სახელმწიფო აუდიტის სამსახურმა ჩაატარა საქართველოს სპორტისა და ახალგაზრდობის საქმეთა სამინისტროს ფინანსური ანგარიშგების და კანონმდებლობასთან შესაბამისობის აუდიტი, რომელიც მოიცავს ბალანსს 2013 წლის 31 დეკემბრის მდგომარეობით.
დასკვნის თანახმად, სამინისტროს ბალანსი არასწორად ასახავს ფულად სახსრების ანგარიშს, კერძოდ „სახაზინო სამსახურის მიერ საბიუჯეტო ორგანიზაციების სამივლინებო და წარმომადგენლობითი ხარჯების ანგარიშის გახსნისა და კორპორაციული ბარათების დამზადების თაობაზე“ საქართველოს ფინანსთა მინისტრის 2010 წლის 15 თებერვლის N92 ბრძანების საფუძველზე სამინისტროსთვის გახსნილია ანგარიში და დამზადებულია კორპორატიული ბარათი.
2013 წლის 31 დეკემბრისათვის აღნიშნულ ანგარიშზე ირიცხებოდა ნაშთი 2,950.78 ლარი, რომელიც ბალანსში ფულადი სახსრების ანგარიშზე არ არის ასახული.
სამინისტროს ბალანსი არარეალურად ასახავს გრძელვადიან არაფინანსურ აქტივებს (ძირითად აქტივებს), რადგან ბალანსში 2013 წლის 1 იანვრისთვის და 2013 წლის 31 დეკემბრისთვის არ არის ასახული შესაბამისად, 7,828,810.86 ლარის და 5,801,937.44 ლარის ღირებულების არაფინანსურ აქტივები, კერძოდ – ხელოვნურსაფარიანი და ასფალტაფარიანი მოედნები და ე.წ. „პატრიოტული ბანაკების“ ინფრასტრუქტურა, რომელიც სამინისტროს შექმნამდე (2010 წლის პირველ ივლისამდე), არაფინანსური აქტივების მუხლით ირიცხებოდა ყოფილი საქართველოს კულტურის, ძეგლთა დაცვისა და სპორტის სამინისტროს სახელმწიფო საქვეუწყებო დაწესებულება – საქართველოს სპორტისა და ახალგაზრდობის საქმეთა დეპარტამენტის ბალანსზე, ხოლო სპორტისა და ახალგაზრდობის საქმეთა სამინისტროს შექმნის შემდეგ, აღნიშნული ქონება ასახულია ბალანსგარეშე ანგარიშზე.
"უნდა აღინიშნოს, რომ სპორტისა და ახალგაზრდობის საქმეთა სამინისტრომ ყოფილი დეპარტამენტის ბალანსზე რიცხული უძრავ-მოძრავი ქონების გადმოცემასთან დაკავშირებით მიმართა (წერილი N03-11/32 13.07.2010წ.) ეკონომიკისა და მდგრადი განვითარების სამინისტროს. ეკონომიკისა და მდგრადი განვითარების სამინისტროს საპასუხო წერილის შესაბამისად, სპორტისა და ახალგაზრდობის საქმეთა სამინისტრომ 2010 წლის 30 სექტემბრის N03-11/612 წერილით წარადგინა ყოფილი დეპარტამენტის ბალანსზე რიცხული უძრავი და მოძრავი ქონების ჩამონათვალი, რის შემდეგაც, ეკონომიკისა და მდგრადი განვითარების სამინისტრომ უზრუნველყო მოძრავი ქონების გადაცემა მისი არსებობის ვადით (წერილი#15/2053/3-10 01.11.2010წ.), ხოლო უძრავი ქონების გადაცემის უზრუნველსაყოფად მოითხოვა აზომვითი ნახაზების და საკადასტრო რუკების წარდგენა.
სამინისტრომ, იმის გათვალისწინებით, რომ ლიკვიდირებულად გამოცხადებული დეპარტამენტის ბალანსზე რიცხული უძრავი ქონების დიდი ნაწილი (ხელოვნურ და ასფალტსაფარიანი მოედნები) დისლოცირებულია საქართველოს თითქმის ყველა რეგიონში და წარმოადგენს მუნიციპალური დანიშნულების ობიექტებს, ხოლო ყოფილი პატრიოტული ბანაკები აღარ ფუნქციონირებს, მიზანშეწონლად არ მიიჩნია აღნიშნული ობიექტების აზომვითი ნახაზების და საკადასტრო რუკების მომზადებაზე საბიუჯეტო ხარჯების გაწევა.
