ლანჩხუთის მუნიციპალიტეტის საკრებულომ ხუთშაბათს რიგგარეშე სხდომა გამართა, რომელიც ხუთ საკითხს მოიცავდა. მას თავიდან 25 დეპუტატი ესწრებოდა, როგორც სხდომის თავმჯდომარე გიორგი ხელაძემ თქვა, დეპუტატთა არყოფნის მიზეზი ჯანმრთელობის გაუარესება გახლდათ და, შესაბამისად, სხდომის გაცდენაც საპატიო მიზეზად ჩაეთვალათ.
დღის წესრიგის ხუთი საკითხიდან სამი სამანდატო, საპროცედურო, იურიდიულ საკითხთა და ეთიკის კომისიის თავმჯდომარემ რომან ბიწაძემ გამოიტანა. პირველი საკითხი ლანჩხუთის მუნიციპალიტეტის ადმინისტრაციული ერთეულების შექმნასა და დადგენას ეხებოდა. ბიწაძის თქმით, ახალი კოდექსის თანახმად, ნაცვლად ტერიტორიული ერთეულისა, იქნება ადმინისტრაციული ერთეული. მთელი ცვლილებაც მხოლოდ ამით შემოიფარგლება, საზღვრები იგივე რჩება და ერთეულთა რაოდენობაც. რადგან საკითხი უმტკივნეულო იყო, მასზე სჯა-ბაასი აღარ გამართულა და დეპუტატებმაც ერთხმად დაამტკიცეს.
ბიწაძემ მეოთხე და მეხუთე საკითხებზეც ისაუბრა, რომელიც საქართველოს მთავრობის დადგენილების შესაბამისად, ითვალისწინებს საჯარო მოხელეთა რანგირებას, როგორც საკრებულოში, ასევე _ გამგეობაში. ამ საკითხების ფონზე, დეპუტატმა გია გოგუაძემ კითხვა დასვა _ რა საჭირო იყო რიგგარეშე სხდომის ასე საჩქაროდ მოწვევა, წინა კვირაში არ გვქონდა სესია, მაშინ რატომ არ გამოიტანეთ ეს საკითხები? მას იურისტის მოშველიებით განუმარტეს, რომ საკითხის გამოტანა 24 ოქტომბრის სხდომაზე პროცედურების დარღვევა იქნებოდა, ახლა კი იმიტომ შევიკრიბეთ რიგგარეშედ, რომ 31 ოქტომბრამდე გვაქვს ვადაო.
საკითხზე მსჯელობაც ამით ამოიწურა და, შესაბამისად, დამტკიცდა კიდეც. თუმცა, სუფსის მაჟორიტარმა დეპუტატმა ჯუმბერ ბლაგიძემ საკრებულოს აპარატში იურისტის შტატის დამატება მოითხოვა: "დეპუტატებმა იურისტთან გავიაროთ კონსულტაცია საჭირო თემებზე და აქ არ ვიყოთ ნოტარიუსივით, რასაც გამგეობა გვეტყვის, ხელი იმას ავუწიოთ."
საკრებულოს თავმჯდომარემ ბლაგიძე დაამშვიდა: "გამგეობის იურისტიც კარგად გვემსახურება, ჩემი თანაშემწეც პროფესიით იურისტია და არც ის დაგვამადლის კონსულტაციას, თუ ამის საჭიროება შეიქნა. ისე კი მომავალში შტატები დაგვემატება და მაშინ განვიხილოთ ეს საკითხი."
გამგეობის საფინანსო სამსახურის უფროსმა როლანდ ლაშხიამ შესყიდვების გეგმაში ცვლილებების შესვლაზე ისაუბრა, რომელიც "ჯიადთან" ჩაშლილი ტენდერმა გამოიწვია. საქმე ისაა, რომ აღნიშნულ ფირმას რამდენიმე ქუჩის სარეაბილიტაციო სამუშაოები უნდა ჩაეტარებინა, თუმცა, როგორც ვთქვით, ტენდერი ჩაიშალა და "ჯიაიდს" 200-ათასლარიანი ჯარიმა დაეკისრა. მთავრობამ კი გამოსავალი სამუშაოების შემდგომი გაგრძელებისთვის გამარტივებულ შესყიდვაში ნახა.
გია გოგუაძემ შეკითხვით მიმართა სხდომაზე მყოფ გამგებელს ზაზა ურუშაძეს: "ვინ არის პასუხისმგებელი, რომ ნოემბერ-დეკემბერში დაგებული ასფალტის საფარი ვარგისიანი იქნება?"
გამგებლის თქმით, ის გამარტივებული წესით ტენდერის ჩატარების მომხრე იყო, მაგრამ მთავრობამ გამარტივებული შესყიდვა არჩია, თუმცა, სამუშაოები გარდამავალი წესით ჩატარდება.
აღნიშნულის ირგვლივ ბევრი აღარ უდავიათ და ეს საკითხიც დაამტკიცეს დეპუტატებმა.
როლანდ ლაშხიამ შემდეგ საკითხად 2014 წლის ბიუჯეტში ცვლილების შეტანა წარმოადგინა, რაც ა(ა)იპ "ლანჩხუთი-სერვისსა" და "ლანჩხუთი-კეთილმოწყობაში" გახორციელებულ რეორგანიზაციას შეეხებოდა.
გამგებლის გადაწყვეტილებით, ზემოხსენებული ორი ა(ა)იპ ერთმანეთს შეერწყა, თუმცა, საბოლოოდ, ისევ ორი სამსახური მივიღეთ _ "ლანჩხუთი-სერვისს" განათება გამოეყო, დაემატა წყალი და შეიქმნა "ლანჩხუთი-ტექსერვისი".
"ახლა ძველი სამსახურიდან განათებას 26 166 ლარი ეკუთვნის და ცვლილებაც ბიუჯეტში ამან განაპირობა. რაც შეეხება წყალს, საამისო თანხა ბიუჯეტში ჯერ არაა ასახული და არც იქნება მომავალ წლამდე," _ თქვა ლაშხიამ.
