სამინისტროს პრესსამსახურის მიერ გავრცელებულ განცხადებაში ნათქვამია, რომ არასამთავრობო ორგანიზაციის კვლევაში რამდენიმე უზუსტობა გაიპარა.
“არასამთავრობო ორგანიზაცია, “საერთაშორისო გამჭვირვალობა _ საქართველომ” იუსტიციის სამინისტროს შიგნით თანამშრომელთა გადანიშვნა, მათ გათავისუფლებად შეცდომით შეაფასა. კერძოდ, სამინისტროს მიერ ორგანიზაციისთვის მიწოდებული ინფორმაცია შეიცავდა დათქმებს და შენიშვნებს, თუ რით იყო განპირობებული ცალკეულ საკითხზე არსებული შესაბამისი სტატისტიკური მონაცემები. მაგალითად, სამსახურიდან გათავისუფლებულთა რაოდენობაში მითითებული იყო, რომ სახელმწიფო სერვისების განვითარების სააგენტოდან გათავისუფლებულთა რაოდენობა შეადგენდა 263-ს, რომელთაგან 253 თანამშრომელი სამსახურიდან დათხოვილი კი არ ყოფილა, არამედ მოხდა მათი სამინისტროს სისტემის სხვა დაწესებულებაში _ იუსტიციის სახლში გადანიშვნა (გადასვლა). როგორც ცნობილია, სსიპ იუსტიციის სახლს საკუთარი კადრები 2013 წლის 1 თებერვლამდე არ ჰყავდა და მას საჯარო რეესტრისა და სახელმწიფო სერვისების განვითარების სააგენტოს კადრები ემსახურებოდნენ. იგივე ეხება საჯარო რეესტრს, რომლიდანაც გათავისუფლებული კადრებიდან 200 თანამშრომელი გადაინიშნა იუსტიციის სახლში. იუსტიციის სახლში გადაინიშნა აგრეთვე ეროვნული არქივიდან გათავისუფლებული 10 პირი.
რეალურად, იუსტიციის სამინისტროდან მთლიანობაში არა 567, არამედ 99 თანამშრომელი გათავისუფლდა 3842-დან (20 ოქტომბრის მონაცემი; ამჟამად მუშაობს 4046) რაც კვლევის სერიოზულ ცდომილებაზე მიუთითებს.
ამასთან, არასამთავრობო ორგანიზაციის დასკვნაში იგნორირებულ იქნა ის ფაქტიც, რომ თანამდებობებზე დროებით მოვალეობის შემსრულებლებად დანიშვნა (489 მოსამსახურე) განხორციელდა არა სამინისტროს სისტემის გარედან მოყვანილი პირებიდან, არამედ სამინისტროს მმართველობის სფეროში მოქმედი სსიპ-ებიდან _ საჯარო რეესტრიდან და სახელმწიფო სერვისების განვითარების სააგენტოდან გადმოყვანილი იმ თანამშრომლებიდან, რომლებსაც მოქალაქეებთან ურთიერთობისთვის აუცილებელი უნარები გააჩნდათ და სსიპ იუსტიციის სახლში გადაინიშნენ (ძირითადად, ე.წ. “ფრონტ-ოფიცრები”). კონკურსების განახლება კი სექტემბრიდან იგეგმება, რათა ეს პროცესი კანონით დადგენილ ვადებში დასრულდეს.
ზემოაღნიშნული, და სხვა არაერთი უზუსტობიდან გამომდინარე, სინანულს გამოვთქვამთ, რომ ორგანიზაცია “საერთაშორისო გამჭვირვალობა – საქართველოს” მიერ არ იქნა იუსტიციის სამინისტროს მიერ ორგანიზაციისთვის მიწოდებული მონაცემების სრულყოფილი კვლევა განხორციელებული, არ იქნა მხედველობაში მიღებული იმ საკადრო ხასიათის ბრძანებები და სხვა დოკუმენტები, რომელიც ორგანიზაციას მიაწოდა სამინისტომ მისივე მოთხოვნით. მიწოდებულ ინფორმაციასთან დაკავშირებით კითხვები თუ გაჩნდა, გასაკვირია, რომ არასამთავრობო ორგანიზაციამ კვლევის გამოქვეყნებამდე იუსტიციის სამინისტროს განმარტებებისათვის არ მომართა.
გამომდინარე იქიდან, რომ სტატისტიკური მონაცემებისა და თანდართული დოკუმენტების არასრულყოფილმა ანალიზმა განაპირობა არარეალური სურათის წარმოჩენა საზოგადოებისათვის, იუსტიციის სამინისტრო შეფასებების გადახედვასა და დასკვნაში შესწორებებს მოითხოვს.
როგორც ცნობილია, “საერთაშორისო გამჭვირვალობა _ საქართველოს” მიერ 2013 წლის 12 აგვისტოს გაკეთდა შეფასებები საჯარო დაწესებულებებში 2012 წლის 20 ოქტომბრიდან 1 მარტამდე პერიოდში გატარებულ საკადრო პოლიტიკასთან დაკავშირებით.
არასამთავრობო ორგანიზაციის მიერ გამოქვეყნებულ ოფიციალურ დასკვნაში მითითებულია, რომ “იუსტიციის სამინისტროდან და მის სისტემაში არსებული დაწესებულებებიდან 567 თანამშრომელი გაათავისუფლეს… 250 თანამშრომელი გაათავისუფლეს საჯარო რეესტრის ეროვნული სააგენტოდან… 263 თანამშრომელი გათავისუფლდა სახელმწიფო სერვისების გავითარების სააგენტოდან…”
იუსტიციის სამინისტრო გამოთქვამს მზადყოფნას, კვლავაც აქტიურად ითანამშრომლოს სამინისტროს საქმიანობით დაინტერესებულ ყველა პირთან და კვლავაც დროულად და ამომწურავად მიაწოდოს ობიექტური ინფორმაცია არასამთავრობო სექტორის წარმომადგენლებს,” _ ნათქვამია განცხადებაში.
