“საქართველოს ხელისუფლებამ უნდა შეიმუშაოს, სისტემაში მოიყვანოს და აამოქმედოს მუდმივმოქმედი მანქანა, რომელიც საქართველოს აქცევს რეგიონში მოვლენების შემქმნელ და წამყვან ქვეყანად. ეს პროცესები უნდა დაიწყოს საქართველოს შიგნით სწორი ეთნიკური და რელიგიური პოლიტიკის გატარებით. იმედია, უახლოეს მომავალში შეიქმნება კონცეფცია, რომელიც საქართველოში ეთნიკური და რელიგიური უმცირესობების პოლიტიკას გაატარებს, რაც პირდაპირ არის დაკავშირებული უახლოეს მეზობელ ქვეყნებთან ურთიერთობების დარეგულირებაში. მას შემდეგ რაც საქართველო მოახერხებს და მოვლენების შემქმნელი იქნება რეგიონში, უფრო მიმზიდველი იქნება როგორც საერთაშორისო ქვეყნებისთვის, ასევე მეზობელი ქვეყნებისთვის. უფრო საინტერესო იქნება იგივე დასავლეთისთვის. კავკასიის ხალხთა კონფედერაციის ლიდერები ველოდებით ვიხილოთ კონცეფცია ეთნიკური და რელიგიური უმცირესობების შესახებ და ასევე ძალიან მნიშვნელოვანი რეგიონალური თანამშრომლობის შესახებ”.
ექსპერტის თქმით, როგორც კავკასიაში, ასევე მის ფარგლებს გარეთ 21 ქვეყანაში კავკასიური დიასპორები ელოდებიან თუ რა გეზს აიღებს ახალი მთავრობა რეგიონში მშვიდობისა და სტაბილურობისათვის.
ექსპერტმა ყურადღება გაამახვილა “ევრაზესის” კონცეფციაზე და აცხადებს, რომ “ევრო-აზიური ეკონომიკური კავშირის” რეალობის დანახვა შეუძლებელია, ასევე ვერ ხედავს იმ პირობებს, რომლითაც შეიძლება დაინტერესდეს საქართველო. მისი თქმით ეს ყველაფერი არის რუსეთსა და დასავლეთს შორის ვაჭრობის თემა.
“დასავლეთმა “ევრაზესის” ალტერნატივის შექმნაზე დაიწყო საუბარი. ეს არის ევროატლანტიკური თავისუფალი ეკონომიკური სივრცე, სადაც მოიაზრება ამერიკა და ევროპა ერთად. ნაადრევად მიგვაჩნია ჯერ საუბარი ინტეგრაციაზე, რადგან ვერც “ევრაზეს” დავინახეთ როგორც საერთაშორისო ჩამოყალიბებული სტრუქტურა და ვერ თავისუფალ ეკონომიურ სივრცეს ვხედავთ ამ ეტაპზე”.
ექსპერტი ვილნიუსის სამიტსაც შეეხო და აღნიშნა, რომ სწორედ სამიტის გადაწყვეტილებაზეა დამოკიდებული როგორ შეფასდება წლების მანძილზე საქართველოს მონაწილეობა საერთაშორისო მისიებში ტერორიზმთან ბრძოლის თვალსაზრისით. ასევე, როგორ შეფასდება ჩვენი მზაობა ვიყოთ ამ საერთაშიროსო სივრცის ნაწილი. ექსპერტის განცხადებით საქართველოს არ აქვს საემიგრაციო კანონები და სასწრაფოდ მისაღებია კანონი საზღვრის დაცვის შესახებ.
ექსპერტი აღნიშნავს, რომ უკრაინა ევროკავშირის ინტერესებს მიღმა დარჩა, რითაც რუსეთის მიზანი მიღწეულია, ამან კი შეასაძლოა გავლენა იქონიოს მომავალში რუსეთისა და საქართველოს დამოკიდებულებაზეც.
“მიუხედავად იმისა, რომ ამ თვალსაზრისით საქართველოს შემთხვევაში არანაირი საფრთხე არ არსებობს, მაინც მოუთმენლად ველოდებით ვილნიუსის სამიტზე მიღებულ გადაწყვეტილებას, თუ ჩვენ ვხდებით ევროკავშირის სივრცის ნაწილი, მაშინ უნდა ვისარგებლოთ გავრცელებული კანონმდებლობებით”.
ვილნიუსის სამიტზე განვითარებულ მოვლენებზე ამახვილებს აღნიშნულ საკითხში ექსპერტი მამუკა არეშიძეც ყურადღებას და აცხადებს, რომ თუ ვილნიუსის სამიტის შემდეგ საქართველო რუსეთთან მიმართებაში მარტო აღმოჩნდება, საკმაოდ მძიმე წელი გველოდება წინ.
“თუ უკრაინამ დათმო თავისი პოზიციები და ვილნიუსის სამიტის შემდეგ პირისპირ დავრცებით რუსეთთან, უაღრესად მძიმე წელი გვექნება. რუსეთი უკან არაფერზე დაიხევს. ჩვენზე უფრო წელგამართული ქვეყნები ვერ უძლებენ მის წნეხს და ჩვენ რარას გავუძლებთ. მიუხედავად აშს–ს უძლიერესი ზეწოლისა მსოფლიოს ბანკზე, ვერ მოხერხდა უკრაინისთვის ნორმალური პირობების შექმნა იმისთვის, რომ რუსეთს არ ჰქონოდა გაზის მეშვეობით უკრაინაზე ზეწოლის მექანიზმი. ჩვენ ზუსტად უნდა ვიცოდეთ რა გველის, თუ გადავდგამთ ნაბიჯს, რასაც ვილნიუსის სამიტზე ხელმოწერა ჰქვია”.
არეშიძის აზრი ემთხვევა კასრელიშვილის აზრს, როცა ორივე ექსპერტი ამბობს, რომ დღეს საქართველოსთვის რეალური საფრთხე არ არსებობს და რუსეთის აგრესიის შერბილება საქართველოსთან ურთიერთობების დათბობით შეიძლება აიხსნას.
“რუსეთმა საქართველოსგან მიიღო ყველაზე მეტი–ტერიტორიები, ამიტომ იმ ტიპის ზეწოლა, როგორიც არის უკრაინასა და სხვებზე, არ შეინიშნება, იქიდან გამომდინარე, რომ რუსეთი ცდილობს საქართველოსთან ურთიერთობის დათბობას, რეალური საფრთხე თითქოს არ არსებობს, მაგრამ როგორც კი უკრაინა დათმობს პოზიციას, რუსეთის დამოკიდებულება საქართველოს მიმართაც შეიცვლება. საჭიროა სერიოზული მხარდაჭერა დასავლეთიდან, ჩვენი მარტო დარჩენა რუსეთთან არ შეიძლება”, _ აცხადებს არეშიძე.
