ტემპერატურის მატებასთან ერთად, საზოგადოებისთვის თანდათან უფრო აქტუალური ხდება სამგზავრო მიკროავტობუსებში კონდიციონერების ჩართვის საკითხი.
"გურია ნიუსი" დაინტერესდა თუ რა ვითარებაა ქალაქის მიკროავტობუსებში და რამდენად კომფორტულად გრძნობენ თავს თბილისის მაცხოვრებლები ქალაქში გადაადგილებისას.
ამის გასარკვევად თბილისის ქუჩაში შემთხვევით შერჩევით მოქალაქეები გამოვკითხეთ.
გამოკითხულთა უმეტესობამ აღნიშნა, რომ სულაც არ არის კმაყოფილი ამ სიცხეში იმ სამარშრუტო ტაქსით მგზავრობით, რომელიც მოსახლეობისთვის კარგა ხანია გაძვირდა და ამ სიცხეში კონდიციონერსაც არ რთავენ.
ერთ-ერთი მოქალაქის თქმით, სამარშრუტო ტაქსით საკმაოდ დიდ მანძილზე მგზავრობს, მაგრამ მძღოლი კონდიციონერს, იმის გამო, არ რთავს, რომ მგზავრები ფანჯრებს მაინც აღებენ.
"დიდი მანძილის გავლა მიწევს, ამიტომ სიცხე ძალიან მაწუხებს. რამდენჯერმე მივმართე მძღოლს თხოვნით, რომ კონდიციონერი ჩაერთო, მაგრამ ამაოდ. მხოლოდ ერთმა მძღოლმა ჩართო, თან ბუზღუნებდა. შარშან უფრო იყო კონდიციონერი ჩართული. სხვათაშორის, მძღოლები მგზავრებს აბრალებენ კონდიციონერის ჩაურთველობას, მიუხედავად იმისა, რომ კონდიციონერი ჩართული მაქვს, ფანჯრებს მაინც აღებენო. მართალია, შეუძლიათ მგზავრების გაფრთხილება, მაგრამ, ალბათ, თვითონაც გადაიღალნენ", _ გვითხრა 62 წლის თამარმა.
"მგზავრობა ყოველდღე მიწევს, მაგრამ, სამწუხაროდ, სამარშრუტო ტრანსპორტში კონდიციონერი ჯერ არ არის ჩართული. ამიტომ სიცხე ძალიან მაწუხებს, მითუმეტეს რომ "მარშრუტკით" მგზავრობა უკვე ძვირი სიამოვნება გახდა", _ ამბობს 22 წლის ნინო.
"ყოველდღე ვმგზავრობ რადგან სამსახურში დავდივარ. მართალია დილა საღამოს მიწევს გადაადგილება და სიცხეს დიდად ვერ ვგრძნობ დროის იმ პერიოდში როცა ვმგზავრობ, მაგრამ სხვა მგზავრების ადგილას ვერ წარმომიდგენია თავი. ამ სიცხეში და ესე უსამართლოდ გაძვირებულ სამარშრუტო ტაქსებით შუა დღეს როგორ მგზავრობენ, კონდიციონერის გარეშე, რამდენადაც ვიცი, კონდეციონერს არ რთავენ", _ ამბობს 35 წლის არჩილი.
"თუ მძღოლს არ უთხარი რომ კონდეციონერი ჩართოს, არ რთავს და ამ სიცხეში მოთმენა გვიწევს. თუ მგზავრებმა ძალიან შეაწუხეს მოთხოვნით კონდეციონერის ჩართვას გვამადლიან", _ ამბობს 19 წლის თიკო.
სამარშრუტო ტაქსების მომსახურებით კმაყოფილინ მზგავრების ძალიან მცირე რაოდენობაა. როგორც 32 წლის ნიკამ "გურია ნიუსთან" საუბრისას აღნიშნა, ის სამარშრუტო ტაქსებით მგზავრობის ძალიან კმაყოფილია.
