შვედურმა გამოცემა "აფტონბლადეტმა“ მორიგი სკანდალური ინფორმაცია გამოაქვეყნა. მის მიერ ჩატარებული გამოძიების შედეგების თანახმად, შვედეთის მიერ გამოყოფილ ფულად დახმარებას საქართველოს ექს-მთავრობა ევროკავშირსა და ნატო–ში გაწევრიანების შესახებ სატელევიზიო თოქ-შოუების, რადიო– და ტელეგადაცემების დასაფინანსებლად იყენებდა.
კერძოდ, საქართველოს ყოფილი ხელისუფლება არამიზნობრივად ხარჯავდა იმ თანხებს, რომელსაც მას შვედეთის საგარეო საქმეთა სამინისტროსთან არსებული "განვითარების სფეროში საერთაშორისო თანამშრომლობის სააგენტო“ – "სიდა“ აწვდიდა.
როგორც ცნობილია, აღნიშნული ორგანიზაციის ამოცანა სიღარიბის დაძლევა და ადამიანის ცხოვრების პირობების გაუმჯობესებაა.
"აფტონბლადეტი“ წერს, რომ საქართველოს მოსახლეობისთვის განკუთვნილი 95 მილიონი შვედური კრონა, ქვეყანაში მომუშავე ამერიკულ ორგანიზაციებს – NDI-ს, Eurasia Foundation-სა და მის შვილობილ კომპანია EPF-ს გადაეცა. ორგანიზაციები ამ თანხებით ხელმძღვანელობას ხელფასებსა და მივლინების თანხებს უხდიდნენ.
„აფტონბლადეტი“ აღნიშნავს, რომ ზემოთხსენებული ორგანიზაციები USAID-ს მიერ ფინანსდებიან, მათ მნიშვნელოვან ფინანსურ დახმარებას ნავთობკომპანია „შევრონიც“ უწევს.
გამოცემა წერს, რომ საქართველოში აღნიშნული თანხები არამიზნობრივად იხარჯებოდა და მაგალითად მოჰყავს NDI-ს მიერ განხორციელებული ერთ-ერთი პროექტი, როდესაც 2012 წლის საპარლამენტო და 2013 წლის საპრეზიდენტო არჩევნების დროს ორგანიზაციამ სოციოლოგიური გამოკითხვა ჩაატარა. გამოკითხვის შედეგებით, მოსახლეობის უმეტესება მაშინდელ პრეზიდენტ მიხეილ საააკაშვილს უჭერდა მხარს.
თუმცა არჩევნების შემდეგ აღმოჩნდა, რომ ექს-პრეზიდენტის მხარდამჭერთა რაოდენობა გაცილებით უფრო ნაკლებია, ვიდრე NDI-ს გამოკითხვაში იყო ასახული.
„აფტონბლადეტი“ ასევე წერს, რომ შვედური ორგანიზაცია „სიდას“ მიერ საქართველოსთვის გამოყოფილ სახსრებს 2011-13 წლის პერიოდში ხელისუფლება 49 სატელევიზო პროგრამის დასაფინანსებლად იყენებდა. კერძოდ, თანხა გადაეცა საზოგადოებრივ მაუწყებელს, რომელმაც ტელეგადაცემები მიუძღვნა საკითხს, თუ რატომ უნდა გაწევრიანდეს საქართველო ევროკავშირში.
გამოცემის ჟურნალისტი გაესაუბრა საქართველოს მთავრობის წარმომადგენელსაც, რომლის ვინაობას არ ასახელებს. "აფტონბლადეტთან“ საუბარში რესპონდენტი აცხადებს, რომ საზოგადოებრივი მაუწყებლისთვის პოლიტიკური დაკვეთების მიცემა საქართველოს კანონმდებლობას ეწინააღმდეგება.
"აფტონბლადეტის“ სტატიას უკვე გამოეხმაურა შვედეთის მთავრობა, რომელიც უახლოეს პერიოდში ორგანიზაცია „სიდასთან“ შეხვედრას და საკითხის გარკვევას აპირებს.
შეგახსენებთ, რომ გასული წლის სექტემბერში "აფტონბლადეტმა“ სკანდალური სტატია გამოაქვეყნა, რომლის თანახმად, შვედეთის ყოფილი საგარეო საქმეთა მინისტრი კარლ ბილდტი მიხეილ სააკაშვილის ინტერესებს ლობირებდა.
