ლანჩხუთში, ნიგოითის ადმინისტრაციულ ერთეულში მცხოვრებ მარტოხელა პენსიონერი მზევინარ სარჯველაძე სახლის სახურავის ჩამონგრევის საშიშროების წინაშეა. სახლს წლებია სახურავის უმეტესი ნაწილი ისე აქვს დაზიანებული, რომ უამინდობისას სახლშიც წვიმს და თოვს. სახურავი სრულიად დამპალი და გამოუსადეგარია.
ასაკოვანი ქალბატონი ამბობს, რომ მის დასახმარებლად, მუნიციპალიტეტის ძველ და ახალ ხელისუფლებას არაფერი გაუკეთებია.
„ჩემი მეუღლე ცხრა წლის განმავლობაში საწოლზე იწვა, იშემიური ინსულტი ორჯერ ჰქონდა გადატანილი, მერე წოლისაგან სისხლძარღვების შევიწროებაც დაემართა და განგრენა, ცალი ფეხი მუხლს ზევით, ბარძაყის შუაში მოკვეთეს. არავინ არაფრით დამხმარებია, მიუხედავად იმისა, რომ არაერთხელ მიმიმართავს განცხადებით მუნიციპალიტეტის ხელმძღვანელობისთვის, მაშინდელი გამგებლისთვის გია გოუაძისთვის. დღესაც იგივე მდგომარეობაა, გარდა ერთისა, წელიწადნახევრის წინ მეუღლე რომ გარდამეცვალა, სოფლის რწმუნებული ზაზა წულაძე საკუთარი კეთილი ნებით 200 ლარით დამეხმარა.
ამ დღეებში თემის მაჟორიტარს თემურ ალექსაიას შევეხმიანე და უნდა გამოევლო ჩემთან ინფრასტრუქტურის სამსახურის თანამშრომლებთან ერთად. ჩემი ერთადერთი თხოვნაა სახლს სახურავი გამოუცვალონ. არანაირი შემოსავალი მე არ მაქვს, გარდა პენსიისა და 60 ლარიანი სოციალური დახმარებისა. ორი კვირის წინ მუნიციპალიტეტის გამგებელთან ზაზა ურუშაძესთანაც ვიყავი შესული დახმარების სათხოვნელად. შვილები არ გყავსო?- მკითხა ურუშაძემ. კი მყავს ორი ქალიშვილი, თუმცა მათ საკუთარი ოჯახები აქვთ და იმდენი შემოსავალი ნამდვილად არ აქვთ, მე დამეხმარონ. მე გათხოვილ გოგოებს რა უნდა ვთხოვო, ან რად უნდათ ჩემი თხოვნა, საშუალება რომ ჰქონდეთ თავისით არ დამეხმარებოდნენ?!
გულით ავადმყოფი ქალი ვარ, მაღალი წნევები და მწვავე არითმია მაწუხებს, ექიმმა ნესტან სურგულაძემ საავადმყოფოში დაწოლა მირჩია, თუმცა, ჩემი მატერიალური მდგომარეობიდან გამომდინარე უარი ვთქვი", _ ამბობს მზევინარ სარჯველაძე.
მისივე თქმით, „არც წინა და არც ახლანდელ მთავრობას ყურად არ უღია ჩემი თხოვნა და ერთი თეთრის დახმარება არ გაუწევია“.