სამარშრუტო ტაქსების მძღოლებთან გასაუბრების შემდეგ გაირკვა, რომ ბევრ სამარშრუტო ტაქსში კონდიციონერი გაფუჭებულია, მიუხედავად იმისა, რომ აკეთებენ, მაინც მალე ფუჭდება. ვიდრე ყველა სამარშრუტო ტაქსში არ შეაკეთებენ კონდიცირების სისტემას, მანამ არ ჩაირთვება. ამ ვადამ კი, შესაძლოა, 1 ივლისამდე გადაიწიოს.
"მანქანამ თავისი რესურსი უკვე ამოწურა და კონდიციონერი ვერ მუშაობს ისე, როგორც უნდა მუშაობდეს, ვერ აგრილებს. სისტემა გაუმართავია, მანქანები გამოსაცვლელი", _ აღნიშნა ერთ-ერთმა მძღოლმა ჩვენთან საუბრისას.
"უმეტეს მანქანებში კონდიცირების სისტემა გაფუჭებულია, არ მუშაობს და როგორ ჩავრთოთ, მიუხედავად იმისა რომ მგზავრები გვთხოვენ. კარგი სპეციალისტები არ არიან საქართველოში და ამიტომ ვერ აკეთებენ ხარისხიანად", _ აცხადებს მეორე სამარშრუტო ტაქსის მძღოლი.
როგორც მძღოლების ნაწილი აღნიშნავს, სამარშრუტო ტაქსები თავიდანვე გაფუჭებული ჩამიყვანეს, საქართველოში კი სისტემის გასამართად კარგი სპეციალისტი არ არის.
"კონდიციონერთან მე როგორც მძღოლს შეხება არ მაქვს. გარაჟში უნდა გააკეთონ, მაგრამ ხარისხიანად ვერ აკეთებენ. გუშინ კი შემიკეთეს, მაგრამ დღეს ისევ გაფუჭდა. როცა გააკეთებენ, მაშინ ჩავრთავ. როგორც ვიცი, მხოლოდ ნახევარია გაკეთებული მთელ ხაზში. 1 ივლისიდან იგეგმება ჩართვა, მაგრამ ვიდრე ყველა სამარშრუტო ტაქსს არ გააკეთებენ, მანამ არ ჩაირთვება. კონდეციონერებმა 1 წელი არ იმუშავა, გაფუჭდა", _ აღნიშნავენ მძღოლები.
კომპანია "თბილისის მიკროავტობუსში" კი განმარტავენ, რომ 24 ივნისიდან ყველა სამარშრუტო მძღოლი გაკონტროლდება და თუ მათ კონდიციონერი ჩართული არ ექნებათ დაჯარიმდებიან.
"კომპანია თბილისის მიკროავტობუსი კატეგორიულად ითხოვს მძღოლებისგან კონდინციონერების ჩართვას. მონიტორინგის ჯგუფი, რომელიც რეგულარულად ამოწმებს მიკროავტობუსებს, ხვალიდან გაასაჯაროებს რეაგირების შედეგებს. იმ შემთხვევაში, თუ შემოვა შეტყობინება, რომ რომელიმე მძღოლი არ რთავს გასაგრილებელ საშუალებას და თუ ეს შეტყობინება დადასტურდება, გატარდება შესაბამისი სანქციები", _ აღნიშნულია განცხადებაში.
როგორც "თბილისის მიკროავტობუსის" განცხადებაშია ნათქვამი პირველ შემთხვევაზე მძღოლს სიტყვიერი გაფრთხილება ეძლევა; მეორე შემთხვევაზე მას ერთი კვირით ეზღუდება სატრანსპორტო საშუალების მართვა; მესამე შემთხვევის დაფიქსირების შემთხვევაში კი, კომპანია მძღოლთან ხელშეკრულებას წყვეტს.
