“პუტინმა თავის ერთ-ერთ ინტერვიუში განაცხადა, რომ რუსეთის იმპერიაში არა ეთნიკური, არამედ გეოგრაფიული ნიშნით ერქვათ რეგიონებს, მაგალითად იყო ტიფლისის გუბერნია და არა საქართველო. ადგილობრივი თვითმმართველობის კანონი არის მიზანმიმართულად ჩადებული ნაღმი. ამით მთავრობა გააკეთებს იმას, რაც სურს პუტინს. ამ კანონპროექტის განხილვა უნდა ხდებოდეს არა მთავრობის შიგნით, არა ოპოზიციასთან, არამედ – ხალხთან. უნდა ჩატარდეს რეფერენდუმი და ხალხმა გადაწყვიტოს, თუ როგორ უნდა მოეწყოს თვითმმართველობები. საკმაოდ ნაჩქარევი კანონია. დავუშვათ შეიქმნა ოზურგეთის გუბერნია, შეიძლება თვითონ ოზურგეთი განვითარდეს, მაგრამ მასში შემავალი რომელიღაც სოფელი პირიქით, უფრო დასუსტდეს და გაღატაკდეს. აჭარა ამის ნათელი მაგალითია. ასლან აბაშიძეს ჰქონდა ჩაკეტილი, არ იმართებოდა თბილისიდან და არაფერი აბაშიძის დროს იქ არ გაკეთებულა გარდა იმისა, რომ გოგიტიძეები და აბაშიძეები გამდიდრდნენ. ამ პროექტითაც ფეოდალიზმი განვითარდება. გარდა ამისა, ნამდვილად გამოიწვევს დაყოფას,” _ აღნიშნავს ჟორდანია.
ამასთან იგი აცხადებს, რომ კანონის ნაჩქარევად განხილვა და მიღებაც მიზანმიმართულად არის გაკეთებული და სოფლის თუ რაიონის განვითარებასთან არანაირი კავშირი არ აქვს.
ვახტანგ ჟორდანია:
_ საკმაოდ ჩქარობენ. თუმცა, ეს სიჩქარე სულაც არ უკავშირდება სოფლის თუ რაიონის განვითარებას და ამას დრო გაჩვენებთ, მართალი რომ ვარ. ჩქარობენ იმიტომ, რომ ახლა მოდის თვითმმართველობის არჩევნები, მერის არჩევნები და უფრო ხელსაყრელი იქნება მათთვის სამართავად. სამმილიონიან ქვეყანას ნამდვილად არ სჭირდება დაყოფები.
_ რატომ არ შეუერთდით იმ 12 ოპოზიციურ პარტიას, რომლებიც კანონპროექტის განხილვაში იღებს მონაწილეობას პარლამენტარებთან ერთად?
_ ეს განაპირობა იმან, რომ არ ვიყავი პოლიტიკაში ასე აქტიურად ჩართული. ახლა დროა “სოციალ-დემოკრატიულმა“ პარტიამ თავისი სიტყვა თქვას. ისე კი თანამშრომლობაზე და ჯანსაღ ურთიერთობებზე უარს არ ვიტყვით, ოღონდ ძალიან არ მომწონს, როცა ძალები ერთმანეთის ფეხის გადაბრუნებას ელოდებიან.
_ თვითმმართველი ქალაქების რიცხვი შემცირდა.
_ საერთოდ რა საჭიროა ამდენი თვითმმართველი ქალაქი, რა საჭიროა კიდევ ახალი ბიუროკრატიული მექანიზმები შევქმნათ ქვეყანაში. არც ფინანსური ფუფუნება აქვს ამისი საქართველოს და ის ფული, რაც ამაში უნდა დაიხარჯოს, უმჯობესი იქნება რეგიონის განვითარებას მოახმარონ.
_ გუბერნატორების ინსტიტუტი დარჩა. გუბერნატორს ნიშნავს პრემიერი, ამაზე საპარლამენტო ოპოზიცია აცხადებს, რომ მათი სურვილი და მიზანი იყო გუბერნატორებიც აერჩია ხალხს. როგორ ფიქრობთ, გუბერნატორი არჩევით უნდა იყოს თუ დანიშვნით?
_ ამ საკითხის ირგვლივაც იყო აზრთა სხვადასხვაობა – უნდა დარჩენილიყო თუ გაუქმებულიყო გუბერნატორის ინსტიტუტი, ჩვენი აზრით უნდა დარჩეს, რადგან რეგიონში ერთი კაცი მაინც იქნება, რომელიც მთავრობამდე რაღაც საკითხებს მიიტანს და პირიქით. თუ ჩვენ ავირჩიეთ ხელისუფლება, ჩვენ ვენდობით მათ, ამიტომ, გუბერნატორს თუ პრემიერი დანიშნავს, ამაში ცუდს ვერაფერს ვხედავ, არჩევითი რომ იყოს და მერე წინააღმდეგობაში მოვიდეს პრემიერთან, ეს საკმაოდ დიდ გართულებებს გამოიწვევს თვითონ რეგიონისთვის.
_ როგორ ფიქრობთ, მოესწრება ახალი საარჩევნო კანონი?
_ არ მოესწრება და ჩაატარებენ სააკაშვილისეული კანონით, ძველი კანონით არ ჩაატარეს საპრეზიდენტო არჩევნები? ეს მთავრობა, სანამ ოპოზიციაში იყო, ხომ ითხოვდა საარჩევნო რეფორმას? ახლა კი სათავისოდ მოირგეს ყველაფერი.
_ თქვენი პარტია თუ მიიღებს არჩევნებში მონაწილეობას?
_ მიუხედავად იმისა, რომ ჩვენ ვმუშაობთ ენთუზიაზმით და პარტიას არ აქვს ფული, არჩევნებში მონაწილეობას აუცილებლად მივიღებთ, ფული არ წყვეტს ყველაფერს, ჩვენ შევძლებთ ქვეყანაში ალტერნატიული ძალა გამოჩნდეს.
_ მინდა წინა ინტერვიუში ნათქვამი თქვენივე ფრაზა შეგახსენოთ – პოლიტიკას აკეთებს ფული. როგორ ფიქრობთ, ამ ეტაპზე შეძლებთ მხოლოდ ენთუზიაზმით იმოქმედოთ?
_ მართალია, პოლიტიკას აკეთებს ფული, მაგრმ პოლიტიკაში ფული მოდის თუ ნაბიჯებს გადადგამ. თუ ენთუზიაზმი არ გაგაჩნია, წარმატებას ვერ მიაღწევ. სხვათაშორის მინდა გითხრათ, რომ მხარდამჭერები უკვე გამოჩნდნენ არა მარტო საქართველოში, არამედ უცხოეთშიც. გადახალისდება პარტია და პოლიტიკურ ასპარეზზე გამოვჩნდებით, არ არის გამორიცხული, რომ მერის კანდიდატურაც დააყენოს სოციალ-დემოკრატიულმა პარტიამ.
_ როგორ ფიქრობთ, თბილისის მერი აუცილებლად უნდა იყოს თბილისელი?
_ კი, ნამდვილად.
“სოციალ-დემოკრატიული პარტიის” ლიდერი აცხადებს, რომ მხარს უჭერს უკრაინელი ხალხის არჩევანს და სოლიდარობას უცხადებს მათ.
