“სამწუხაროდ, ბრაკონიერული წესით ხეების განადგურება დღესაც გრძელდება საქართველოში. აღმაშფოთებელი ფაქტი მოხდა მარტვილის რაიონში. ზედამხედველობის სამსახურის თანამშრომლებს, რომლებმაც მიაკვლიეს უკანონო სახერხს, სადაც მზადდებოდა მრგვალი მორი და არა შეშა, შეურაცხყოფა მიაყენეს, დაუმტვრიეს ავტოსატრანსპორტო საშუალება და სტაციონარშიც კი გახდა ამ მუშაკების გადაყვანა საჭირო. აღძრულია სისხლის სამართლის საქმე. ჩვენ ვებრძვით კრიმინალს, ეს არის ძალიან დიდი მაფიოზური ქსელი, რომელმაც მოიცვა მთელი საქართველო. არავინ გადასახადს არ იხდის, არის უზარმაზარი შავი ბრუნვა ბიზნესის ამ სეგმენტში და ეს ყველაფერი გლეხის ზურგს ამოფარებით ხდება. სწორედ ამიტომ აიკრძალება ეს შავი ბიზნესი ხე-ტყის გადამუშავების სექტორში. მოსვლის დღიდან წინა მთავრობის მიერ გაცემული შვიდი ლიცენზია შევამოწმეთ ამ სფეროში და ყველგან არის სისხლის სამართლის საქმე აღძრული. ყველგან არის კანონი უხეშად დარღვეული”.
ცაგარეიშვილი ამბობს, რომ თუ დროზე არ მოხდა რეაგირება, ჩვენ დავდგებით ეკოლოგიური კატასტროფის წინაშე. დაიწყება გაუდაბნოება და ამ ადგილებში ადამიანები ვეღარ იცხოვრებენ. სწორედ ამიტომ მთავრობის პირველივე სხდომაზე განიხილება კანონქვემდებარე ნორმატიულ აქტში ცვლილებების შეტანა, რომელიც მთელი ამ წლების მანძილზე არეგულირებდა სათბობი შეშის გამოყოფის საკითხებს.
“იკლებს ჩვენი ტყის სავარგულების ფართობი ანუ ტყის ფონდის მიწები. ეს არის სავალალო შედეგი თავაშვებული საქმიანობისა, რომელსაც ახორციელებდა უკანასკნელი ორი ათწლეულის მანძილზე სახელმწიფო. ხეების თავაშვებულმა ჭრებმა გამოიწვია ის, რომ ტყე იწევს მთისკენ. სწორედ ამიტომ უჭირს მოსახლეობას ტყის იმ სავარგებულებით სარგებლობა, საიდანაც შეიძლება შეშის გამოტანა. თუ არ ჩავთვლით დაცულ ტერიტორიებს, დანარჩენ ადგილზე ბარის ტყეები ფაქტობრივად გაჩანაგებულია და დარჩენილი ვართ მხოლოდ მთის ტყეების იმედად. ამ პრობლემის მოგვარება შესაძლებელია გათბობის ალტერნატიული წყაროების მოძიებით. აი, აქ გადამწყვეტი მნიშვნელობა აქვს სოფლების გაზიფიკაციის პროცესს და შემიძლია ვთქვა, რომ ამ მხრივ 2014 წელს ბევრი წინგადადგმული ნაბიჯი იქნება. მთავრობის პირველივე სხდომაზე ჩვენ შევიტანთ კანონქვემდებარე ნორმატიულ აქტში ცვლილებას, რომელიც მთელი ამ წლების მანძილზე არეგულირებდა სათბობი შეშის გამოყოფის საკითხებს და ვაპირებთ ყველა ოჯახს 7-7 კუბური მეტრი შეშა დაურიგდეს”.
უმრავლესობის წევრი ამბობს, რომ პრობლემა წარმოშვა იმინ, რომ ბილეთები ტყეკაფებზე გაიცემა არა ინდივიდუალურად, არამედ ბანკების მიერ, რაც იმას ნიშნავს, რომ შესაძლებელია ათვისებული იქნას 100 ტყეკაფი ერთის მაგივრად და შემდეგ მონოპოლისტურ ფასებში იქნას გადაყიდული. ცარაგეიშვილის განცხადებით ის ჯერ კიდევ აგვისტოს თვეში აფრთხილებდა გარემოს დაცვის სამინისტროს მოსალოდნელი პრობლემების შესახებ. მისივე თქმით, მთლიანად შეიცვლება სათბობი შეშის გაცემის წესი. დღეისათვის ჯარიმებზე მოქმედებს ძველი წესი, მაგრამ შეცვლილია ჯარიმები გაზრდის მიმართულებით, რომელსაც მესამე მოსმენით ეყრა კენჭი. ცაგარეიშვილი აცხადებს, რომ ეს პროცესი სწორი მიმართულებით წარიმართა.
მარტვილში მომხდარ ინციდენტს გამოეხმაურა გარემოს დაცვის სამინისტროც და განაცხადა:
“მორიგი პატრულირების შედეგად მარტვილის რაიონში გამოვლენილ იქნა ხე–ტყის უკანონო ტრანსპორტირების ფაქტი, რაზეც შედგა ადმინისტრაციული სამართალდარღვევის ოქმი. მიუხედავად იმისა, რომ სამართალდამრღვევმა აღიარა ჩადენილი დანაშაული, მისივე ინიციატივით შეიკრიბა 50–მდე ადამიანი, რომელთაც ფიზიკური აგრესია მიიტანეს ჩვენს თანამშრომლებზე, მოაქციეს ალყაში, დააზიანეს სამსახურეობრივი ავტომანქანა და მათ სხეულის სხვადასხვა დაზიანებები მიაყენეს. მოსახლეობას მოვუწოდებთ, უკანონობისგან თავი შეიკავონ, ვინაიდან მსგავსი ქმედებები იქნება აღკვეთილი და მკაცრად დასჯილი”.
