"საყდრისის გადარჩენის საზოგადოებრივმა კომიტეტის" წევრის, ირაკლი მამალაძის ინფორმაციით, კომიტეტმა მიიღო ინფორმაცია, რომ საყდრის-ყაჩაღიანზე ერთ-ერთი აფეთქების შემდეგ გამოჩნდა არტეფაქტები, მაგრამ ეს ფაქტი არ გახმაურებულა.
_ ამ ინფორმაციის გადამოწმებისთვის ვეცადეთ დაკავშირებას RMG Gold-ის საზოგადოებასთან ურთიერთობის სამსახურის უფროს ნიკოლოზ კარიჭაშვილთან, მაგრამ მან ჩვენს სატელეფონო ზარებს არ უპასუხა.
კვირას, 8 თებერვალს, კომიტეტის რამდენიმე წევრი საყდრისში გაემგზავრა ამ საკითხის ადგილზე გასარკვევად, მაგრამ ისინი ბორცვზე მყოფმა პირებმა ამ ტერიტორიას ახლოს არ მიაკარეს, სურათების გადაღებაც აუკრძალეს. მიუხედავად მოთხოვნისა, ვერ მოხერხდა აგრეთვე შეხვედრა და გასაუბრება არქეოლოგთან, რომელიც კანონის მიხედვით უნდა აკვირდებოდეს საყდრისის ნგრევით სამუშაოებს. ადგილზე მომუშავე ორმა არაფხიზელ მდგომარეობაში მყოფმა პირმა შეურაცხყოფაც კი მიაყენა კომიტეტის წევრებს.
ჩვენი მცდელობა, მიღებული ინფორმაცია ადგილზე გადაგვემოწმებინა, უშედეგოდ დამთავრდა.
ამიტომ, სატელევიზიო ეთერით მოვუწოდეთ შესაბამის სტრუქტურებს, რომ გადაემოწმებინათ ამ ფაქტის სისწორე და მოვითხოვეთ ობიექტზე დაეშვათ კომპეტენტური არქეოლოგები მონიტორინგისთვის.
"ძეგლთა დაცვის სააგენტოს" მივმართეთ წერილობით, რომ მან მოგვაწოდოს საყდრისზე მომუშავე არქეოლოგიური მონიტორინგის ოქმების ასლები. კომპეტენტურმა არქეოლოგებმა საუბრისას დაგვიდასტურეს, რომ საყდრის-ყაჩაღიანი არქეოლოგიურად ბოლომდე შესწავლილი არ არის.
რა გასაკვირია, რომ არქეოლოგიური ობიექტების ნგრევას თან მოჰყვეს არტეფაქტების აღმოჩენა?! _ აღნიშნა გურია ნიუსთან" საუბრისას მამალაძემ.
"არემჯიში" კი აცხადებენ, რომ "საყდრისის გადარჩენის კომიტეტმა" ცრუ ინფორმაცია გაავრცელა:
_ ბოლო დღეების განმავლობაში მედიაში აქტიურად ხდება "საყდრისის გადარჩენის კომიტეტის“ ცალკეული წევრების მიერ (კერძოდ: ნინო ბურჭულაძე, ირაკლი მამალაძე) მორიგი ტყუილისა და პროვოკაციის ტირაჟირება, რომლის მიზანიც კომპანია “არემჯის“ მიერ ყაჩაღიანის №1 უბანზე სამუშაოების შეჩერება და საზოგადოებაში ხელახალი ვნებათაღელვის გამოწვევაა.
კომიტეტის წევრები აცხადებენ, რომ თითქოს ყაჩაღიანის უბანზე მიმდინარე სამუშაოებისას ადგილზე „ამოიყარა მნიშვნელოვანი არტეფაქტები, რომლებიც სადღაც გადამალეს“.
ხაზგასმით გვინდა აღვნოშნოთ, რომ ეს არის ცრუ, სრულიად დაუსაბუთებელი ინფორმაცია, რომელიც ჩრდილს აყენებს კომპანიას და მის რეპუტაციას.
მოვითხოვთ, კომიტეტის წევრებმა დაასახელონ კონკრეტული პირები და წარმოადგინონ უტყუარი ფაქტები, რომელზე დაყრდნობითაც ვრცელდება მსგავსი უსაფუძვლო ბრალდებები. იმ შემთხვევაში, თუ უახლოეს დღეებში არ მოხდება ზემოაღნიშნული მტკიცებულებების წარმოდგენა, გვაქვს ყველანაირი საფუძველი ვივარაუდოდ, რომ „საყდრისის გადარჩენის კომიტეტი“, "ნაციონალურ მოძრაობასთან“ ერთად, რომელიც პარალელურ რეჟიმში ყაჩაღიანის უბანზე სამუშაოების შეჩერების მოწოდებით გამოდის, ახდენს ცრუ ინფორმაციის ტირაჟირებას, რომელიც მიმართულია კომპანია "არემჯის“, ბოლნისის რაიონის და მთლიანად რეგიონის წინააღმდეგ და მიზნად ისახავს კომპანიის საქმიანობის შეფერხებას.
კომპანია „არემჯი“ კიდევ ერთხელ აცხადებს, რომ 2014 წლის 13 დეკემბრიდან, ყაჩაღიანის №1 უბანზე სამუშაოებს ახორციელებს კანონის სრული დაცვით, შესაბამისი ბრძანებების და ნებართვების საფუძველზე.
გვსურს აღვნიშნოთ, რომ ადგილზე სამუშაოების დაწყების დღიდან, საქართველოს კულტურისა და ძეგლთა დაცვის სამინისტროსა და კულტურული მემკვიდრეობის დაცვის ეროვნული სააგენტოს მიერ არაერთხელ განხორციელდა მონიტორინგი. ჩვენი ინფორმაციით, ზემოთხსენებული მონიტორინგის დროს მათ მიერ არანაირი არქეოლოგიური მასალის არსებობა არ დაფიქსირებულა _ აღნიშნულია ორგანიზაციის მიერ ოფიციალურად გავრცელებულ განცხადებაში.
