აღსანიშნავია, რომ განცხადებების უმეტესობა ერთნაირ ფურცლებზე და ერთი და იგივე ხელით არის ნაწერი. თუმცა, მარგველაშვილის საარჩევნო შტაბის ხელმძღვანელი, ირაკლი კუჭავა ამბობს, რომ ხელწერების იდენტურობის დასადგენად ექსპერტიზაა საჭირო:
_ ფარულად გადაღებული ამ ვიდეოს მიხედვით, რაც, ჩემი აზრით, კანონდარღვევა თუ არა, ეთიკის ნორმების დარღვევა მაინცაა, ძნელია იმის დადასტურება, რომ განცხადებები დაწერილია ერთი და იგივე პიროვნების მიერ _ ამას შესაბამისი ექსპერტიზა სჭირდება. რაც შეეხება ჩვენი კოორდინატორის მიერ განცხადებების უბანზე მიტანას, ამაზე კომენტარი უკვე გააკეთეს კომისიის წევრებმა და აღნიშნეს, რომ მას, როგორც სოფლის შვილს, როგორც მეზობელს, ისე გამოატანეს. აქვე მინდა აღვნიშნო, რომ პოლიტიკურად ტოლერანტული მსგავსი საარჩევნო გარემო არც ჩოხატაურს ახსოვს და არც საქართველოს, _ ამბობს კუჭავა.
საქართველოს დემოკრატიული კავშირის აღმასრულებელი დირექტორის, ლევან ხინთიბიძის თქმით, ეს საკითხი საოლქო კომისიაში უნდა გასაჩივრდეს; _ გადასატანი საარჩევნო ყუთის სიის შედგენის პროცესში, საქართველოს საარჩევნო კოდექსის 33-ე მუხლის მე-2 პუნქტი ამბობს, რომ კენჭისყრის დღეს, კენჭისყრის შენობაში მისვლის შეუძლებლობის შემთხვევაში, თავად ამომრჩეველი გადასატანი საარჩევნო ყუთის მეშვეობით ხმის მიცემის მოთხოვნით საუბნო საარჩევნო კომისიას მიმართავს კენჭისყრის დღემდე 2 დღის ადრე მაინც. ხოლო გადასატანი საარჩევნო ყუთის სია დგება მას შემდეგ, რაც საუბნო საარჩევნო კომისიის მდივანი სარეგისტრაციო ჟურნალში გაატარებს და ხელმოწერით დაადასტურებს ამომრჩევლის წერილობით განცხადებას ან სატელეფონო ზეპირ განცხადებას, სატელეფონო შეტყობინების ზუსტი დროისა და შესაბამისი ტელეფონის ნომრის მითითებით. ანუ ყველა სხვა შემთხვევა გადასატანი საარჩევნო ყუთის სიის ფორმირებისა არის კანონდარღვევა და ამ შემთხვევაში ეს საკითხი უნდა გასაჩივრდეს ზემდგომ ანუ საოლქო საარჩევნო კომისიაში. საოლქო საარჩევნო კომისიამ ბათილად უნდა სცნოს კანონის მოთხოვნის გვერდის ავლით შედგენილი გადასატანი საარჩევნო ყუთის სია და საუბნო საარჩევნო კომისიის შესაბამისი პასუხისმგებელ პირებს უნდა დაუწესოს დისციპლინური პასუხისმგებლობა თანახმად საქართველოს საარჩევნო კოდექსის 28-ე მუხლის მე-2 პუნქტისა, _ გვითხრა ხინთიბიძემ.
