სახელმწიფო აუდიტის სამსახურმა ჩაატარა საქართველოს სოფლის მეურნეობის სამინისტროს აპარატის ფინანსური ანგარიშგების აუდიტი, რომელიც მოიცავს ბალანსს 2013 წლის 31 დეკემბრის მდგომარეობით დამასთან დაკავშირებულ ეკონომიკური კლასიფიკაციის მიხედვით ხარჯების, არაფინანსური აქტივებით საკასოოპერაციების, ფინანსური აქტივებითა და ვალდებულებებით საკასო ოპერაციების, წმინდა ღირებულების,არაფინანსური აქტივების მიღება-გასვლის და ავტომანქანების ექსპლუატაციაზე გაწეული ხარჯების შესახებანგარიშგებებს მოცემული თარიღებით დასრულებული სააღრიცხვო პერიოდისათვის.
აუდიტის დასკვნაში აღნიშნულია, რომ სამინისტროს ცენტრალურ აპარატის ბალანსზე ასახულია 2005-2006 წლებში ლიკვიდირებული საქვეუწყებო დაწესებულებების, სსიპ-ების და ყოფილი რაიონული სამმართველოების მიერ წარმოდგენილ სალიკვიდაციო ბალანსებში რიცხული 160,967 ლარის კრედიტორული და 1,976,882 ლარის დებიტორული დავალიანება,რომელზეც დავალიანების დამადასტურებელი პირველადი დოკუმენტაცია სამინისტროში არ ინახება,შესაბამისად ვერ იქნა მოპოვებული საკმარისი და შესაფერისი მტკიცებულებები აღნიშნული დავალიანებების დასადასტურებლად.
სამინისტროს აპარატის ბალანსზე ფიქსირდება შენობა-ნაგებობები, რომელზეც ცვეთის დარიცხვის მეთოდი და კოეფიციენტი გაურკვეველია და რიგ შემთხვევაში არ შეესაბამება მომქმედ ინსტრუქციას.
2013 წელს სამინისტროს ბალანსზე აღრიცხულია საქართველოს სხვადასხვა რაიონის მუნიციპალიტეტების მიერ (54 მუნიციპალიტეტი) სამინისტროს ტერიტორიული ორგანოების (საინფორმაციო-საკონსულტაციო ცენტრები) ფუნქციონირებისათვის, უსასყიდლო უზურფრუქტის ფორმით გადმოცემული საოფისე ფართები, რომელთა საბალანსო ღირებულება 49 მუნიციპალიტეტში (ხელშეკრულებებში გადმოცემული ფართების ღირებულებები მითითებული არ არის) აღირიცხა სიმბოლურ ფასად ერთ ლარად, რაც არ წარმოადგენს მათ რეალურ ღირებულებას.
"პირობითი მოსაზრების საფუძვლებში აღწერილი საკითხების ფინანსურ ანგარიშგებაზე შესაძლო გავლენის გარდა, წარმოდგენილი ფინანსური ანგარიშგება ყველა არსებითი ასპექტის გათვალისწინებით უტყუარად ასახავს სამინტროს ბალანსს 2013 წლის 31 დეკემბრის მდგომარეობით და მასთან დაკავშირებულ ეკონომიკური კლასიფიკაციის მიხედვით ხარჯების, არაფინანსური აქტივებით საკასო ოპერაციების, ფინანსური აქტივებითა და ვალდებულებებით საკასო ოპერაციების, წმინდა ღირებულების, არაფინანსური აქტივების მიღება-გასვლის, და ავტომანქანების ექსპლუატაციაზე გაწეული ხარჯების შესახებ ანგარიშგებებს", _ ვკითხულობთ დასკვნაში.
აუდიტის სამსახურმა სოფლის მეურნეობის სამინისტროს ელექტრონული ტენდერებიც შეისწავლა. დასკვნის თანახმად, სამინისტროს მიერ დარღვეულია სახელმწიფო შესყიდვების შესახებ საქართველოს კანონის მე-11 მუხლის მე-7 პუნქტის მოთხოვნები, რომლის მიხედვითაც, დაუშვებელია შესყიდვის ობიექტის აღწერილობაში მითითებულ იქნეს კონკრეტული სასაქონლო ნიშანი, პატენტი, მოდელი, წარმოშობის წყარო ან მწარმოებელი.
უფრო კონკრეტულად კი, 2013 წელს საქართველოს სოფლის მეურნეობის სამინისტროს მიერ ავტომობილების შესაძენად გამოცხადდა 4 ელექტრონული ტენდერი. აღნიშნული ტენდერებით შეძენილი ავტომობილების საერთო ღირებულებამ დღგ-ს ჩათვლით შეადგინა 1,841,040 ლარი.
