აგრარულ საკითხთა კომიტეტის დღევანდელ სხდომაზე კომიტეტის წევრებმა საქართველოს სოფლის მეურნეობის სამინისტროს მიერ გაწეული საქმიანობის ანგარიშისა და 2015-2020 წლებისათვის საქართველოს სოფლის მეურნეობის განვითარების სამოქმედო გეგმის თაობაზე ინფორმაცია მოისმინეს.
უმაღლესი საკანონმდებლო ორგანოს წევრებს ინფორმაცია თავად სოფლის მეურნეობის მინისტრმა, ოთარ დანელიამ წარუდგინა. მან დეტალურად ისაუბრა სოფლის მეურნეობის სამინისტროს მიერ განხორციელებული, მიმდინარე და დაგეგმილი პროექტების შესახებ, შეაჯამა მიღწევები, რომლებიც სოფლის მეურნეობის დარგში მთავრობის ძალისხმევისა და საერთაშორისო და დონორი ორგანიზაციების ხელშეწყობის შედეგს წარმოადგენს, ასევე ისაუბრა სოფლის მეურნეობის სფეროს ცალკეულ მიმართულებებზე, რომლებშიც გარკვეული სახის პრობლემები, მართალია, დღემდე შემორჩა, მაგრამ საერთო ძალისხმევით მათი დაძლევაც შესაძლებელია.
თავის გამოსვლაში მინისტრმა განსაკუთრებული ყურადღება დაუთმო დეპუტატებისათვის იმ სიახლეების გაცნობას, რომლებსაც სამინისტრო მომავალი ხუთი წლის განმავლობაში – 2015-2020 წლების სამოქმედო პერიოდში გეგმავს. აღსანიშნავია, რომ სამინისტროში პარალელურად დარგის განვითარების 20-წლიან გეგმაზეც მუშაობენ.
როგორც მინისტრმა აღნიშნა, ჩვენისთანა ქვეყნის ეკონომიკისათვის სასიცოცხლოდ მნიშვნელოვანია სოფლის მეურნეობის პოტენციალის მაქსიმალურად ათვისება და მიზნობრივი გამოყენება.
_ დადებითი შედეგის მიღწევის უპირველესი გარანტია იქნება მკაფიოდ განსაზღვრული, კონკურენტუნარიანი წარმოებისკენ მიმართული აგრარული პოლიტიკის შემუშავება და ეკონომიკის ამ სექტორში ფინანსური რესურსების მოზიდვის ხელშეწყობა. ამავე დროს, განსაკუთრებით მნიშვნელოვანია ქვეყნის სასურსათო უსაფრთხოებისა და სურსათის უვნებლობის უზრუნველყოფის საკითხი, _ განაცხადა სოფლის მეურნეობის მინისტრმა.
ოთარ დანელიას განმარტებით, საქართველოს სოფლის მეურნეობის განვითარების სტრატეგიული ხედვა, მდგრადი განვითარების პრინციპებზე დაყრდნობით, სწორედ ისეთი გარემოს შექმნას ითვალისწინებს, რომელმაც აგროსასურსათო სექტორში კონკურენტუნარიანობის ამაღლებას, მაღალხარისხიანი პროდუქციის წარმოების სტაბილურ ზრდას, სასურსათო უსაფრთხოების უზრუნველყოფას, სურსათის უვნებლობასა და სოფლად სიღარიბის დაძლევას უნდა შეუწყოს ხელი.
მინისტრის ინფორმაციით, სოფლის მეურნეობის განვითარების სტრატეგიული ხედვის განსახორციელებლად განსაზღვრულია 7 სტრატეგიული მიმართულება და შესაბამისი ღონისძიებები, რომელთა მიხედვითაც შემუშავდება კონკრეტული სამოქმედო გეგმა _ პრიორიტეტების, განხორციელების ვადების და დაფინანსების წყაროების გათვალისწინებით.
სტრატეგიის ძირითადი მიმართულებებია: აგრარულ სექტორში დასაქმებულთა კონკურენტუნარიანობის ამაღლება; ინსტიტუციური განვითარება; მელიორაცია და ნიადაგის ნაყოფიერება; რეგიონული და დარგობრივი განვითარება – დამატებული ღირებულებების შემქმნელი სრული ციკლის წარმოების განვითარების ხელშეწყობა; სასურსათო უსაფრთხოების უზრუნველყოფა; სურსათის უზრუნველყოფა, ვეტერინარია და მცენარეთა დაცვა; კლიმატის ცვლილებები, გარემო და ბიომრავალფეროვნების შენარჩუნება.
მისივე თქმით, სტრატეგიის განხორციელების პროცესში განსაკუთრებული ყურადღება დაეთმობა რეგიონებისა და მუნიციპალიტეტების ეკონომიკური განვითარების ღონისძიებებს, ინსტიტუციური მოწყობის სრულყოფას, საინფორმაციო-საკონსულტაციო სამსახურების ეფექტიან ფუნქციონირებას, ფერმერთა გადამზადებას საბაზრო ურთიერთობების მოთხოვნების შესაბამისად, სასოფლო-სამეურნეო კოოპერატივების ინტეგრირებულ განვითარებას, სასოფლო-სამეურნეო ინფრასტრუქტურის რეაბილიტაციას, სტატისტიკური აღრიცხვიანობის გაუმჯობესებას, საბაზრო საინფორმაციო სისტემის შექმნას, სასურსათო უსაფრთხოების ანალიზისა და მონიტორინგის ხარისხის გაუმჯობესებას, შესაბამისი მოქნილი საკანონმდებლო ინიციატივების შემუშავებას და განხორციელებას.
