15-წლიანი პაუზის შემდეგ, ჩოხატაურის მუნიციპალიტეტის სოფელ სურებს ელექტროენერგიის 24-საათიანი მიწოდება აღუდგა.
ამ წლების განმავლობაში მაღალმთიანი სოფლის მოსახლეობა ელექტროენერგია საკუთარი ჰესიდან იღებდა, თუმცა, თვეები ისე გადიოდა, რომ სოფელს შუქი საერთოდ არ ჰქონდა.
_ ჰესი ხშირად ფუჭდებოდა, ზაფხულში კი წყალი არ ყოფნიდა და თვეების განმავლობაში უშუქოდ ვიყავით. წლების განმავლობაში ვითხოვდით დახმარებას, თუმცა, პატრონი არავინ გვყავდა,_ ამბობს სურების მოსახლეობა.
ამ მოთხოვნით მათ სექტემბერში ყრილობაც კი გამართეს და ხელისუფლებას დამხარება სთხოვეს..
“სოფელმა ერთობლივი განცხადება უნდა შემოიტანოს და აბონენტად დარეგისტრირება მოითხოვოს. დღემდე ასეთი განცხადება "ენერგო პრო ჯორჯიას" არ მიუღია. ჩვენ არანაირი პრობლემა არ გაქვს სოფლის გამრიცხველიანების, მთავარია, სოფელში იყოს ამის მზაობა, _ აღნიშნა ყრილობაზე "ენერგო-პრო ჯორჯიას“ ჩოხატაურის სერვისცენტრის ხელმძღვანელმა ვანო ჭარბაძემ.
ამ ყრილობის შემდეგ სურების მცხოვრებთა ნაწილის განცხადება, ელექტროენერგიის მიწოდების მოთხოვნით "ენერგო პრო ჯორჯიაში“ შევიდა და სამუშაოებიც დაიწყო. თუმცა, მოსახლეობის ინფორმაციით, ელექტროენერგიის მიწოდების შემთხვევაში, "ენერგო პრო ჯორჯია“ მათ ერთ მრიცხველზე მიერთებას დაპირდა, რაც პრობლემას შექმნიდა.
სურების მკვიდრი ზურაბ დარსალია "გურია ნიუსთან“ საუბრისას ამბობდა, რომ "ენერგო პრო ჯორჯია“ 55 ოჯახის ერთ მრიცხელზე მიერთებას აპირებდა, რაც მოსახლეობაში დაპირისპირებას გამოიწვევდა.
"რამდენიმე მოსახლის ერთ მრიცხველზე მიერთება კიდევ შეიძლება, მაგრამ მთელი 5 უბნის მოსახლეობას რომ ერთ მრიცხველზე მიაბამ, ეს უკვე პრობლემებს გამოიწვევს. ზოგ ოჯახში ერთი ადამიანი ცხოვრობს, ზოგგან – 5, რატომ უნდა გადაიხადოს ვინმემ იმაზე მეტი, ვიდრე ეკუთვნის? ამიტომ მოსახლეობა ითხოვს, რომ თითო უბანს, თითო მრიცხველი დაუყენონ, ასე პრობლემაც მოგვარდება და გაუგებრობებსაც თავიდან ავიცილებთ“,- აცხადებდა დარსალია.
როგორც "გურია ნიუსს“ სურების მაჟორიტარმა დეპუტატმა ოთარ სოროზანიშვილმა უთხრა, მოსახლეობის მოთხოვნა, რომ უბნებში რამდენიმე მრიცხველი დაყენებულიყო, მოგვარებულია.
