საქართველოში ახლა სოფლის მეურნეობის განვითარების თემა პოპულარულია და მასზე აქტიურად საუბრობს მთავრობა, მიღებულია 2014-2020 წლების სოფლის მეურნეობის განვითარების სტრატეგია. შექმნილია საინფორმაციო-საკონსულტაციო სისტემა, მუშაობს სხვადასხვა სამეზობლო პროგრამა, რომლის მიზანი საქართველოს სოფლის მეურნეობის გამოცოცხლებაა.
მიუხედავად გააქტიურებული პროცესებისა, სოფლებში მცხოვრები მცირე ფერმერების დიდი უმრავლესობა, პრობლემას საკუთარი გადმოსახედიდან უყურებს და მიიჩნევს, რომ ეს გამოიწვია თავის დროზე მიწის რეფორმის დიდი ხარვეზებით ჩატარებამ. მაგალითად, სასოფლო-სამეურნეო მიწა დაქუცმაცებულია, კერძო სავარგულები სრულყოფილად არ არის გამიჯნული სახელმწიფოსგან; სოფლებში, პრივატიზებული მიწების გარდა, კიდევ არსებობს სახელმწიფო ბალანსზე არსებული მიწები, რომელიც არსად არ არის დაფიქსირებული, ზოგი მიტაცებულია, ზოგიც _ გავერანებული. საღად მოაზროვნე და ვითარებაში გარკვეული ფერმერები ფიქრობენ, რომ სწორედ ამიტომ ვერ ან არ აძლევენ უპროცენტო სესხს თუ საჭირო ტექნიკას გლეხებს, რადგან არ იციან, სრულად რას ფლობს ეს გლეხი. ამიტომ ჯერ ფერმერს უნდა მიუზომო მიწა, კანონის სრული დაცვით, მერე კი დააკისრო პასუხისმგებლობა, რა მოიწიოს, რა კუთხით შეიძლება, წარმატებით ისაქმიანოს ამ მიწაზე.
„გურია ნიუსი“ აღნიშნულ თემაზე ესაუბრა სასოფლო-სამეურნეო კოოპერატივების განვითარების სააგენტოს უფროსს, გიორგი მიშელაძეს.
_ბატონო გიორგი, დღეისათვის ქვეყანაში წარმატებით ინერგება კოოპერატიული მოძრაობა, თუმცა, სოფელს ჯერ არაფერი ეტყობა და მიიჩნევენ, რომ თავდაპირველად სრულყოფილად უნდა მოხდეს დაქუცმაცებული მიწების გამიჯვნა: რომელია პრივატიზებული, მიტაცებული, გატყიურებული თუ სახელმწიფო ბალანსზე არსებული და მერე უნდა დაიწყოს ყველანაირი მოძრაობა სოფლის ფეხზე დასადგომად.
_კი, ბატონო! მინდა მოგახსენოთ, რომ ეკონომიკის სამინისტრომ მიიღო გადაწყვეტილება და გამოაცხადა სახელმწიფო ქონების ინვენტარიზაციის პროგრამა. აღნიშნული ინვენტარიზაციის ფარგლებში მოხდება არა მხოლოდ მიწების, არამედ მთელი სახელმწიფო ქონების ინვენტარიზაცია. ამასთან ერთად, სოფლის მეურნეობის სამინისტროში ხორციელდება მუშაობა, რომ გამოცხადდეს პროგრამა, რომლის ფარგლებშიც მოხდება სასოფლო-სამეურნეო მიწების ზუსტი აღრიცხვა და დაკანონება, რაზეც თქვენ მეკითხებით. უნდა მოხდეს მისი რეგისტრაცია.
_ და ეს გულისხმობს მცირე ფერმერთა ძლიერ მხარდაჭერას?
_რა თქმა უნდა. მოხდება იმ მოქალაქეების მხარდაჭერა, რომლებმაც 90-იან წლებში განხორციელებული პრივატიზაციის დროს, მიწები კი მიიღეს, თუმცა საჯარო რეესტრში არ აქვთ დარეგისტრირებული, არ დაკანონებიათ.
_კონკრეტულად რა ღონისძიება ტარდება ამ პრობლემის დასარეგულირებლად? ეს ყველა მცირე ფერმერს აინტერესებს.
_ხორციელდება გარკვეული მოლაპარაკებები მსოფლიო ბანკთან და სხვა დონორებთან, რომ შეიქმნას პროგრამა და მოხდეს მიწის ზუსტი აღრიცხვიანობა. ამასთან ერთად, მოგეხსენებათ, წელს კოოპერატივის ფარგლებში 20412 ჰა მიწა არის მობილიზებული. თავისთავად, კოოპერატივების მიმართ მხარდაჭერა იმასაც გულისხმობს, რომ გარკვეული პროგრამების ფარგლებში, ხელს შევუწყობთ, მცირე ფერმერების სარგებლობაში არსებული მიწები დაარეგისტრირონ დროულად და კანონიერად. ეს იქნება ერთი დიდი წინ გადადგმული ნაბიჯი მიწის რეგისტრაციის საქმეში.
_უცხოელებზე მიწის გაყიდვის გამოც შიშობს ჩვენი მოსახლეობა…
_ ეს პრობლემა არ იარსებეს. სხვადასხვა პროგრამების მეშვეობით, სახელმწიფოებრივი მიდგომით, საქართველოში მოხდება მიწის ბაზრის დარეგულირება, რაც მერე თავისთავად ბიზნესის განვითარებას შეუწყობს ხელს. მიწის საკუთრების ზუსტი დადგენით მოწესრიგდება მიწის ბაზარი.
_ბატონო გიორგი, შეიძლება პირდაპირ არა, მაგრამ ირიბად მაინც გეხებათ ეს კითხვა: ოზურგეთის მუნიციპალიტეტის სოფლის მეურნეობის სამსახურმა, ჩაის რეაბილიტაციის სამწლიანი პროექტი წარადგინა სოფლის მეურნეობის სამინისტროში. შემდეგ გავრცელდა ინფორმაცია, რომ ეს პროექტი მოიწონეს და სუბსიდიის სახით სერიოზული თანადგომას გაუწევენ მეჩაიეებს. ეს პროექტი დახმარებას კოოპერატივის შექმნის შემთხვევაში ითვალისწინებს. რას გვეტყვით აღნიშნულის თაობაზე?
_თქვენი ნებართვით, მე შემოვიფარგლები იმ პასუხებით, რომელიც შეეხება მხოლოდ სასოფლო -სამეურნეო კოოპერატივების განვითარების სააგენტოს. რა თქმა უნდა, ჩვენი სააგენტო სოფლის მეურნეობის სისტემაში შედის და შეგიძლიათ, ეს კითხვაც დამისვათ. გეტყვით იმას, რომ სოფლის მეურნეობის სამინისტრო ნამდვილად მუშაობს სხვადასხვა დარგობრივ პროგრამაზე და ერთი უმნიშვნელოვანესია მეჩაიეობის დარგი, ასევე მუშაობენ მრავალწლიანი კულტურების, მემარცვლეობის, მესაქონლეობის პროგრამებზე. ეს პროგრამები აუცილებლად იქნება წარდგენილი საზოგადოების წინაშე და დარწმუნებული ვარ, მოიწონებენ და განხორციელდება.
