“დაუშვებელია მათი შიმშილობა, ვინაიდან, შესაძლოა ეს შიმშილობა ფატალური შედეგებითაც დასრულდეს, მათი ჯანმრთელობის მდგომარეობიდან გამომდინარე. არ ვარ ინფიორმირებული ზუსტად რამდენი პატიმარი შიმშილობს, რადგან ადმინისტრაცია ინფორმაციას არ გასცემს, პატიმრები კი ყოველ წუთს რეკავენ და გვამცნობენ, რომ მოშიმშილე პატიმრებს შეუერთდნენ”.
პატიმრების საპროტესტო შიმშილობას და ხარვეზების დამდგენი კომისიის შექმნის დროებით შეჩერებას საპარლამენტო უმრავლესობის წევრი გიორგი ცაგარეიშვილი გამოეხმაურა. მისი განცხადებით, ამ კომისიის კანონპროექტზე ბევრი შენიშვნა ჰქონდა ვენეციის კომისიას. ცაგარეიშვილი აცხადებს, რომ კომისიის შექმნაზე მუშაობა არ შეწყვეტილა და დღესაც მიმდინარეობს.
“ვფიქრობ, რომ ეს შიმშილობა არ არის დაკავშირებული ხარვეზების დამდგენ კომისიასთან. ეს კომისია იმუშავებდა საკუთრების წართმევის ფაქტებზე, სამწუხაროდ და სამარცხვინოდ ასეთი განცხადებები საკმაოდ ბევრია და “ნაციონალური მოძრაობის” წევრები, რომლებიც ყელყელაობენ ახალი თანამდებობებით, სწორედ ადამიანების ფიზიკური განადგურებით, მათი წეწვა-გლეჯვით საკუთრების “ახევით” იყვნენ დაკავებულები. ამიტომ, ხაზს ვუსვამ ცინიზმს, რასაც ჰქვია მათ მიერ თანამდებობების დაკავება. ეს კომისია არ გაუქმებულა, ვადასტურებ, რომ მუშაობა ხარვეზების დამდგენი კომისიის შექმნასთან დაკავშირებით ახლაც მიმდინარეობს. უბრალოდ საჭიროა ბევრ ნიუანსთან დაკავშირებით ჩამოყალიბება და შეთანხმება. იუსტიციის მინისტრმა გულახდილად ისაუბრა ამ თემაზე და მიიღო ბევრი საყვედური. რა გვერჩივნა, ის რაც ხდებოდა ქვეყანაში წლების წინ და ხალხს ყველაფერს ლამაზ ფერებში გვიხტავდნენ, თუ ის რეალობა, რაც არსებობს. უკეთესია მთავრობამ ხალხს ყველაფერი ღიად და დაუფარავად უთხრას. ნებისმიერი საქმის ვერდიქტი მაინც სასამართლოს გამოსატანია, ხარვეზების დამდგენი კომისია ვერდიქტს ვერ გამოიტანდა ვერც ერთ საქმეზე. ეს იცის ყველამ, ვინც ამ სფეროში მოღვაწეობს”.
პარლამენტარის განცხადებით, არის გარკვეული ხარვეზები და ამ მიმართულებით მთავრობა გააგრძელებს მუშაობას. ცაგარეიშვილის თქმით, თუ კომისია ვერ შეიქმნება, ერთადერთი გამოსავალი პროკურატურის გაძლიერებული მუშაობაა.
“თუ ეს კომისია ვერ შეიქმნება, ერთადერთი გამოსავალია პროკურატურამ გაარგძელოს გაათმაგებული მუშაობა. ყველას რატომღაც ეგონა, რომ კომისია მიიღებდა გადაწყვეტილებებს, მაგრამ ეს წარმოუდგენელია. კანონპროექტის საბოლოო ვარიანტი ვენეციის კომისიაზე გადავაგზავნეთ, იქიდან მოვიდა უამრავი შენიშვნა, რომელიც გავიზიარეთ”.