სტრატეგია ასევე ითვალისწინებს ევროკავშირთან ღრმა და ყოვლისმომცველი თავისუფალი სავაჭრო სივრცის ფარგლებში აღებული ვალდებულებების შესრულებას, რომელიც საერთაშორისოდ აღიარებულ სტანდარტებსა და ნორმებთან მაქსიმალურ მიახლოებას და წარმოებული პროდუქციის ხარისხის გაუმჯობესებას უზრუნველყოფს.
_ ახალი ხელისუფლების მოსვლის შემდეგ, მხოლოდ ორ წელიწადში, სახელმწიფოს ხელშეწყობით განხორციელდა მთელი რიგი ღონისძიებები და პროექტები, რომელთა მიზანსაც აგრარულ სექტორში დასაქმებულთათვის ფინანსური რესურსების ხელმისაწვდომობა, სოფლის მეურნეობის დარგობრივი განვითარება, ქვეყანაში წარმოებული სოფლის მეურნეობის პროდუქციის ხარისხის გაზრდა, საექსპორტო ბაზრების დივერსიფიკაცია, აგროდაზღვევის სისტემის დანერგვის უზრუნველყოფა წარმოადგენს. განხორციელებულ პროექტთა შორისაა: „მცირემიწიან ფერმერთა საგაზაფხულო სამუშაოების ხელშეწყობის პროექტი“; „შეღავათიანი აგროპროექტის კრედიტი“; აგროდაზღვევის საპილოტე პროგრამა; ყურძნის, ვაშლისა და მანდარინის რეალიზაციის ხელშეწყობის პროექტები; „რძისა და რძის ნაწარმის“ და „თაფლის შესახებ“ ტექნიკური რეგლამენტის შექმნა; სურსათის უვნებლობის კუთხით სახელმწიფო კონტროლის გააქტიურება და სხვა. მნიშვნელოვანია შემდეგი სიახლეც _ შარშან, მთავრობის დადგენილებით, შეიქმნა სოფლის მეურნეობის სამეცნიერო კვლევითი ცენტრი, რომელიც აგრარული სფეროს განვითარების პლაცდარმი უნდა გახდეს. სამინისტროს სისტემაში შეიქმნა დარგობრივი განვითარების 18 მუდმივი სამუშაო ჯგუფი სამეცნიერო და ბიზნეს წრეების წარმომადგენელთა მონაწილეობით, მუშაობა მიმდინარეობს 59 მუნიციპალური განვითარების გეგმაზე. მნიშვნელოვნად იზრდება ექსპორტ-იმპორტის მაჩვენებელი და საერთაშორისო კავშირები ევროკავშირის ქვეყნებიდან ჩინეთსა და იაპონიამდე. მინისტრის განცხადებით, ამ ყველაფრის მიღმა კი მთავარი ისაა, რომ გლეხს, ფერმერს დაუბრუნდა რწმენა და სჯერათ, რომ სახელმწიფო მათ გვერდით არის, _ აღნიშნა სოფლის მეურნეობის მინისტრმა.
დასასრულს, ოთარ დანელიამ კომიტეტის წევრებისა და სხდომაზე დამსწრე საზოგადოების წარმომადგენლების მრავალრიცხოვან კითხვებს უპასუხა. კითხვების სიმრავლის მიუხედავად, კანონმდებლებმა ერთხმად აღნიშნეს სოფლის მეურნეობის სფეროში, სხვადასხვა დარგების მიმართულებით, მოპოვებული წარმატებები და მიღწევები, და სოფლის მეურნეობის სამინისტროს წარმომადგენლებს გაწეული საქმიანობისათვის მადლობა გადაუხადეს.
აგრარულ საკითხთა კომიტეტის თავმჯდომარე გიგლა აგულაშვილის განცხადებით, სამინისტროსა და კომიტეტის თანამშრომლობა მართლაც რომ სამაგალითოა და მიღწევებიც, შეიძლება ითქვას, რომ საერთოა.
"თამამად შემიძლია ვთქვა, რომ ჩემი გადასახედიდან ჩვენი თანამშრომლობა ყველაზე მეტად წარმატებულია. შეიძლება ამის თაობაზე სხვები უნდა ლაპარაკობდნენ, მაგრამ მაინც მსურს ხაზგასმით აღვნიშნო, რომ ამ დარგში, ამ სფეროში მიღწეული შედეგები ნამდვილად მნიშვნელოვანია და იმის მოლოდინი გვაქვს, რომ ერთობლივი მუშაობით, წინ კიდევ უფრო მეტი წარმატება გველოდება", _ განაცხადა პარლამენტის კომიტეტის თავმჯდომარემ.
კომიტეტის სხდომაზე კანონმდებლებთან ერთად, მიწვეული იყვნენ სოფლის მეურნეობის სამინისტროს, სხვადასხვა საერთაშორისო ორგანიზაციების, სოფლის მეურნეობის სფეროში დასაქმებული არასამთავრობო ორგანიზაციების წარმომადგენლები, ექსპერტები და ფერმერები.