„წლის დასაწყისში მივიდოდი დახმარების სათხოვნელად, მეუბნებოდნენ არ არის თანხებიო. იგივე პასუხით მისტუმრებდნენ წლის ბოლოსაც. ახლაც ასეა, კაციშვილი ყურადღებას არ მაქცევს. მითხრეს 1000 ლარს მოგცემთ დახმარების სახითო, თუმცა, უარი ვთქვი აღებაზე. რას მიშველის ეს 1000 ლარი, რაში უნდა ვიმყოფინო, ეს თანხა მარტო მოხელეს თუ ეყოფა, დანარჩენი სად ვიშოვო? მე ფულს არ ვითხოვ ჩემთვის, სხვა რამეში დასახარჯად. მოვიდნენ, ადგილზე შეაფასონ ვითარება და ისე გააკეთონ დასკვნები. ყველაფერი დამპალია, სიცარიელისგან სახლი ზანზარებს, ყოველდღე იმის შიშით ვიძინებ და ვიღვიძებ, სახურავი სრულად არ ჩამოინგრეს და შიგ არ მომიყოლოს. კარგად ხედავთ რა მდგომარეობაა ჩემთან. ერთ ოთახში ვარ შეყუჟული, სადაც შედარებით სიმშრალეა, აქაც ჭერზე „ცელოფნები“ მაქვს აკრული, რომ წვიმაში წყალმა არ გამოჟონოს. თუმცა კედლებიდან მაინც ჩამოდის წყალი ხოლმე. ჩემი მეუღლე ცოცხალი რომ იყო, ავადმყოფს ზემოდან „ცელოფნებს“ ვაფარებდი, რომ არ დამსველებოდა. სხვა გამოსავალი რომ ვერ ვნახე, მეზობლის დახმარებით ყველგან ცელოფანი ავაკარი, რომ ავდარში ცოტა სიმშრალე შევინარჩუნო სახლში. ყველაფერი დალპა – ჭერი, იატაკი.
ამ დღეებში პარლამენტის მაჟორიტარ დეპუტატს თემურ ჩხაიძესაც ველაპარაკე, შემთხვევით თემურ ალექსაიას ნაცვლად მასთან დამირეკია. ჩემი გასაჭირი რომ გავაცანი, აქეთ შემომიტია რა პრეტენზიებით მელაპარაკებიო. ვუთხარი, ორი წელია პარლამენტში ზიხარ და ხმა არ ამოგიღია ხალხის გასაჭირზე, შემოტევით აქეთ მიტევ–მეთქი და ტელეფონი გავუთიშე, რა აზრი ჰქონდა მასთან საუბარის გაგრძელებას“, _ უთხრა „გურია ნიუსს“ სარჯველაძემ.
ნიგოითის ადმინისტრაციულ ერთეულში გამგებლის წარმომადგენლის ზაზა წულაძის თქმით, შესაბამის სამსახურებს დავალებული ჰქონდათ არსებული ვითარების შესწავლა, თუ რა მასალებია საჭირო სახურავის აღსადგენად.
მუნიცილაპიტეტის ინფრასტრუქტურისა და არქიტექტურის სამსახურის უფროსი ლევან ჩხაიძე კი ამბობს, რომ ის რამდენჯერმეა ნამყოფი მზევინარ სარჯველაძის ოჯახში და კარგად იცნობს იქ არსებულ მდგომარეობას.
„პირადად მე და ჩემი სამსახურის წარმომადგენლები რამდენჯერმე ვიყავით ქალბატონ მზევინართან მისულები არსებული ვითარების შესასწავლად. მას ჩვენ არაერთხელ შევთავაზეთ სხვადასხვა სახის დახმარება, ვთხოვეთ კიდეც, რომ იქვე მეზობლად ქირით გადავიყვანდით, თუმცა მისგან ამ და ნებისმიერი სხვა სახის შეთავაზებაზე კატეგორიული უარი მივიღეთ. რაც შეეხება სახლის სახურავის შეცვლას იგი დაახლოებით 4-5 ათასი ლარი ჯდება, რისი საშუალებაც ნამდვილად არ აქვს ბიუჯეტს“, – გვითხრა ლევან ჩხაიძემ.
წინა გამგებლი გია გოგუაძე „გურია ნიუსთან“ საუბრისას ამბობს: „რამდენადაც მე მახსოვს, არსებული სახლი ორი ოჯახის კუთვნილებას წარმოადგენდა და ერთი მესაკუთრე იმ დროისთვის საზღვარგარეთ იმყოფებოდა. სწორედ ამ მეწილის იურიდიულად დამოწმებული ნებართვა გვჭირდებოდა, რომ სახლისთვის სახურავი შეგვეცვალა. დეტალები ნამდვილად არ მახსოვს აღმოვუჩინეთ თუა არა ქალბატონს სხვა რაიმე სახის დახმარება ჩვენი ხელისუფლების პირობებში“.