კერძოდ საკითხი ეხებოდა 10,014,250.00 ლარის უძრავ ქონებასთან დაკავშირებულ აზომვითი ნახაზების და საკადასტრო რუკების დოკუმენტაციის მომზადებას. სამინისტროს მიერ დარღვეულია "სახელმწიფო ქონების შესახებ“ საქართველოს კანონის 33-ე მუხლის მე-3 პუნქტი, რომლის თანახმად, უძრავი ქონების სარგებლობაში გადაცემა საჯარო რეესტრში უნდა დაარეგისტრიროს იმ სახელმწიფო ორგანომ რომელსაც სარგებლობაში გადაეცა ეს ქონება“, _ წერია სახელმწიფო აუდიტის დასკვნაში.
2013 წელს, სამინისტომ ადგილობრივ თვითმმართველობებთან კონსულტაციების შედეგად დაადგინდა სამინისტროს ბალანსის საცნობარო მუხლში ასახული რამდენიმე ხელოვნურ და ასფალტსაფარიანი მინიმოედნის მუნიციპალიტეტებისადმი კუთვნილება (რეესტრიდან ამონაწერების საშუალებით), ასევე კანონმდებლობით დადგენილი პროცედურების გავლის შემდეგ, სამინისტროს უშუალო მონაწილეობით 2013 წელს განხორციელდა მინიმოედნების ნაწილის ადგილობრივი თვითმმართველობების საკუთრებაში რეგისტრაცია.
2013 წელს სულ გადაცემულია 1,575,469.26 ლარის ქონება, რის შემდეგაც ამ მოედნების ღირებულება მოიხსნა ბალანსგარეშე ანგარიშიდან.
"აქვე უნდა აღინიშნოს, რომ სამინისტრომ მხოლოდ 2013 წელს დააზუსტა ყოფილი სპორტისა და ახალგაზრდობის საქმეთა დეპარტამენტიდან 2010 წლის პირველი ივლისს მიღებული ბალანსგარეშე ანგარიშებზე რიცხული უძრავი ქონება – ხელოვნურსაფარიანი მოედნების: NB112.03371 ანგარიშზე – 1,903,525.77 ლარის; NB112.03390 ანგარიშზე – 937,611.75 ლარის და NB112.03391 ანგარიშზე – 1,722,660.00 ლარის ქონების დასახელება და ღირებულება. დაზუსტების შედეგად გამოვლინდა, რომ 451,404.16 ლარის თანხა დარჩა გაუნაწილებელი ისე, რომ მას არ შეესაბამება აქტივის დასახელება. აღნიშნული თანხა 2013 წლის 31 დეკემბრისთვის ირიცხება გარესაბალანსო „ხელოვნურ საფარიანი მოედნების კორექტირების“ NB113 ანგარიშზე. აგრეთვე, აღნიშნული უძრავი ქონების ჩამონათვალში ასახულია ზუგდიდის მუნიციპალიტეტის სოფელ განმუხურში 2009 წლიდან რიცხული პატრიოტული ბანაკის ქონება (18 ერთეული კოტეჯი და ბანაკის დამხმარე ინფრასტრუქტურა, სულ 925,299.0 ლარის ღირებულების), რომელიც ირიცხება სამინისტროს ბალანსზე საცნობარო მუხლების შემდეგ ანგარიშებზე: შენობა-ნაგებობები და სპორტული მოედნები (ანგარიში B11203141) – ნარჩენი ღირებულებით – 617,500.00 ლარი; 18 კოტეჯი (ანგარიშები B11203162 – B11203179) – ნარჩენი ღირებულებით – 307,799.00 ლარი.