აუდიტის სამსახურის დასკვნის თანახმად, შესყიდვების დოკუმენტაციაში არ მოიპოვება რაიმე დოკუმენტი ან მოხსენებითი ბარათი, რომლითაც რომელიმე სტრუქტურული ერთეულის ან თანამშრომლის მიერ იქნება დასაბუთებული, კონკრეტული ავტომობილის შეძენის საჭიროება, მათი რაოდენობა, ტექნიკური მახასიათებლები და მიწოდების ვადები.
2013 წლის 8 თებერვალს სამინისტრომ გამოაცხადა ელექტრონული ტენდერი 54 ერთეული მაღალი გამავლობის სატრანსპორტო საშუალების შესყიდვის მიზნით. შესყიდვის სავარაუდო ღირებულებამ დღგ-ს ჩათვლით შეადგინა 1,465,000 ლარი. ტენდერში მონაწილეობა მიიღო ერთმა პრეტენდენტმა – შპს „ჯი თიმოტორსმა“ და გაიმარჯვა, ხელშეკრულება გაფორმდა 1,445,040 ლარზე.
სატენდერო დოკუმენტაციის ტექნიკური დავალების მიხედვით, ტენდერში გამარჯვებულს (ტენდერი დასრულდა 2013 წლის 5 მარტს) სამინისტროსთვის უნდა მიეწოდებინა დაბალი კუბატურის 1200სმ3-1500სმ3, მაღალი გამავლობის ავტომანქანები.
მიწოდების ვადა განისაზღვა არანაკლებ 40 ერთეული _ ხელშეკრულების გაფორმებიდან არაუგვიანეს 15 კალენდარული დღის ვადაში, ხოლო დანარჩენი ნაწილი _ არაუგვიანეს 2013 წლის 20 მაისისა. შემჭიდროვებულ ვადებში მიწოდების მოთხოვნა, შესაძლოა ვერ უზრუნველყოფდეს შესყიდვების მონაწილეთა მიმართ სამართლიან და არადისკრიმინაციულ მიდგომას.
15 კალენდარულ დღეში 40 ერთეული ავტომობილის იმპორტი საკმაოდ მცირე ვადაა, რის გამოც მინიმალური იქნებოდა შანსი იმისა, რომ ტენდერში მონაწილეობა მიეღო ისეთ პრეტენდენტს, რომელსაც წინასწარ უკვე შეკვეთილი არ ექნებოდა აღნიშნული ოდენობის და სპეციფიკაციის ავტომანქანა.
საყურადღებოა ის გარემოებაც, რომ ტენდერი დასრულდა 2013 წლის 5 მარტს, ხელშეკრულება გაფორმდა 6 მარტს და იმავე დღეს მოხდა 44 ერთეული ავტომანქანის მიწოდება, დანარჩენ 10 ავტომობილზე მიღება-ჩაბარების აქტი გაფორმდა 2013 წლის 19 მარტს.
2013 წლის 21 თებერვალს, სამინისტრომ გამოაცხადა გამარტივებული ელექტრონული ტენდერი ქსელების შესყიდვის მიზნით. შესყიდვის სავარაუდო ღირებულებამ დღგ-ს ჩათვლით შეადგინა 30,000 ლარი.
ტენდერში მონაწილეობა მიიღო და გაიმარჯვა ერთმა პრეტენდენტმა – შპს „ალგორითმმა“. ხელშეკრულება გაფორმდა 29,193 ლარზე.
აღსანიშნავია, რომ სატენდერო დოკუმენტაციის ტექნიკური დავალების მიხედვით მოთხოვნილია 8 პორტიანი ქსელის გამანაწილებლის კონკრეტული მოდელი „TL-SG1008D“. ამავე ტენდერში მოთხოვნილი იყო 48 პორტიანი ქსელის გამანაწილებლები, რომლის ტექნიკურ მახასიათებლებში მითითებულია „Junos Software version testedJunos 10.4“. „Junos 10.4“ არის კომპანია „Juniper Networks“-ის მიერ წარმოებული ოპერაციული სისტემა, რომელიც მხოლოდ ამ კომპანიის მიერ წარმოებულ მოწყობილობებთან არის თავსებადი.
"აღნიშნული გარემოებები არღვევს სახელმწიფო შესყიდვების შესახებ საქართველოს კანონის მე-11 მუხლის მე-7 პუნქტის მოთხოვნებს, რომლის მიხედვითაც, დაუშვებელია შესყიდვის ობიექტის აღწერილობაში მითითებულ იქნეს კონკრეტული სასაქონლო ნიშანი, პატენტი, მოდელი, წარმოშობის წყარო ან მწარმოებელი, გარდა იმ შემთხვევებისა, როდესაც არ არსებობს შესყიდვის ობიექტის ზუსტი აღწერის სხვა საშუალებები" _ აღნიშნავენ სახელმწიფო აუდიტის სამსახურში.
