ვინ არის პასუხისმგებელი სტიქიისგან დაზარალებული ოჯახების დახმარებაზე

ოზურგეთის მუნიციპალიტეტში 2014 წლის 5 ივნისს მომხდარი სტიქიის შედეგად დაზარალებული ოჯახების სახლების გადახურვის საკითხი კვლავ პრობლემატურია.

ჯერ კიდევ  6 ივნისს, საღამოს 9 საათზე, სტიქიასთან დაკავშირებით, საგანგებო თათბირი ჩაატარეს ოზურგეთის მუნიციპალიტეტის ყოფილმა გამგებელმა  კონსტანტინე შარაშენიძემ, გამგებლის ყოფილმა მოადგილემ ირაკლი სირაძემ და ინფრასტრუქტურის სამსახურის ყოფილმა უფროსმა თემურ გიორგაძემ და გურიის გუბერნატორს, გიორგი ჩხაიძეს 5 ივნისს, ოზურგეთის მუნიციპალიტეტში მომხდარი სტიქიის შედეგების ამ დროისთვის არსებული ვითარება გააცნეს:  "ზარალის ოდენობა უახლოეს პერიოდში გახდება ცნობილი, რის შემდეგაც ინფორმაცია რეგიონული განვითარებისა და ინფრასტრუქტურის სამინისტროს გადაეგზავნება", _ აღნიშნეს მაშინ საგანგებო თათბირზე ხელისუფლების წარმომადგენლებმა.

სტიქიის შედეგად მიყენებული ზარალის შესახებ  "გურია ნიუსი" არაერთხელ წერდა.

გურიის გუბერნატორმა გიორგი ჩხაიძემ "გურია ნიუსთან" საუბარში აღნიშნა, რომ  ინფრასტრუქტურის სამინისტროსთან  შეთანხმებით მიმდინარეობს მუშაობა სახლების გადახურვასთან დაკავშირებით: 

 "აღნიშნული სამინისტროსგან ვითხოვთ იმ თანხებს, რომლითაც ჩვენ გვინდა რეაგირება გავაკეთოთ, კონკრეტულად სახლებზე. მთელ რესურსს ახლა ვხარჯავთ სახურავების აღწერაზე. როდესაც სახლებს სახურავები გადაეხადათ, იმ დროიდან გამომდინარე, ზიანი არის ყოველდღიურად უფრო მეტი. ყველა წვიმაზე ზიანის მოცულობა იზრდება. მივიღეთ პოლიტიკური გადაწყვეტილება, რომ მუნიციპალიტეტის მთელი რესურსი, 100 პროცენტი დავხარჯოთ, რაც შეიძლება სწრაფად და დავადგინოთ ზარალი საცხოვრებელ სახლებზე", _ ამბობს გუბერნატორი.

5 ივნისს მომხდარი სტიქიის შემდეგ რამდენიმე თვე გავიდა. ყოფილმა თუ ახლანდელმა ხელისუფლებამ ოზურგეთის მუნიციპალიტეტში მცხოვრები დაზარალებული ოჯახების ნაწილი დააკმაყოფილა, ნაწილი კი არა. 

 "გურია ნიუსის " წყაროს ინფორმაციით, ოზურგეთის მუნიციპალიტეტის სოფელ მთისპირში რამდენიმე ოჯახს სახლის სახურავი მიუტანეს. თუმცა,  აღმოჩნდნენ გამონაკლისებიც.

ოზურგეთის მუნიციპალიტეტის სოფელ მთისპირში მცხოვრები შოთა ჩავლეშვილის, მიხეილ წულაძისა და მარინა კომუშოვის ოჯახები ხელისუფლებისგან დახმარების მოლოდინში არიაშნ.  

მაგული ჩავლეშვილი,  შოთა ჩავლეშვილის მეუღლე: "5 ივნისს ამოვარდნილმა ძლიერმა ქარმა ჩვენს სახლს სულ გადააძრო სახურავი. შევიტანეთ განცხადებები ოზურგეთის მუნიციპალიტეტის გამგეობაში. იმის მერე გვპირდებიან,  რომ დაგვეხმარებიან. რამდენიმე დღის წინ მოგვცეს 13 ცალი შიფერი, ეს რას გვეყოფოდა?!  კიდევ მივმართეთ. დაგვპირდნენ, მაგრამ ვიცით,  რომ ამაოდ ველოდებით. დაარიგეს ამ კუთხეში სახურავები, ყველა დააკმაყოფილეს რამდენიმე ოჯახის გარდა.  თავდაპირველად რომ არიგებდნენ, გვითხრეს, წაიღეთ ეს 13 ცალი და მეორე ეტაპზე მოგიწევთ კიდევო. მეორე ეტაპი დარიგდა და ჩვენ ისევ არ შეგვხვდა. ვერ მივხვდი, რატომ მისცეს სხვებს, ჩვენზე მეტი დაზარალებული ვინ იყო?  ბანკის ვალი გვაქვს, პენსიონერები ჯერ არ ვართ, არსად არ ვმუშაობთ, მხოლოდ ფიზიკური შრომით ვარსებობთ. წელს თხილიც არ გვქონდა. ყოველ გაწვიმებაზე სახლის სახურავზე დავრბივართ. 

