“ვისწავლეთ ჭკუა და დაპირებებით აღარ ვიკვებებით!”

რამდენიმე წელია, ამ სოფელს უწყლობა და უგზოობა აწუხებს. ამ პრობლემების მოგვარებას მათ როგორც წინა, ასევე ახლანდელი ხელისუფლებაც პირდებოდა, თუმცა, რეალობა უცვლელია. 

როგორც აქაურები ამბობენ, წყალი მხოლოდ რამდენიმე მოსახლეს აქვს, ისიც სოფლის რწმუნებულის ძმის სურვილის შესაბამისად.

გვიყვებიან, რომ წლების წინ, სოფლის მოსახლეობის ნაწილმა საკუთარი სახსრებით წყალი გამოიყვანა, თუმცა, დღეს, სოფლის რწმუნებულის ძმა მათ წყალს არ აძლევს:

_ თვითონ კეტავს ონკანს და თვითონ ხსნის. ამბობს, რომ დებეტი არ ყოფნის წყალს და ყველას ვერ ექნება _ გველეშაპივითაა. რა უფლება აქვს, სოფლის სახელით რომ საუბრობს?! არადა, ამ წყლის გაყვანაში მას არანაირი მონაწილეობა არ მიუღია. უფრო მეტიც _ ეგ და მისი ძმა სოფელში ახლახან, მას შემდეგ ჩამოვიდნენ, რაც რწმუნებულად აირჩიეს და ახლა თავი ყველაფრის ბატონ-პატრონები ჰგონიათ. როგორ შეიძლება ასეთ სიცხეში უწყლოდ ვიყოთ?! _ გვითხრეს ზემოხეთში.

სოფლის რწმუნებულის ოლეგ კაკურიას თქმით, მოსახლეობის პრეტენზიები უსაფუძვლოა:

_ ის ოჯახები, რომლებიც თქვენ გიკავშირდებიან და პრეტენზიებს გამოთქვამენ, სულ მართლები არ არიან. წყალი ოჯახებმა საკუთარი სახსრებით გამოიყვანეს და  ცდილობენ, დაზოგონ. მოილაპარაკეს, რომ დღის ნაწილში სოფლის ერთ მხარეს ექნება წყალი, მეორე ნაწილში _ მეორე მხარეს. რაც შეეხება უწყლოდ დარჩენილებს, მათ ეზოში მილებია გაფუჭებული და ჩვენ ვერაფერს გავხდებით.

_ თქვენ სოფლის რწმუნებული ხართ და მოსახლეობის პრობლემის მოგვარებისთვის რაიმე ხომ უნდა გააკეთოთ?

_ რა უნდა გავაკეთოთ? სხვის ეზოში წყალს ჩვენ ვერ გავაკეთებთ. გამგებელიც ჩავაყენე საქმის კურსში, მაგრამ იმანაც რა ქნას? იურიდიულად კერძო მოსახლეს ვერაფერს გავუკეთებთ. მხოლოდ ერთჯერადი დახმარების გაცემა შეიძლება და ისიც იმ შემთხვევაში, თუ ამის დასაბუთებული საჭიროებაა. რაც შეეხება ჩემს თანამდებობას, უკვე აღარ ვარ რწმუნებული. გუშინ (საუბარი ჩაწერილია 21 აგვისტოს) დავწერე განცხადება და თანამდებობა დავტოვე _ თბილისში გადავდივარ უფრო მაღალანაზღაურებად სამსახურში.

_ წასვლამდე იქნებ გვითხრათ, თქვენი ძმა რა უფლებამოსილი პირია, რომ წყალს ანაწილებს და როგორც მოსახლეობა გვეუბნება, თავად წყვეტს ვის ეკუთვნის წყალი და ვის _ არა?

_ ჩემს ძმას ონკანის გაღება და დაკეტვა კი არ უხარია! ეს გადაწყდა სოფელში, მოსახლეობასთან შეთანხმებით. როგორც გითხარით, გვალვების გამო, წყლის დებეტი ცოტაა და ვცდილობთ გავანაწილოთ, _ განმარტა კაკურიამ.

აღსანიშნავია, რომ ზემოხეთში უწყლობა მხოლოდ რამდენიმე ოჯახს არ აწუხებს. ეს თითქმის მთელი სოფლის პრობლემაა. როგორც სოფლის მაცხოვრებლები ამბობენ, თუ სასწრაფოდ არ მოგვარდება უწყლობისა და უგზოობის პრობლემა, სხვა გზებს მიმართავენ და აქციებსაც არ გამორიცხავენ. ზემოხეთელები აღნიშნავენ, რომ ისინი ხელისუფლებამ არჩევნების შემდეგ უყურადღებოდ მიატოვა და მათი ბედი არავის აინტერესებს:

_ მალე მოვა არჩევნები და მოვლენ, ხმა მოგვეცითო. რას წაიღებენ აქედან, კარგად დავანახებთ. ვისწავლეთ ჭკუა და დაპირებებით არ ვიკვებებით, _ გვითხრეს ზემოხეთელებმა.

ჩოხატაურის გამგებელი ირაკლი კუჭავა ამბობს, რომ წყლის დებეტის მკვეთრი შემცირება გვალვებმა გამოიწვია:

_ გვალვების გამო წყლის მიწოდების პრობლემა იმ სოფლებსა და უბნებშიც შეიქნა, სადაც ადრე არ უჩიოდნენ, მათ შორის, ზემოხეთშიც. 

შიდა გზების მოწესრიგება, სოფლის დახმარების პროგრამის ფარგლებში მალე დაიწყება. სხვა სოფლებისგან განსხვავებით, ზემოხეთში სამუშაოების დაწყების გაჭიანურება ინდმეწარმის დროულად ვერშერჩევამ გამოიწვია, _ გვითხრა კუჭავამ.