ირაკლი ღარიბაშვილის თქმით უკვე დაიწყო მნიშვნელოვანი პროექტის განხორციელება სოფლის მეურნეობის მიმართულებით.
_ ეს პროექტი მიზნად ისახავს ჩვენს ქვეყანაში სასოფლო-სამეურნეო მიწების მაქსიმალურად ათვისებას და მიზნობრივად გამოყენებას. პროექტი ითვალისწინებს ორ კომპონენტს – ერთი გახლავთ მრავალწლიანი კულტურების ბაღების გაშენება, ხოლო მეორე – სანეგრე მეურნეობების მოწყობა.
დარწმუნებული ვარ, რომ ეს იქნება კიდევ ერთი წარმატებული პროექტი, რომელიც ხელს შეუწყობს სოფლის მეურნეობის განვითარებას და საშუალებას მისცემს ჩვენს მეწარმეებს და ფერმერებს აწარმოონ ისეთი ხარისხის პროდუქცია, რომელიც ადგილობრივ ბაზარზე თამამად გაუწევს კონკურენციას იმპორტირებულ პროდუქციას, _ განაცხადა ღარიბაშვილმა.
პრემიერ-მინისტრის თქმით, ამასთან ერთად "გაიზრდება ჩვენი ქვეყნის აგრარული პროდუქციის საექსპორტო პოტენციალი:
_ მოგეხსენებათ, რომ საქართველოსთვის უკვე გაიხსნა ევროპის 500-მილიონიანი ბაზარი და სულ უფრო მეტი შესაძლებლობები ჩნდება იმისათვის, რომ ხარისხიანმა ქართულმა პროდუქციამ საკუთარი ადგილი დაიმკვიდროს ევროპის ბაზარზე.
ჩვენ მიერ გატარებული აგრარული პოლიტიკის ეფექტიანობაზე მეტყველებს ის, რომ წარმატებით ხორციელდება შეღავათიანი აგროკრედიტის პროექტი, გადამამუშავებელი საწარმოების თანადაფინანსების პროექტი და პროგრამა „აწარმოე საქართველოში“. სახელმწიფოს მხარდაჭერით, უკვე შეიქმნა 105 ახალი საწარმო, ხოლო გადაიარაღდა და გაფართოვდა 580-ზე მეტი საწარმო.
უკვე მესამე წელია 800 ათასი ფერმერი სახელმწიფოსგან იღებს დახმარებას. წლების განმავლობაში დაუმუშავებელ მიწებს სასოფლო-სამეურნეო დანიშნულება დაუბრუნდა" _ აღნიშნა ღარიბაშვილმა.
პრემიერ-მინისტრის ინფორმაციით მცირემიწიან ფერმერთა საგაზაფხულო პროგრამის ფარგლებში გლეხებმა უსასყიდლოდ მიიღეს 107 605 506 ლარის ღირებულების სასუქი, 47 835 368 ლარის ღირებულების შხამქიმიკატები, 8 579 187 ლარის ღირებულების თესლი, 53 704 193 ლარის ღირებულების ინვენტარი, 232,486 ლარის ღირებულების ვეტ.პრეპარატები.
_ მინდა გითხრათ, რომ სახელმწიფოს ხელშეწყობით ამუშავებული 105 საწარმოდან 18 ხილის გადამმუშავებელი საწარმოა. „შეღავათიანი აგროკრედიტის“ და „გადამმუშავებელი საწარმოების თანადაფინანსების“ პროექტების ფარგლებში მათ 11 863 752 ლარის სესხი შეღავათიანი პირობებით აიღეს. სოფლის მეურნეობაში დაფინანსებულ საწარმოებში უკვე შეიქმნა 10 ათასზე მეტი სამუშაო ადგილი, _ აღნიშნა ღარიბაშვილმა.
მთავრობის მეთაურის განცხადებით ორი წლის განმავლობაში სახელმწიფო სუბსიდიის დახმარებით გლეხებისგან უკვე შესყიდულია 218 ტონა ყურძენი და მევენახეებმა 2 წლის მანძილზე შემოსავლების სახით მიიღეს 289 მლნ ლარი).
_ კიდევ ერთი დაპირება, რომელიც ჩვენმა გუნდმა მისცა მოსახლეობას და მთავრობა ასრულებს _ 2014 წლის სექტემბრიდან, პირველადსაქართველოში, ფერმერებს საკუთარი მოსავლის დაზღვევის საშუალება მიეცათ. აგროდაზღვევის პროგრამის ფარგლებში, გაიცა 21 ათას 194 სადაზღვევო პოლისი, 18 ათას 664 ჰა მიწის ფართობზე დაზღვეულია 152 მილიონ ლარზე მეტი ღირებულების მოსავალი (აქედან სახელმწიფოს გადასახდელი თანხა შეადგენს 11 მილიონ ლარს).
დავიწყეთ სასოფლო-სამეურნეო კოოპერატივების შექმნა და ხელშეწყობა. დღეისათვის სასოფლო-სამეურნეო კოოპერატივის სტატუსი მინიჭებული აქვს 670 კოოპერატივს, საიდანაც 239 კოოპერატივი მდებარეობს მაღალმთიან რეგიონში. 318 კოოპერატივს უკვე გადაეცა მცირგაბარიტიანი აგროტექნიკის კომპლექტი. ჯამში გაიცემა 1700 აგროკომპლექტი.
მინდა გითხრათ, რომ დამოუკიდებელი საქართველოს ისტორიაში კახეთში პირველად მიმდინარეობს სეტყვის საწინააღმდეგო დანადგარების მონტაჟი. ეს საშუალებას მისცემს ხალხს თავიდან აიცილონ გაზაფხულზე სეტყვისგან მიყენებული ზარალი, _ განაცხადა ირაკლი ღარიბაშვილმა.