"სურებისთვის ამ უმნიშვნელოვანესი პრობლემის მოსაგვარებლად ძალები არავის დაუზოგავს. ჩვენი ხეობის მცხოვრებლების ნაწილი, რომლებიც დღეს დედაქალაქში ცხოვრობდნენ, აქციებსაც კი მართავდნენ კანცელარიასთან. აქ, ადგილზე, ყველაფერს ვაკეთებდით, რომ პრობლემა მოგვარებულიყო. ადგილობრივი ხელისუფლების ხელშეწყობით, საკრებულოს თავმჯდომარის, გამგებლის, გუბერნატორის შუამდგომლობით ეს პრობლემა მოგვარდა. მიხარია, რომ საარჩევნოდ მიცემული დაპირება ჩემს სურებს მოკლე დროში შევუსრულეთ.
უკვე შევიძინე მრიცხველები და "ენერგო პრო ჯორჯია“ თანახმაა უბნებში დადგან. მოსახლეობის 65-70% უკვე იღებს ელექტროენერგიას, დანარჩენები ჰესის აღდგენას ითხოვენ, რაც, შესაძლოა, ახალ წლამდე ვერ მოესწროს და მოსახლეობის ნაწილი უშუქოდ დარჩეს. ჰესის აღდგენას, დაახლოებით, 15-დან 20-ათას ლარამდე სჭირდება. თანხების მოძიებაც უკვე დაწყებულია. მქონდა გუბერნატორთან ამ თემაზე საუბარი, რომელიც დაგვპირდა, რომ სპეციალისტს გამოაგზავნის. სანამ არ გვექნება დასკვნა, შესაძლებელია თუ არა ჰესის რემონტი და ექსპლუატაცია, ექნება თუ არა აზრი მის რემონტს და შესაბამისად, თანხის დახარჯვას, მანამდე ვერაფერს გეტყვით. სამომავლოდ, რა თქმა უნდა, ჰესის ამუშავების თემასაც განვიხილავთ, თუმცა, როგორც გითხარით, ამ ეტაპზე დაზუსტებით არაფრის თქმა არ შემიძლია. რამდენად მოესწრება ამის გაკეთება დეკემბრის ბოლომდე, ამასაც ვერ გეტყვით. ამასთან, ჰესი უკვე ძალიან მოძველებულია და მას სოფელი თავისი ძალებით ვერ შეინახავს, ამიტომ ვფიქრობთ შეღავათიან ფასებში ელექტროენერგიის მიწოდების სანაცვლოდ ის "ენერგო პრო ჯორჯიას“ გადავცეთ. ვნახოთ, რა იქნება. ამ ეტაპზე მთავარი ისაა, რომ სოფელში, სადაც უკვე თოვლია და ძალიან მძიმე ზამთარი იცის, 24 საათიანი ელექტრომომარაგებაა“, _ აცხადებს სოროზანიშვილი.
_ შუქი რომ აინთო ახალი წელი გვეგონა. არც კი ვიცით რა უნდა ვთქვათ. დღეიდან ჩვენც ვუყურებთ ტელევიზორს, ჩვენი შვილებიც ჩართავენ კომპიუტერს, ჩვენც გვექნება შესაძლებლობა, რომ ცოტათი მაინც გავიხალისოთ ის მძიმე ყოფა, რომელიც სოფელში ცხოვრებას ახლავს, სოფელში რომელსაც ამდენი ხანი შუქიც კი არ ჰქონდა, _ გვითხრეს სურებლებმა, რომლებსაც ახლა ყველაზე მეტად გზის გაკეთება სურთ.
რაც შეეხება სოფლის მოსახლეობის იმ ნაწილს, რომლებმაც ელექტროენერგიის მიწოდებაზე უარი თქვეს, ისინი ამას ელექტროენერგიის მაღალი ტარიფით ხსნიან, რის გადახდასაც, როგორც თავად ამბობენ, ვერ შეძლებენ.
_ საკმაოდ დიდი გადასახადია. ჩვენ არა გვაქვს ამის საშუალება. სამუშაო ჩვენ არ გვაქვს, არც მოსავალი და შუქის ფული რით უნდა გადავიხადოთ? ისევ ბნელში ყოფნა ჯობია, _ ამბობს თავსურების მოსახლეობის ნაწილი, რომლებსაც ჰესის აღდგენა სურთ.
