“სააკაშვილი თარსია, იქაც აურევს ყველაფერს და მისი უკრაინაში ჩასვლა არა მგონია კარგი იყოს. ისე კი სააკაშვილი თავისუფალი მოქალაქეა და შეუძლია ნებისმიერ ქვეყანაში ჩავიდეს”.
ფოფხაძემ აღნიშნა, რომ უკრაინის, როგორც საქართველოს ისტორიული არჩევანი არის ევროინტეგრაცია და ამ პროცესს ვერავინ შეუშლის ხელს.
“ევროპა არის უკრაინელი ხალხის ისტორიული არჩევანი და ამ პროცესს ვერავინ შეაჩერებს. უკრაინაში მიმდინარე პროცესები აუცილებლად ევროპაში გაწევრიანებით დასრულდება. თუ საქართველოშიც არიან ისეთი ადამიანები, რომლებიც აპირებენ ანალოგიურს, უნდა იცოდნენ, რომ მათი მცდელობა კრახით დამთავრდება, უკრაინის მაგალითმაც უნდა დაარწმუნოს ასეთი ადამიანები. ქართველი ერი მთლიანად კონსოლიდირებულია იმასთან დაკავშირებით, თუ სად უნდა ვიყოთ და რომელი გზით ვიაროთ.საქართველო არჩევანს არასოდეს შეიცვლის. რაც შეეხება რუსეთს, იმაზე მეტი რაღა უნდა გააკეთოს, რასაც ახლა აკეთებს, გვაქვს ოკუპირებული ტერიტორიები და ისევ გრძელდება მცოცავი ოკუპაცია”.
დეპუტატი შეეხო სამართლიანობის აღდგენის მოთხოვნით დაგეგმილ საპროტესტო აქციებს და განაცხადა, რომ სრული სამართლიანობის აღდგენისთვის “დროის მანქანა” უნდა გვქონდეს, ეს კი არარეალურია.
“საზოგადოებაში ყოველთვის იქნება უკმარისობის გრძნობა, ყოველთვის მოიძებნებიან ადამიანები, რომლებიც იტყვიან, რომ სამართლიანობა არ არის აღდგენილი. რაღაც დოზით მეც მაქვს უკმარისობის გრძნობა, მაგრამ არ უნდა დაგვავიწყდეს რა ჩიხიდან გამოვედით და როგორი ძნელია უცებ ყველაფრის დალაგება. ჩვენი მოთხოვნა იყო, შეწყვეტილიყო ტოტალური უსამართლობა და ამას მივაღწიეთ. მერე ეს პროცესი წარსულზე უნდა განხორციელებულიყო. ჩვენ ყველა ერთად ვცდილობდით სააკაშვილის მმართველობის პერიოდში არსებული უსამართლობის შეჩერებას, ტირანია დასრულდა, მაგრამ წარსულის ყველა უსამართლობას ვერ გამოვასწორებთ, მაშინ გამოვა ისე, რომ სამართლიანობის აღდგენის მოთხოვნით ჩვენ შეიძლება უნებურად დავანგრიოთ ყველაფერი, რასაც ასე დაუღალავი ბრძოლით მივაღწიეთ. სრული სამართლიანობა იქნებოდა ასეთი-დავბრუნდეთ წარსულში და შევაჩეროთ “ვარდების რევოლუცია”. ამისთვის დროის მანქანაა საჭირო, ასეთი რამ კი, არ გვაქვს”.
ფოფხაძემ ჟურნალისტებთან საუბრისას აღნიშნა, რომ ხარვეზების დამდგენი კომისიის შექმნა ვენეციის კომისიის მიერაც არ იყო მოწონებული და კონსტუტუციითაც დადგენილია, რომ სასამართლოს ალტერნატიული სტრუქტურის შექმნა კანონით არ შეიძლება.
“ხარვეზების დამდგენი კომისია ვენეციის კომისიის მიერაც არ იყო მოწონებული. ეს კომისია იყო ახალი გარემოებების დამდგენი კომისია, რომელიც იტყოდა, რომ ესა თუ ის საქმე გადასახედია და დაბრუნდებოდა სასამართლოში, სადაც იგივე მოსამართლეების ხელში აღმოჩნდებოდა, რომლებმაც ადრე არასწორად განიხილეს. ამ შტოის არსებობას რეალურად ვერ გავექცევით. ამ კომისიის შექმნას ნამდვილად აჯობებს ახლად აღმოჩენილი გარემოს დეფინაციის ცვლილება”.
ფოფხაძის განცხადებით საჭიროა მოსახლეობას მეტი ინფორმაცია და არგუმენტები მიეწოდოს ამ საკითხის შესახებ, მან აგრეთვე აღნიშნა, რომ კომისიის შექმნის გადადების მოტივაცია არ არის საკმარისი, რამაც გამოიწვია ხალხის უკმაყოფილება.