აუდიტის სამსახურის და სპორტისა და ახალგაზრდობის საქმეთა სამინისტროს ადმინისტრაციული დეპარტამენტის წარმომადგენლების მიერ, აღნიშნული ქონების ადგილზე დათვალიერების შედეგად გამოვლინდა, რომ განმუხურის ბანაკის ინფრასტრუქტურა და ერთეული კოტეჯი ადგილზე არ აღმოჩნდა..
(საკითხი ასახულია აუდიტის ანგარიშის საიდუმლო ნაწილში).
"2010 წლის 29 სექტემბრიდან, სამინისტროს ბალანსის ძირითადი აქტივებში 2013 წლის 31 დეკემბრის მდგონარეობით ირიცხება სამინისტროს არსებობის პერიოდში შექმნილი „ანაკლიის ბანაკი პროექტის ჩათვლით“ (N2119.1.00216 ანგარიშზე) – 2,800,000.00 ლარის ნარჩენი ღირებულებით და ორი კოტეჯი (N2112.00214 და 2112.00215 ანგარიშებზე) – 19,062.34 ლარის ნარჩენი ღირებულებით, რომლებიც სამინისტროს სახელზე დარეგისტრირებული არ არის, რითაც დარღვეულია „სახელმწიფო ქონების შესახებ“ საქართველოს კანონის 33-ე მუხლის მე-3 პუნქტი.
აქვე უნდა აღინიშნოს, რომ დათვალიერების შედეგად, ანაკლიის ბანაკის ორი ერთეული კოტეჯი ადგილზე არ აღმოჩნდა.“ _ წერია დასკვნაში.
სამინისტროს განმარტებით სამინისტროს კონტროლს დაქვემდებარებულმა სსიპ „ბავშვთა და ახალგაზრდობის ეროვნულმა ცენტრმა“ 2011 წლის 10 მაისს შპს „ვიაიპი დენტთან“ გაფორმებული ხელშეკრულების საფუძველზე ანაკლიის ორი კოტეჯის და სქურის ბანაკის სამი კოტეჯის (37,439.10 ლარის ღირებულების) დაშლილი მასალისგან ააშენა ერთი კოტეჯი ანაკლიის ბანაკის ტერიტორიაზე, რომლის მშენებლობის ხარჯებმა შეადგინა 19,151.24 ლარი.
ზემოთ აღნიშნული ოპერაციები (5 კოტეჯის დაშლა და დაშლილი მასალისგან ერთი ახალი კოტეჯის აშენება) სამინისტროს ბუღალტერ აღრიცხვაში ასახული არ არის. ე.ი. ბალანსში არასწორად არის ასახული არაფინანსურ აქტივებში რიცხული ანაკლიის 2 ერთეულ კოტეჯი – 19,062.34 ლარის ღირებულებით და საცნობარო მუხლში ასახული სქურის ბანაკის 3 ერთეულ კოტეჯი – 37,439.10 ლარის ღირებულებით.
2011 და 2012 წლებში უძრავი ქონების ინვენტარიზაცია არ ჩატარებულა, ხოლო საქართველოს სპორტისა და ახალგაზრდობის საქმეთა მინისტრის 2013 წლის 28 ოქტომბრის #01/774 ბრძანების საფუძველზე 2013 წლის 20 დეკემბრის მდგომარეობით განხორციელებული ინვენტარიზაციის აქტში განმუხურის ბანაკის ინფრასტრუქტურა და 18 ერთეული ხის კოტეჯი – სულ 925,299.00 ლარის ღირებულების ქონება, დანაკლისად არ არის დაფიქსირებული.
საინვენტარიზაციო კომისიის 2013 წლის 27 დეკემბრის N1 ოქმში აღნიშნულია, რომ „2009 წელს მოწყობილ განმუხურის პატრიოტულ ბანაკთან დაკავშირებით საჭიროა გაიმართოს კონსულტაციები შესაბამის უწყებებთან“, კონსულტაციების გამართვის შესახებ რაიმე დოკუმენტი სახელმწიფო აუდიტის სამსახურში ვერ წარადგინეს.
ასევე, ინვენტარიზაციის მასალებში არ რის დაფიქსირებული ანაკლიის და სქურის ბანაკების 5 ერთეული კოტეჯის დაშლილის და დაშლილი მასალისგან აშენებული ერთი ახალი კოტეჯის არსებობის ფაქტი.
