ლანჩხუთის მუნიციპალიტეტის გამგეობის შიდა აუდიტის სამსახურმა გასული 2014 წლის ანგარიში გაასაჯაროა, რომლის მიხედვითაც ირკვევა, რომ გასულ წელს სამსახურმა განახორციელა ზედამხედველობა და კონტროლი მუნიციპალიტეტის ტერიტორიაზე მიმდინარე ყველა სახის არქიტექტურულ-სამშენებლო, სარეკონსტრუქციო და სარემონტო სამუშაობზე, დადგენილი ორგანიზაციულ-სამართლებრივი წესრიგის დაცვის მიმართებით და ამ კუთხით სამსახურმა შვიდი საჯარიმო ოქმიც დაწერა და ბიუჯეტს ამით 1800 ლარიც შესძინა.
აღნიშნულმა სამსახურმა, წარმოდგენილი ანგარიშის მიხედვით, წერილობითი მითითება და შემოწმების აქტი ხუთ ობიექტზეც დაიწერა, რომლებიც მშენებლობის ნებართვით გათვალისწინებული სტანდარტებს ვერ აკმაყოფილებდნენ. ასევე ზედამხედველობის განყოფილებამ ექსპლუატაციაში ოთხი ობიექტი მიიღო.
აუდიტის სამსახური გასულ წლს ოთხი ა (ა)იპ-ის საქმიანობითაც დაინტერესდა, სადაც სხვადასხვა სახის დარღვევები დააფიქსირა, რაც შემდგომ აისახა კიდეც წარმოდგენილ ანგარიშში.
აუდიტის დასკვნის მიხედვით "ცენტრალურ ბიბლიოთეკაში" დარღვევა იყო ქონების ჩამოწერის აქტში. ქაოსურად მოხდა გაუქმებული ბიბლიოთეკიდან წიგნადი ფონდების სხვა ბიბლიოთეკაზე გადაცემა, რაც არ არის დაფიქსირებული შესაბამისი აქტივებით. ასევე მოუწესრიგებელია ყოფილი საქალაქო ბიბლიოთეკის წიგნადი ფონდების საქმეც, რომელიც ცენტრალური ბიბლიოთეკის ბალანსზეა, თუმცა რეალურად თემურ ფირცხალაიშვილის სახელობის მუზეუმთან არსებულ ბიბლიოთეკისთვისაა გადაცემული. როგორც აუდიტის სამსახურის მიერ წარმოდგენილი ანგარიშით გაირკვა, ცენტრალური ბიბლიოთეკის ადმინისტრაციას არც წიგნადი ფონდის განახლებაზე აქვს ნაზრუნი და ამ მხრივ ორგანიზაციას საკმაოდ მცირე თანხა აქვს გახარჯული.
რაც შეეხება "ტურიზმის განვითარების ცენტრს", აქ აუდიტის სამსახურმა ორგანიზაციის ხელმძღვანელობას საბიუჯეტო თანხების ხშირად არამიზნობრივ გამოყენებაში დასდო ბრალი.
"ცენტრი ფაქტობრივად ვერ ასრულებს მის ფუნქციას, რასაც ადასტურებს ის, რომ ტურიზმიდან შემოსავალი წლების განმავლობაში ნულის ტოლია", – ნათქვამია დასკვნაში.
გასული წლის ზაფხულში გამგეობის აუდიტის სამსახური ა(ა)იპ "ლანჩხუთი სერვისის" საქმიანობითაც დაინტერესდა და აქ გამოვლენილ სხვადასხვა ნაკლოვანებებზე გააკეთა აქცენტი.
კერძოდ, ზედმეტად იყო გახარჯული 5680 ლარი, რაც შემდგომ დაუბრუნდა ორგანიზაციას. ასევე, მოხდა სატვირთო "ფორდ-ტრანზიტის" ორგანიზაციის ბალანსზე აყვანა.
მეოთხე სამსახური, რომლის საქმიანობაც შიდა აუდიტმა შეისწავლა საზოგადოებრივი ჯანდაცვის ცენტრია.
"შემოწმებით გამოვლინდა რიგი ნაკლოვანებები. კერძოდ, თანხების წინასწარ ავანსად ჩარიცხვა, რიგ შემთხვევებში ადგილი ქონდა მომსახურებაზე მიღება-ჩაბარების და შესრულებული სამუშაოების არ არსებობას", – მითითებულია გამგეობის შიდა აუდიტის სამსახურის 2014 წლის ანგარიშში.
