მთავრობამ რძისა და რძის პროდუქტების შესახებ რეგლამენტი დაამტკიცა, რომელიც პირველი აგვისტოდან შევა ძალაში.
"ეს არის უმნიშვნელოვანესი მიმართულება. ძალიან ბევრი მომხმარებელი დიდი ხნის განმავლობაში საკმაოდ სამართლიანად აპროტესტებდა აღნიშნული რეგლამენტის არქონას. ეს არის მნიშვნელოვანი იმისთვის, რომ მომხმარებელმა იცოდეს რას მიირთმევს და ეტიკეტირება იყოს სრულფასოვნად დაცული", – განაცხადა სოფლის მეურნეობის მინისტრმა ოთარ დანელიამ.
რეგლამენტის შესაბამისად, ბიზნესოპერატორმა, რომელიც ეწევა რძის პირველად წარმოებას, უნდა უზრუნველყოს, რომ ნედლი რძე მიღებული იყოს იმ ცხოველისაგან რომელსაც არ აღენიშნება ადამიანისათვის რძით გადამდები ინფექციური დაავადებების სიმპტომები, არ აღენიშნება ისეთი დაავადების სიმპტომები, რომლებმაც შეიძლება გამოიწვიოს რძის დაბინძურება, რამაც შესაძლებელია უარყოფითი გავლენა მოახდინოს რძის უვნებლობაზე.
ამასთან დაწესებულია ჰიგიენური მოთხოვნები ნედლი რძის წარმოებისათვის კერძოდ, რძის საწველი საშუალებები, წარმოების ადგილი, სადაც ხდება რძის შენახვა, დამუშავება ან გაგრილება, უნდა იყოს მოწყობილი იმგვარად, რომ მინიმუმამდე შემცირდეს რძის დაბინძურების რისკი, ადგილი, რომელიც გამოიყენება რძის შესანახად, უნდა იყოს მავნებლებისაგან დაცული, ცხოველის სადგომისაგან გამოცალკევებული, აღჭურვილი შესაბამისი რძის გასაცივებელი საშუალებებით.
პროექტით, ასევე დადგენილია ის მოთხოვნები, რომლითაც უნდა მოხდეს რძისა და რძის ნაწარმის იდენტიფიცირება.
რძის, რძის ნაწარმისა და რძის შემცველი პროდუქტების წინამდებარე ტექნიკურ რეგლამენტთან შესაბამისობის შეფასებას განახორციელებს სსიპ – სურსათის ეროვნული სააგენტო სახელმწიფო კონტროლის დროს და ბიზნესოპერატორი შიდა საწარმოო კონტროლის დროს.
აღსანიშნავია ის გარემოებაც, რომ პროექტი ძალაში შედის 2015 წლის პირველი აგვისტოდან.
დადგენილებით განსაზღვრული მოთხოვნა, იმასთან დაკავშირებით, რომ მაწვნის წარმოებისთვის ნებადართულია საქართველოს ტერიტორიულ სივრცეში გამოყოფილი ადგილობრივი რძემჟავა ბაქტერიების შტამებისგან შემდგარი დედო, ამოქმედდება 2019 წლის პირველი იანვრიდან. აღნიშნული განპირობებულია იმ გარემოებით, რომ არ დაზარალდეს ბიზნეს გარემო და ბიზნესოპერატორებს მიეცეთ გონივრული ვადა, შეასრულონ ამ ტექნიკური რეგლამენტით დადგენილი მოთხოვნები.
სოფლის მეურნეობის სამინისტროს განცხადებით, დადგენილების პროექტით უზრუნველყოფილი იქნება რძისა და რძის ნაწარმის, რძის შემცველი პროდუქტის წარმოების, გადამუშავების, დისტრიბუციის ეტაპებზე რეგულირების ერთიანი პრინციპების დანერგვა, რაც უზრუნველყოფს მომხმარებლის უფლებების და ბიზნეოპერატორის ინტერესების დაცვას. ამასთან, იმ ბიზნეოპერატორებს რომლებიც დღეს აწარმოებენ რძეს და რძის ნაწარმს, რომელიც არ შეესაბამება ამ ტექნიკური რეგლამენტის მოთხოვნებს, უფლება ექნებათ გააგრძელონ ამ პროდუქციის წარმოება ეტიკეტზე შესაბამისი ინფორმაციის განთავსებით, რაც შეეხება რძის შემცველი პროდუქტების ეტიკეტს, მასზე ვერ მოხდება დასახელებების – არაჟანი, მაწონი, ხაჭო, ყველი და სხვა/ ასეთ პროდუქციას დასახელება უნდა შეეცვალოს.
სოფლის მეურნეობისა და სურსათის დეპარტამენტის უფროსის მოადგილე, ქეთი ლაფერაშვილი აღნიშნავს, რომ რეგლამენტის შესრულება ყველა რძის პროდუქტის მწარმოებლისთვის სავალდებულო გახდება:
„ამ რეგლამენტით დარეგულირდება ამ სფეროში არსებული პრობლემები. არ მინდა, ვთქვა, რომ ბიზნესი არაკეთილსინდისიერად იქცეოდა და აწერდა იმას, რისი შემცველიც არ იყო პროდუქცია, მაგრამ ამ ახალი რეგლამენტით აიკრძალება რომ დაეწეროს რძის ნაწარმი პროდუქციას, თუ არ არის მისი შემცველი. ჩვენ ყველანი ვართ მომხმარებლები და უნდა ვიცოდეთ, რას ვყიდულობთ. პროდუქტი, რომელიც ბაზარზე განთავსდება უნდა იყოს უვნებელი“.
ლაფერაშვილის თქმით, რძის რეგლამენტი ოჯახურ წარმოებას არ შეეხება. 2020 წლამდე ოჯახური წარმოება განთავსუფლებულია სახელმწიფო კონტროლისგან, თუმცა სურსათის დეპარტამენტის უფროსის მოადგილის განცხადებით, ეს იმას არ ნიშნავს, რომ მწარმოებლებმა არაჰიგიენურ პირობებში დაამზადონ რძის პროდუქცია.
