რადგან დეკემბრის ბოლოს ყველა თანამშრომელს ხელშეკრულება უუქმდება. შესაბამისად, ა(ა)იპ-ის ხელმძღვანელების გადასაწყვეტია, ვის გაუგრძელებს ხელშეკრულებას და რომელი თანამშრომელი დატოვებს სამსახურს. ამის შესახებ “გურია ნიუსს” ოზურგეთს მუნიციპალიტეტის საკრებულოს თავმჯდომარემ, ავთანდილ სურგულაძემ უთხრა.
რა მოხდება ყველაზე დიდ ა(ა)იპ ოზურგეთის “სერვისცენტრში”, გაუშვებენ თუ არა თანამშრომლებს დეკემბერში უხელფასო შვებულებაში, ამის შესახებ ა(ა)იპ-ის ხელმძღვანელს, ვლადიმერ სალუქვაძეს ვესაუბრეთ.
_ ბატონო ვლადიმერ, ოზურგეთის მუნიციპალიტეტის საკრებულოს თავმჯდომარემ, ავთანდილ სურგულაძემ “გურია ნიუსთან” საუბარში განაცხადა, რომ პირველი იანვრიდან ა(ა)იპ-ებში შემცირებები გახორციელდება, რადგან ყველა თანამშრომლის ხელშეკრულების ვადა იწურება, რა მოხდება თქვენთან, როგორც ყველაზე დიდ ა(ა)იპ-ში? იგეგმება თუ არა შემცირებები “ოზურგეთის სერვისცენტრში”?
_ მიმდინარეობს ოპტიმიზაცია, მიდის აღნიშნული სიტუაციის შეფასება, ანაზღაურებული იქნება ყველა სახის სამუშაო, შესრულებული სამუშაოს შესაბამისად. თუ ოზურგეთელებს მიაჩნიათ, ა(ა)იპ-ში არის არაობიექტური მიდგომა, მე მინდა, ყველას გასაგონად ხმამაღლა ვთქვა, რომ ჩვენ ერთმანეთს მოვუსმენთ.
_ იქნებ, კონკრეტულად გვიპასუხოთ, იგეგმება თუ არა თქვენთან შემცირებები?
_ ჩვენ ამ საკითხს მივუბრუნდებით. ჯერჯერობით, ამასთან დაკავშირებით მიმდინარეობს კონსულტაციები, მიდის მსჯელობები, დამატებით კომენტარს აღნიშნულზე ვერ გავაკეთებ. დღეს ჩვენ ვმუშაობთ იმაზე, რომ სამსახურებმა მაქსიმალურად მიიღონ სამეურნეო მიმართულება და სამეურნეო დატვირთვა. ჩვენ ვიცით ეგ ყველაფერი, უბრალოდ, საბოლოო სტრატეგიის ჩამოყალიბებამდე გვესაჭიროება დრო.
_ ბატონო ვლადიმერ, ჩვენ გვაქვს ინფორმაცია, რომ წლის ბოლოს, ანუ დეკემბერში თქვენს თანამშრომლებს მოუწევთ მოსმენა, რომ ბიუჯეტში თანხა არ არის და ეს ერთი თვე უხელფასოდ უნდა შეასრულონ დაკისრებული სამუშაო. რამდენად შეესაბამება ეს ინფორმაცია სიმართლეს?
_ მე არ ვიცი, ვინ არის თქვენი ინფორმატორი და ვინ გაწვდით ასეთ ინფორმაციას, მაგრამ გეტყვით, რომ არსებობს შრომითი კონტრაქტები, შრომითი ვალდებულებები, სადაც განსაზღვრულია სამუშაოს ვადები და ანგარიშსწორების პირობები. მე იურიდიულად სრული უფლება გამაჩნია, რომ თუ საქმე მოითხოვს, შრომითი კონტრაქტის ვადის გასვლის მოახლოებისას, ორი კვირით ადრე, გავაფრთხილო ჩემი თანამშრომლები და ვუთხრა მათ, აი, ახლა მე ვწყვეტ შრომით ურთიერთობას. ეს არის ნორმალური და მიღებული პრაქტიკა ყველგან და ნუ იქნება ეს ნონსენსი.
_ ანუ, ფაქტობრივად, ამ ინფორმაციას ადასტურებთ.
_ გამორიცხული არ არის.
_ რა არის იმის მიზეზი?
_ “პურის მცხობელმა” უნდა მიიღოს თანხა შესრულებული სამუშაოს შესაბამისად,
_ უკმაყოფილო ხართ თანამშრომლების მიერ შესრულებული სამუშაოთი? აქამდე თქვენი თანამშრომლები დაკისრებულ მოვალეობას არ ასრულებდნენ პირნათლად და ხელფასს ტყუილად უხდიდით?
_ ჩვენ ოპტიმიზაციის სტრატეგიას ვამუშავებთ და ამ მიმართულებით ვმოქმედებთ.
_ რამდენი ათასი ლარი იყო ბიუჯეტიდან გამოყოფილი სერვისცენტრის ერთ-ერთი განყოფილების _ “გამწვანების” სამსახურისთვის, ოზურგეთის მუნიციპალიტეტში ყვავილების შესაძენად და რამდენი დაიხარჯა რეალურად?
_ გამოყოფილი იყო 56 000 ლარი. შევიძინეთ 5 000 ლარამდე ღირებულების ყვავილები. ამის შესახებ თქვენ შეგიძლიათ ინფორმაცია ოფიციალურად მოგვთხოვოთ და ჩვენც გიპასუხებთ.
_ გვაქვს ინფორმაცია, რომ ეს 56 000 ლარი რეალურად არ გახარჯულა, თუმცა, გაწერილია, რომ ეს თანხა ლარი მოხმარდა ყვავილების შეძენას. თქვენც აღნიშნავთ, რომ დაიხარჯა მხოლოდ 5 000 ლარამდე, მაშინ სად წავიდა დანარჩენი 51 000 ლარი?
_ დანარჩენი თანხა, ასე ვთქვათ, თავად “გამწვანების” განყოფილების “სამფლობელოშია”. თვითონ ეს განყოფილება არეგულირებს ამას. თითოეულ განყოფილებას აქვს თავისი ბიუჯეტი, რასაც განკარგავს თვითონ. მე არ ვერევი მათ საქმეში, უბრალოდ, კონსულტაციებს გავდივარ. დანარჩენი თანხა, გარკვეულწილად, მიდის სახელფასო ანაზღაურებაზე, ასევე, სამეურნეო ხარჯებზე. ჩვენ მზად ვართ შემოვიდეს ჩვენს სამსახურში აუდიტის სამსახური და შეამოწმოს აღნიშნული თანხების მოძრაობა.