 სოფელ მთისპირში მცხოვრები, რწმუნებულის ყოფილი თანაშემწე ანა ინწკირველი  "გურია ნიუსთან " ამბობს, რომ  შოთა ჩავლეშვილისა და მიხეილ წულაძის ოჯახები  სტიქიის დროს ყველაზე მეტად დაზარალდა სოფელ მთისპირში. 

 "როცა სტიქია მოხდა, გამგებელი იყო კოტე შარაშენიძე. მის დროს მოხდა მოსახლეობის აღწერა. დამუშავება ყოფილი ინფრასტრუქტურის სამსახურმა გააკეთა. ყველაზე მეტად დაზარალებული იყო ეს ორი ოჯახი. თუ ვინმეს დახმარება სჭირდებოდა, პირველ რიგში, ეს ორი ოჯახია. სახლებში წვიმა ჩამოუდით.  "კუხნას " ააძრეს სახურავი და სახლზე დააფარეს, სილიკონით აქვთ დამაგრებული. კატასტროფული მდგომარეობაა, _ აღნიშნავს ანა ინწკირველი. 

მაყვალა ჩავლეშვილი, მიხეილ წულაძის მეუღლე:  სტიქია რომ  მოხდა, იმ დღესვე მოვიდნენ ინფრასტრუქტურის სამსახურიდან და გვითხრეს, რომ მოგიწევთ დახმარება აუცილებლადო.  შემდეგ რწმუნებულს ჰყავდა მოყვანილი სპეციალური კომისია.  გვითხრეს, ისე ხართ დაზარალებული, პირველი თქვენ მოგიწევთო, მაგრამ ნახეთ, რა მდგომარეობაში ვართ. არჩევნების წინა დღეს დაარიგეს სახურავები, მაგრამ ვერ მოვხვდით სიაში.  5 ოჯახს მისცეს.  ერთი თვის წინ მოგვცეს რამდენიმე ცალი შიფერი. არ მოგვქონდა. მითხრეს, წაიღე და მეორე ეტაპზე კიდევ მოგიწევთო. რამდენიმე დღის წინ გავიგეთ, რომ ღამე ამოსულან და დაურიგებიათ სხვებისთვის, 11 ოჯახისთვის.  ჩემსავით არავინ არ დაზარალებულა. ნახეთ  "ბრიზენტები " მაქვს სახლზე გადაჭიმული. საძინებელ ოთახში თავზე გვაწვიმს. წვიმის დროს უნდა მოხვიდეთ და ნახავთ, რა მდგომარეობაში ვართ. ახლა რწმუნებული გვეუბნება, მე ეგ საერთოდ არ მეხებაო ". 

მარინა კომუშოვი, სოფელ მთისპირში მცხოვრები: "ქარიშხალმა სახლზე სულ გადაგვიძრო სახურავი. ორი ავადმყოფი ვართ სახლში. ყველა კუთხე-კუნჭულში თავზე გვაწვიმს. ჩვენ საერთოდ არ მოგვიწია დახმარება, სხვებს რაღაც ნაწილი აქვს აღებული. ძალიან გვიჭირს  ეკონომიკურად, იქნებ, თქვენი მეშვეობით მაინც დაგვეხმარონ ".

დაეხმარებიან თუ არა აღნიშნულ ოჯახებს, ამასთან დაკავშირებით  "გურია ნიუსმა " ოზურგეთის მუნიციპალიტეტის გამგებლის მოადგილეს ალექსანდრე ყველაშვილს მიმართა. 

ყველაშვილის ინფორმაციით,  დაზარალებული ოჯახების სია გადაცემული აქვს ტენდერში გამარჯვებული ინდმეწარმე კახა კანდელაკისთვის, რომელიც აღნიშნულ საკითხზეა პასუხიმგებელი.

 "5 ივნისს მომხდარ სტიქიასთან დაკავშირებით სიები გააკეთა ყოფილმა ხელისუფლებამ,  რაც აღნუსხა კიდეც შესაბამისმა კომისიამ და იმ ოჯახებმა მიიღეს სახურავები. როგორც მაქვს ინფორმაცია,  სახურავები დაზარალებულ ოჯახებში მიტანილია. თქვენ მიერ ჩამოთვლილი ადამიანები დღესაც ბრძანდებოდნენ ჩემთან აღნიშნულ საკითხთან დაკავშირებით, მაგრამ ეს ოჯახები ითხოვენ მთლიანად სახურავის შეცვლას, ის არ გვაკმაყოფილებს, რაც მოგვეცითო. ახლა ვაპირებთ ხელახლა კომისიის გაგზავნას, რადგან ზუსტად დაითვალონ ამ ოჯახების ზარალის ოდენობა. ამის მიხედვით ვიმსჯელებთ რამდენად შევძლებთ ამ ოჯახების დახმარებას, _ ამბობს ყველაშვილი.

