ამ მიზეზით გარემოს დაცვით დაინტერესებულმა მოქალაქეებმა არა ერთი აქცია გამართეს. ერთ-ერთი მათგანი იყო 28 დეკემბრის საპროტესტო შეკრება ვაკის პარკის შესასვლელში, მუსიკის თანხლებით.
“გურია ნიუსმა” აქციის მონაწილეები გამოკითხა. გთავაზობთ მათ კომენტარებს:
ერეკლე ურუშაძე, “ფონდი საერთაშორისო გამჭვრივალობა-საქართველო”: ეს ნაკვეთი მერიამ გაყიდა დიდი ხნის წინ. სასტუმროს მშენებლობა რეკრეაციული ზონისთვის დადგენილ ყველა კოეფიციენტს არღვევს. სასტუმრო არ აშენდებოდა, მერიას რომ არ დაეშვა გამონაკლისი სპეციალური ზონალური შეთანხმების სახით. ეს დაუშვა ორმა ადამიანმა, გიგი უგულავამ და დავით ნინიძემ. მათ გადაწყვიტეს მიმდინარე წლის ივლისში, რომ კომპანიის ინტერესები უფრო მნიშვნელოვანი იყო, ვიდრე ნებისმიერი ჩვენგანის ინტერესები. თუ გიგი უგულავა და დავით ნინიძე არ გამოვლენ და არ განმარტავენ, რატომ მიიღეს ეს გადაწყვეტილება, ჩვენ ყველანაირი უფლება გვაქვს ჩავთვალოთ, რომ მათ ეს ქრთამის გამო გააკეთეს. ჩვენ მოგვბეზრდა არაადეკვატური ადამიანები და არაადეკვატური პასუხები თბილისის მერიიდან. ყოველდღე გვექნება აქციები. ახალი წლის მერე მოვახდენთ თბილისის მერიის ბლოკირებას, პარალიზებას და ის არ იმუშავებს მანამდე, სანამ არ შეწყდება მშენებლობა. მათ ერთხელ და სამუდამოდ უნდა დაინახონ საზოგადოების ძალა.
ნატა ფერაძე, პარტიზანი მებაღე: დღეს საკრებულოში გაფართოებული სხდომა უნდა ყოფილიყო, მაგრამ მარტო გულიკო ზუმბაძე შეგვხდა. ანა გაბრიაძე იყო “უსაფრთხო სივრცის” წარმომადგენელი და კიდევ რამდენიმე არასამთავრობო ორგანიზაცია. გადაწყდა, რომ შეიქმნას კომისია,სადაც შევლენ დაინტერესებული პირები. 31 დეკემბერს 11 საათზე გვაქვს დანიშნული შეხვედრა, სადაც ინტენსიური რეჟიმით ვიწყებთ მუშაობას. თუმცა მანამდე ვაწესებთ მორიგეობას ვაკის პარკში, რომ ჩუმად არ მოჭრან ხეები დადაიწონ სასტუმროს მშენებლობა.
ზურაბ ბაქრაძე, ქალაქმგეგმარებელი: ჩვენ, ხალხი ვართ სუვერენი, ხელისუფლება კი არის ჩვენი ნების აღმსრულებელი. მოაწყონ ქალაქი ისე, როგორც ჩვენ გვინდა. სამართლებრივი დავის წინ წამოწევა მნიშვნელოვანია, მაგრამ აუცილებელია უფორ მეტი ხალხის მხარდაჭერა. უნდა გამოვიდეთ და ვანახოთ ჩვენი ძალა ხელისუფლებას და დავიცვათ ჩვენი გარემო.
ირაკლი ლომოური, მწერალი: ქალაქი არის ქვაბულში მოქცეული. ისედაც ჟანგბადი არ არის. რომ ჩეხავენ ვაკის პარკს, რა უფლებით ჩეხავენ! მე გადავწყვიტე, ყველა აქციაზე მივიდე და ასევე ყველას მოვუწოდებ, რომ არ შეიძლება სახლში ჯდომა. უნდა დავიცვათ ჩვენი და ჩვენი შვილების მომავალი!
ლაშა ჩხარტიშვილი, ეკოლოგი: “გრინფისის მხარდამჭერთა ჯგუფი” უერთდება დღევანდელ აქციას ვაკის პარკის გადარჩენის მოთხოვნით. ჩვენ მივიჩნევთ, რომ გამწვანებული ტერიტორიების დაცვა ერთ-ერთი უმწვავესი პრობლემაა თბილისში. არაერთი აქცია ჩამიტარებია როგორც ეკოლოგს თბილისის ბაღ-პარკების დასაცავად. ამისთვის ღირს ბრძოლა და თუნდაც თავისუფლების დაკარგვა. აქ ლაპარაკია არა მხოლოდ ესთეტიკურ მხარეზე, არამედ სიცოცხლის უფლებაზე და ჩვენ ამ უფლებას გვართმევენ. საკრებულოც პასიურობს. გარემოს დაცვის სამინისტროს კი არ შეუძლია, უზრუნველყოს მოქალაქეების კონსტიტუციური უფლება – იცხოვრონ ჯანსაღ გარემოში.
ლევან ლორთქიფანიძე, სტუდენტი: ვაპროტესტებ იმას, რომ დედაქალაქში უკანასკნელ გამწვანებულ ზონასაც ანადგურებენ. მე მინდა, რომ ქალაქის მერიაც და საკრებულოც ორიენტირებულების იყვნენ ქალაქის მწვანე სივრცეების გამრავლებაზე. ესენი პირიქით აკეთებენ. მე ამას დავუპირისპირდები და გავაპროტესტებ ნებისმიერ დროს.
ნიკოლოზ წიქარიძე, სტუდენტური მოძრაობა “მწვანე მუშტი”: კანონებს როგორც უნდათ, ისე ჭრიან და კერავენ. მთავარი აქ არის სამართლიანობის პრინციპი. სამართლიანობა კი მოითხოვს, რომ ჩვენ, ადამიანებს, გვაქვს უფლება, ვიცხოვროთ ჯანსაღ გარემოში. ესენი გვართმევენ ამ უფლებას. კანონებს, რომლებსაც ესენი იღებენ, არანაირი მნიშვნელობა არ აქვს. ჩვენ უნდა გავერთიანდეთ და მოვახდინოთ მერიის პიკეტირება უფრო აგრესიულად.
ანანაო ცინცაბაძე: მე მოვედი იმისთვის, რომ გარემოს დავუდგე გვერდით. თუ გაიჩეხა ყველაფერი, მთვარ სიკეთეს, ჟანგბადს, ისე დავკარგავთ, რომ ვერც გავიგებთ. კანონმდებლობა მერიას აძლევს ნებისმიერი გადაწყვეტილების მიღების უფლებას: გაასხვისოს ტერიტორიები, გაჩეხოს ხეები და ასე შემდეგ. ჩვენ ვითხოვთ, რომ შეჩერდეს მშენებლობა, გადაიხედოს გაცემული ნებართვა. თუ გადაიხედება ეს ნებართვა, მივხვდებით, რომ ის საჯარო ინტერესს ეწინააღმდეგება. კანონის მიხედვით კი საჯარო ინტერესს კერძოსთან შედარებით ენიჭება უპირატესობა.
თამარ ქადაგიძე: ეხლა რომ დადიან უმცირესობის წევრები და კივიან, რატომ მოუხსენით სტატუსი უგულავასო, ჩვენ გვაინტერესებს ციყვების ტერიტორიას რატომ მოუხსნა უგულავამ რეკრეაციული ზონის სტატუსი?
