გამაფრთხილებელი აქცია 11 ოქტომბერს გაიმართა. აქციის მონაწილეების განცხადებას, რომ ფინანსთა სამინისტროს წარმომადგენლები მათ მუშაობის საშუალებას არ აძლევენ, სპეციალურად აჩერებენ ხე-ტყით დატვირთულ ავტომანქანებს, გადაჰყავთ საჯარიმო სადგურებზე და დიდი რაოდენობით ჯარიმას აკისრებენ, ფინანსთა სამინისტრო განცხადებითვე გამოეხმაურა, რომელსაც უცვლელად გთავაზობთ.
“2013 წლის 11 ოქტომბერს, ჯვარი ხაიშის საავტომობილო მონაკვეთზე, საგამოძიებო სამსახურის სამეგრელო – ზემო სვანეთის რეგიონული სამმართველოს თანამშრომლებს, სამსახურებრივი მოვალეობის შესრულებისას გარკვეულმა პირებმა ხელი შეუშალეს და მათ ავტომანქანას არ მისცეს გადაადგილების შესაძლებლობა.
ამავდროულად, შეკრებილი ხალხი სხვადასხვა საშუალებით შეეცადა საგამოძიებო სამსახურის წარმომადგენლების პროვოცირებას.
წინააღმდეგობის მიუხედავად, დაპირისპირებისთვის თავის არიდების მიზნით, ჩვენი უწყების თანამშრომლები გამოერიდნენ კონფლიქტურ სიტუაციას. ინციდენტის დროს განსაკუთრებული აგრესიულობით გამოირჩეოდა რამდენიმე პირი, რომლებიც საგამოძიებო სამსახურის მიერ, ბოლო პერიოდში გამოვლენილნი არიან ხე-ტყის უკანონო ჭრაში და შემდგომში, შესაბამისი დოკუმენტის გარეშე უკანონო ტრანსპორტირებაში. ამ ეტაპზე, დადგენილია მათ მიერ სულ 61,8 კუბური მეტრი ხის მასალის უკანონო მოპოვება-ტრანსპორტირება.
საგამოძიებო სამსახური განმარტავს, რომ ინციდენტის ორგანიზატორების მიზანს წარმოადგენს საგამოძიებო სამსახურის დისკრედიტაცია და მისი მუშაობისთვის ხელის შეშლა, მიუხედავად ამისა, საგამოძიებო სამსახური გააგრძელებს სხვადასხვა სამართალდარღვევების გამოვლენას. მათ შორის, ხე-ტყის უკანონო ჭრასთან და ტრანსპორტირებასთან დაკავშირებულ სამართალდარღვევებთან ბრძოლას, რათა ხელი შეუშალოს საქართველოს ტყის ფონდის დაზიანებას,” _ ნათქვამია სამინისტროს განცხადებაში.
აქციის მონაწილეები კი აცხადებენ, რომ თუ ფინანსთა სამინისტრო მათზე ერთწლიან ლიცენზიებს არ გასცემს პერმამენტულ აქციებს დაიწყებენ.
გარდა ამისა, გზის გადაკეტვა უფრო მაშტაბული ხასიათის იქნება და თუ პირველ აქციაზე ჯვარი-მესტიის დამაკავშირებელი გზა მხოლოდ ფინანსთა სამინისტროს თანამშრომლებს გადაუკეტეს, შემდეგში აღარც ტურისტებს გაატარებენ და არც სხვა პირებს.
ხაიშში მოქმედი ხე-ტყის გადამამუშავებელი საამქროს მეპატრონეების განცხადებით, ისინი საკითხის გადაწყვეტას ახლა უკვე სატყეო დეპატამენტთან შეეცდებიან, რადგან ფინანსთა სამინისტროს წარმომადგენლები მათზე ფიზიკურ ზეწოლასაც არ ერიდებიან, რასაც უარყოფენ სამინისტროს თანამშრომლები და აცხადებენ, რომ ისინი კანონის სრული დაცვით მოქმედებენ.