_ ბატონო ალექსანდრე,  ჯერჯერობით, გადაწყვეტილი არ არის, გაეწევა თუ არა დახმარება აღნიშნულ ოჯახებს?

_ ნაწილი ხომ გაუგზავნეს?! თუ კიდევ არის დახმარების საჭიროება, ვეცდებით, რომ დავეხმაროთ. იმიტომ, რომ კარგი ადამიანები არიან. ვნახოთ, შეამოწმებს კომისია ადგილზე და თუ საჭიროება იქნება, დავეხმარებით. 

_ ჩვენ გვაქვს ინფორმაცია, რომ სოფელ მთისპირში, რამდენიმე ოჯახს ღამით დაურიგეს სახლის სახურავები..

_ ეს არ არის მართალი. ღამით არ მიუტანდნენ. მაგ საკითხზე პასუხისმგებელი პირი არის ინდმეწარმე კახა კანდელაკი, რომელმაც მოიგო ტენდერი. ეს მისი გადასაწყვეტია დღისით მიიტანს სახურავს თუ ღამით. ჩვენ არავისთან არაფერი არ მიგვაქვს, მხოლოდ სიები გადავეცით. ეს გაკეთდა წინა ხელისუფლების მიერ. ჩვენ სახლის სახურავები არ დაგვირიგებია, იმიტომ, რომ ახლა გამოვაცხადეთ ტენდერი, მოიგო ისევ კახა კანდელაკმა. ის შეიძენს ამ მასალებს და მიიტანს დაზარალებულ ოჯახებში. ჩვენთან მოიტანს მიღება- ჩაბარების აქტს და ამით გავიგებთ, ვის დაურიგდა მასალები, _ გვითხრა ყველაშვილმა.  

 "გურია ნიუსი " ინდმეწარმე კახა კანდელაკს დაუკავშირდა.

_ მე  შემიძლია, ერთი რამ გითხრათ. მე ვისი სიაც მომაწოდეს მუნიციპალიტეტის გამგეობიდან, იმათ ყველას დავურიგე და ვისი სიაც არ მომცეს, როგორ დავურიგებდი? ვინ ამინაზღაურებს ზედმეტ დანახარჯს? 

_ ბატონო კახა, თქვენ რამდენიმე დღის წინ, სოფელ მთისპირში დაარიგეთ სახურავები. რატომ დარჩა დახმარების გარეშე რამდენიმე ოჯახი? 

_ ეს ჩემი პრობლემა არაა. მე ვისი სიაც მომცეს, ყველგან მიტანილი მაქვს. შეგიძლიათ, გადაამოწმოთ. მე სხვა ინფორმაცია არ მაქვს ამ ოჯახებთან დაკავშირებით და არც მევალება, რომ რაიმე ინფორმაცია მქონდეს. მაძლევენ სიას და სიის მიხედვით ვარიგებ, _ გვითხრა კახა კანდელაკმა. 

 "გურია ნიუსმა " აღნიშნულ თემასთან დაკავშირებით გურიის გუბერნატორს, გიორგი ჩხაიძეს კომენტარი სთხოვა.

გიორგი ჩხაიძე:  5 ივნისს,  სტიქიის დროს,  დაზარალებული ოჯახების სიების აღწერა გააკეთა მუნიციპალიტეტის მაშინდელმა გამგეობამ. შემდეგ გაიგზავნა დოკუმენტაცია ინფრასტრუქტურის სამინისტროში. აღნიშნულ საქმიანობას ახორციელებდა მუნიციპალიტეტი და არა გუბერნია. ჩვენ გვეხებოდა შუამდგომლობა ინფრასტრუქტურის სამინისტროსთან. ყველა ოჯახი, რაც იყო მუნიციპალიტეტის მიერ წარდგენილი,  დაკმაყოფილდა.

_ ბატონო გიორგი, არიან ოჯახები, რომლებიც აცხადებენ, რომ  არ დაეხმარა ხელისუფლება…

_ მერი და გამგებელი ჩემთან იყვნენ ამ  საკითხთან დაკავშირებით. სამწუხაროდ, სიებთან დაკავშირებით ვერაფერს ვიტყვი. ფიზიკურად, ამის აღრიცხვას გუბერნია არ აწარმოებდა. ამ თემაზე ვმუშაობთ და თუ გადაწყდება, რომ არიან ოჯახები, ვისაც ეკუთვნით დახმარება და მოხვდნენ დასახმარებელთა სიაში, შესაბამისად, დავაყენებთ ხელახლა დაზიანებული სახლების გადახურვის საკითხს, _ აღნიშნა გუბერნატორმა. 

ოზურგეთის მუნიციპალიტეტის სოფელ მთისპირის მაჟორიტარი დეპუტატი ვლადიმერ ჩავლეშვილი  " გურია ნიუსთან " ამბობს, რომ აღნიშნულ ოჯახებს დახმარება ნამდვილად ეკუთვნით.

_ ეკუთვნით და მიიღებენ კიდეც, _ გვითხრა დეპუტატმა.