ეროვნული სატყეო პოლიტიკის დოკუმენტი განსაზღვრავს სახელმწიფოს დამოკიდებულებას ტყეების მიმართ – მათი ძირითადი ფუნქციური დანიშნულებისა და ფასეულობების გათვალისწინებით.
ეროვნული სატყეო პოლიტიკა ერთიანია საქართველოს ყველა ტყისთვის, მიუხედავად მათი საკუთრებისა და მართვის ფორმისა. იგი საფუძვლად დაედება სატყეო სექტორის კანონმდებლობის, ინსტიტუციური მოწყობისა და სხვა პოლიტიკური ინსტრუმენტების შემუშავებას და არსებულის დახვეწას.
სატყეო სფეროში არსებული პრობლემების გადაჭრისათვის, ასევე ქვეყნის მდგრადი განვითარებისთვის, სიღარიბის აღმოფხვრის ხელშეწყობისა და ადამიანების კეთილდღეობისათვის, ეროვნული სატყეო პილიტიკის მიზანს წარმოადგენს ტყის მდგრადი მართვის სისტემის ჩამოყალიბება, რომელიც უზრუნველყოფს: ქვეყანაში ტყეების რაოდენობრივი და ხარისხობრივი მაჩვენებლების გაუმჯობესებას, ბიოლოგიური მრავალფეროვნების დაცვას, ტყეების ეკოლოგიური ფასეულობების გათვალისწინებით მათი ეკონომიკური პოტენციალის ეფექტიან გამოყენებას, ტყის მართვის საკითხებში საზოგადოების მონაწილეობას და მიღებული სარგებლის სამართლიან გადანაწილებას.
მიზნის მისაღწევად საჭიროა საქართველოს ტყეების მართვა ხორციელდებოდეს ისეთი მეთოდებით, რომლებიც უზრუნველყოფენ ტყეების ეკოლოგიური სიჯანსაღის შენარჩუნებასა და სოციალურ-ეკონომიკური პოტენციალის გამოყენებას.
ზემოაღნიშნული პრინციპების დახვეწისა და განხორციელებისათვის გარემოსა და ბუნებრივი რესურსების დაცვის სამინისტრომ დაიწყო საქართველოს ეროვნულ სატყეო პროგრამაზე მუშაობის პროცესი, რომელიც თავის მხრივ მხარს დაუჭერს და დაეხმარება ეროვნული სატყეო პოლიტიკის გატარებასა და განხორციელებას ქვეყანაში.
