, სარეკრეაციო სტატუსის მინიჭების წესი, მომავალში დაცულები რომ ვიყოთ?

– თითოეული საკითხი, რომელიც შემოვა საკრებულოში, ზონის შეცვლასთან იქნება ეს დაკავშირებული, თუ კონკრეტული ტერიტორიის გასხვისება, იქნება ზედმიწევნით შესწავლილი. ჩვენ 26 ივლილის სხდომის შემდეგ უკვე შევაჩერეთ რამდენიმე ტერიტორიის გასხვისების პროცესი. მომავალშიც ასე გაგრძელდება. სანამ კარგად არ შევისწავლით, არც ერთ ტერიტორიას ისე არ გავყიდით.