დიდივანი, შუა სურები, ზემო სურები, ტობახჩა-თავსურები, შველაურ-ციციბაური, ჩაკიტაური, წითელგორა, ჭალა-ქადაგაური _ სურების ხეობის სოფლის მოსახლეობა 25 სექტემბერს საერთო სახალხო ყრილობაზე შეიკრიბა და ხელისუფლებას დახმარება სთხოვა.
უშუქობა და უგზოობა _ ეს ის მთავარი პრობლემაა, რომელიც ხეობის მაცხოვრებლებს აწუხებთ.
_ ჩვენ გვინდა აქ დაბრუნება, გვინდა აქ ცხოვრება, მაგრამ ამ პირობებში ეს შეუძლებელია. აქ საცხოვრებელი პირობები არ არის. უგზოობა და უშუქობა სწორედ ის მიზეზებია, რის გამოც სოფლიდან ძალიან დიდია მიგრაცია, _ აღნიშნეს თბილისში მცხოვრებმა სურებლებმა, რომელთა ნაწილი მზადაა, გზის გაკეთების შემთხვევაში, სოფელში დაბრუნდეს.
_ 29 მოსწავლე სწავლობს სურების სკოლაში. წლეულს პირველკლასელიც კი არ გვყავს. აქ გაჩერება არავის უნდა. შვილი და შვილიშვილი რომ არ გაგიჩერდება, აქ რა უნდა ვაკეთოთ? _ აღნიშნეს სურებლებმა.
მოსახლეობის თქმით, სწორედ უგზოობის ბრალია, რომ სურებში ცხოვრება არავის უნდა:
ყურადღება ელექროენერგიის არ ქონაზეც გაამახვილეს:
_ შუქი რომ მოდის, ახალი წელი გვგონია, ისე გვიხარია. დიდი ხანია, სოფელს საკუთარი ჰესი აქვს, თუმცა, მწყობრიდან არის გამოსული და წელიწადში სულ ერთი თვის განმავლობაში გვაქვს შუქი. არა მგონია, ასეთ მდგომარეობაში მყოფი სოფელი იპოვოთ. რა გახდა ელექტრო ხაზების გამოყვანა ჩვენს სოფელში, _ თქვეს სურებლებმა.
მოსახლეობასთან შეხვედრას ჩოხატაურის მუნიციპალიტეტის საკრებულოს თავმჯდომარე ზაალ მამალაძე, საკრებულოს წევრები, გამგებელი ირაკლი კუჭავა და სხვადასხვა სამსახურის წარმომადგენლები ესწრებოდნენ.
„გურია ნიუსი“ ვრცელ რეპორტაჟს სურების ხეობიდან ორშაბათს შემოგთავაზებთ.
