დაცულ ტერიტორიებს კიდევ ერთი, ჯავახეთის დაცული ტერიტორია ემატება, სადაც ადმინისტრაციული ცენტრის მშენებლობა უკვე მიმდინარეობს. სხვა დაცულ ტერიტორიებშიც სიახლეები იგეგმება, რომელთა დაკავშირებითაც სააგენტოს თავმჯდომარე რატი ჯაფარიძე "გურია ნიუსს" ესაუბრება.
_ ჯავახეთის დაცული ტერიტორიების შექმნით მოსახლეობას გარკვეულწილად შეეზღუდება ამ ადგილებით სარგებლობა. თუ გქონდათ მათთან კონსულტაციები, როგორ შეხვდნენ ამ ამბავს?
_თქვენ როგორ გგონიათ, ჩვენ რამე ნაბიჯს გადავდგამთ მოსახლეობასთან კონსულტაციის გარეშე? მოსახლეობა აქტიურად იყო ჩართული კონსულტაციებში. ჩვენი მიზანია, ადამიანებმა აღგვიქვან არა როგორც მტრები, არამედ – მათი მეზობლები. თუ ვზრუნავთ, ისევ და ისევ მათ სასარგებლოდ. რადგან როდესაც ტურისტი ჩადის დაცულ ტერიტორიაზე, მოსახლეობისგან ყიდულობს პროდუქტს, ქირაობს ბინას და ასე შემდეგ. ეს ყველაფერი კი მათ ჯიბეებზე აისახება. კერძო სექტორის ინიციატივით დაცულ ტერიტორიებთან შენდება სასტუმროები. ამის ძალიან კარგი მაგალითია მტირალა, სადაც ახლა გაიხსნა ახალი სასტუმრო. ანალოგიური მდგომარეობაა პრომეთეშიც.
იმედია, მალე ასეთი ტენდენცია გამოიკვეთება ჯავახეთშიც, სადაც ძალიან მნიშვნელოვანი პროექტი მიმდინარეობს, რომელიც მალე დასრულდება. ახალქალაქში ვაშენებთ ადმინისტრაციულ შენობას. ძველი რკინიგზის პირდაპირ იქნება განთავსებული, საიდანაც ერთი გზა მიდის თურქეთისკენ, ხოლო მეორე სომხეთის საზღვრისკენ. ნოემბრის დასაწყისში იქ გვექნება უკვე ადმინისტრაცია. კადრები აყვანილი და დატრენინგებული გვყავს. დავიჭირეთ პირველი ბრაკონიერებიც, რომლებიც თევზს უკანონოდ იჭერდნენ კარწახისა და ბუღდაშენის ტბებში.
_ რა ფუნქციას ითავსებს დაცულ ტერიტორიებში ადმინისტრაციული ცენტრები?
_ადმინისტრაციული შენობები საგანმანათლებლო მომსახურების ცენტრია, სადაც ვიზიტორებს ჩვენი სპეციალისტები აცნობენ დაცულ ტერიტორიას. აკვალიანებენ, სად წავიდნენ, რა ნახონ და ა.შ. ამჟამად, ყაზბეგში, ფშავ-ხევსურეთში, ალგეთსა და ქობულეთშიც ვიწყებთ ადმინისტრაციული ცენტრების მშენებლობას.
_ ოკაცეს კანიონი 10 სექტემბერს გაიხსნა. მახსოვს, ექსპერტები ამ პროექტს იწუნებდნენ. მოხდა თუ არა პროექტის კორექტირება?
_ ექსპერტები იწუნებდნენ მის ვიზუალურ მხარეს. მე ვთვლი, რომ გარემოში ბილიკი ძალიან კარგად ჯდება. იქ ვიზიტორები ჩადიან უკვე. ჩვენი მიზანია, მოსახლეობას მოგება ჰქონდეს და ისინი იღებენ კიდეც ამ სარგებელს. იქ პატარა საოჯახო სასტუმრო უკვე გაჩნდა. მოლოდინია, რომ კვების ობიექტებიც გაჩნდება. ჩვენ ასევე გვინდა კინჩხის კანიონის მოწყობა. საქართველოში რაც მინახავს, იქ ყველაზე ლამაზი ჩანჩქერია. ოკაცეს კანიონიდან სადღაც 7 კილომეტრია.
_ მარტვილის კანიონთან დაკავშირებით გეგმავთ რაიმე სიახლეს?
_ მარტვილის კანიონში არის ველური ტურიზმი. რაც იქ ხდება ყოვლად დაუშვებელი და ამაზრზენია და ჩვენ ამას წერტილს დავუსვამთ. იქ ავაშენებთ ვიზიტორთა ცენტრს და პურ-მარილები და ველური კამპანიები აღარ იქნება. პროექტის მიხედვით, ზემოთა მხარეს საფეხმავლო ბილიკი იქნება, მეორე გზა დადიანების საბანაომდე ჩავა. ტურისტებისთვის ვაპირებთ კაიაკების სერვისის შეთავაზებას.
_რაც შეეხება იმ ადამიანებს, რომლებიც ნავებს აქირავებენ, მათ შემოსავალს, მსგავსი პროექტით, პრობლემა ხომ არ შეექმნება?
_ ჩვენი მისწრაფება არის თუ არა ის, რომ ვიყოთ ცივილიზებული სახელმწიფო? რა თქმა უნდა, ადამიანს არ მოსწონს, გადასახადს რომ იხდის. ჩემი ხედვა ასეთია, მარტვილის კანიონებზე ვაპირებთ ოპერატორის შეყვანას, რომელიც ამ ყველაფერს გააკონტროლებს. ბუნებრივია, ოპერატორი მენავეებს თბილისიდან არ ჩაიყვანს და ადგილობრივების დაქირავება მოუწევს. ვისაც ექნება ამის გამოცდილება და ტექნიკური შესაძლებლობა, ამას ისინი გააკეთებენ.
