“სამართლიანი არჩევნებისა და დემოკრატიის საერთაშორისო საზოგადოების” აღმასრულებელმა დირექტორმა ნინო ლომჯარიამ თვითმმართველობის კოდექსთან დაკავშირებით პრობლემურ საკითხებზე ისაუბრა და აღნიშნა, რომ რამდენიმე პრობლემატური საკითხი კოდექსში ისევ რჩება, რაზეც მთავრობის და საკანონმდებლო ორგანოს წარმომადგენლებმა ყურადღება უნდა გაამახვილონ.
“ადგილობრივი თვითმმართველობის ახალი კოდექსი არა მარტო პოლიტიკური, არამედ საზოგადოების ფართო წრის განხილვის და დებატების საგანი გახდა. ამ მიზეზით, ჩვენმა ორგანიზაციამ გადაწყვიტა ჩაეტარებინა კვლევა და უკეთ გაეცნო საზოგადოებისთვის ის საკითხები, რომელიც დისკუსიის საგანი გახდა. ჩვენ განსაკუთრებით ვეხებით კოდექსში არსებული მერებისა და გამგებლებისთვის უნდობლობის გამოცხადების საკითხს. ასევე, ხელისუფლებას აქვს ინიციატივა, რომ ადგილობრივი თვითმმართველობის ორგანოებში საჯარო მოხელეების რიცხვი შემცირდეს და ჩვენთვის გაუგებარია ეს რატომ ხდება. ამასთან, გვაქვს შეკითხვები ბიუჯეტთან დაკავშირებით. გარდა ამისა, გვინდა წინ წამოვწიოთ სათემო თვითმმართველობა, რაც კოდექსის საბოლოო ვარიანტში გათვალისწინებული არ არის. ჩვენი რეკომენდაციები ემყარება საერთაშორისო პრაქტიკას, იმ ქვეყნების გამოცდილებას თვითმმართველობების რეფორმების კუთხით, რომელთაც ეტაპობრივად მოახდინეს სოციალისტური და საბჭოთა სისტემის გარდაქმნა დემოკრატიული თვითმმართველობის ფორმად და რომელთა გამოცდილებაც ყველაზე ახლოსაა ჩვენ რეალობასთან. რეკომენდაციები, ასევე განიხილავს შემოთავაზებული ცვლილების შესაბამისობას „ადგილობრივი თვითმმართველობის ევროპულ ქარტიასთან,” _ აცხადებს ლომჯარია.
პრეზენტაციაზე გაიმართა დისკუსია თვითმმართველობის რეფორმისა და უახლოეს წლებში განსახორციელებელი ცვლილების შესახებ სამოქალაქო საზოგადოების, პოლიტიკური პარტიებისა და ხელისუფლების წარმომადგენლებს შორის. ასევე, თვითმმართველი ერთეულების ზრდასა და დაკომლექტებაზე, მათი აღმასრულებელი ორგანოს პირდაპირი წესით არჩევასა და უნდობლობის გამოცხადების საკითხებზე.
დისკუსიის ერთ-ერთი მთავარი საგანი აგრეთვე იყო თვითმმართველი ერთეულების ფინანსური დამოუკიდებლობა და ქონების განკარგვა. საუბარი შეეხო საშტატო ერთეულების შემცირებას, სამხარეო და საზოგადოებრივ თვითმმართველობას.
პრეზენტაციის შემდეგ სამოქალაქო საზოგადოების, პოლიტიკური პარტიებისა და ხელისუფლების წარმომადგენლებს შორის თვთმმართველობის რეფორმისა და უახლოეს წლებში განსახორციელებელი ცვლილებების შესახებ დისკუსია გაიმართა.
კვლევას რიგ საკითხებში მთავრობის წარმომადგენლები არ ეთანხმებიან და აცხადებენ, რომ თვითმმართველობის რეფორმა კოდექსის მიღებით არ მთავრდება და პრობლემატური საკითხების გადაწყვეტას დრო სჭირდება; დაპირებები, რომელიც მათ საზოგადოებას მისცეს, ეტაპობრივად შესრულდება.
