კონფერენცია საქართველოს იუსტიციის მინისტრმა გახსნა. თეა წულუკიანმა ქალთა უფლებების კუთხით კანონმდებლობაში შესატანი ცვლილებების მნიშვნელობაზე ისაუბრა და იმ საკითხსაც შეეხო, თუ რატომ გახდა საჭირო შრომის კოდექსის რეფორმის მეორე ეტაპის განხორციელება. ღონისძიების მონაწილეებს მიესალმა გაეროს პროგრამების ხელმძღვანელი სოფიო ქემხაძე.
შრომის კანონმდებლობის რეფორმის მეორე ეტაპი ახლებურად არეგულირებს ქალთა შრომით უფლებებს. ამ კუთხით, კანონპროექტი ყურადღებას ამახვილებს ისეთ საკითხებზე, როგორებიცაა: თანაბარი პირობების ფარგლებში თანაბარი ანაზღაურების უზრუნველყოფა; ქალთა წინააღმდეგ დისკრიმინაციის აღმოფხვრა; ცვლაში მუშაობისას განსაზღვრული სამუშაო დროს დარეგულირება; ზეგანაკვეთური სამუშაოს შესრულებისას თანხმობის სავალდებულოობა; ღამით მუშაობის შეზღუდვა ქალთა განსაკუთრებული კატეგორიისთვის; დამატებითი შესვენება მეძუძური ქალისთვის; შვებულება ორსულობის, მშობიარობისა და ბავშვის მოვლის გამო; შრომითი პირობების დაცვა და სხვ.
კანონპროექტის საბოლოო ვერსიის მომზადების პროცესში კონსულტაციები გაიმართება როგორც საერთაშორისო ორგანიზაციების, ისე ადგილობრივი არასამთავრობო ორგანიზაციების, დასაქმებულთა გაერთიანებებისა და ბიზნესსექტორის წარმომადგენლებთან. მათი მოსაზრებები, შეხედულებები და რეკომენდაციები მხედველობაში იქნება მიღებული. კანონპროექტის პირველი ვარიანტი გამოქვეყნდება “საქართველოს საკანონმდებლო მაცნეს” ვებგვერდზე, სადაც ცალკეულ მოქალაქეებს ექნებათ შესაძლებლობა გააკეთონ კომენტარები, რაც შემდგომში გათვალისწინებული იქნება კანონპროექტზე მუშაობისას.
ქალთა შრომითი უფლებების კუთხით კოდექსში შემავალი ცვლილებები რეფორმის მეორე ეტაპია. შრომის კოდექსის რეფორმის პირველი ტალღა 4 ივლისს დასრულდა, როდესაც იუსტიციის სამინისტროს ინიცირებული ცვლილებები ძალაში შევიდა. ახალმა შრომის კანონმა ახლებურად დაარეგულირა დამსაქმებლისა და დასაქმებულის ურთიერთობა და დააბალანსა მათი ინტერესები, განსაზღვრა სამსახურიდან დათხოვის, ზეგანაკვეთური შრომის ანაზღაურების, ვადიანი და უვადო შრომით ხელშეკრულებების დადების წესები, შეიტანა ახალი რეგულაციები ინდივიდუალურ და კოლექტიურ შრომით დავებთან დაკავშირებით. იუსტიციის მინისტრმა შრომის კოდექსის ამოქმედებისთანავე განაცხადა, რომ ცვლილებების მეორე ეტაპი, რომელზედაც სამინისტრო უახლოეს მომავალში დაიწყებდა მუშაობას, ქალთა შრომითი უფლებების დარეგულრებისაკენ იქნებოდა მიმართული. თეა წულუკიანის თქმით, “შრომის კანონმდებლობის ეს ცვლილება კიდევ ერთი ნაბიჯით გვაახლოებს დასავლურ საზოგადოებასთან, რომლის ნაწილიც ჩვენ საბოლოოდ უნდა გავხდეთ”.
