თბილისში, 13 ივნისის ღამეს მომხდარი სტიქიისას, 194 ოჯახი და 800-ზე მეტი ფიზიკური პირი დაზარალდა, რომელთა ნაწილს საკომპენსაციო თანხები უკვე გადარიცხული აქვს. ამის შესახებ თბილისის მერის მოადგილემ, ირაკლი ლექვინაძემ სოციალური პასუხისმგებლობის კლუბის წევრებთან შეხვედრაზე განაცხადა, სადაც მან სტიქიის შედეგების პრეზენტაცია გამართა.
როგორც ლექვინაძემ აღნიშნა, მთლიანობაში, მსოფლიო ბანკისა და რამდენიმე საერთაშორისო ორგანიზაციის შეფასებით, საერთო ზარალი, რომელიც საქართველომ სტიქიისას მიიღო, 100 მილიონ ლარზე მეტია.
"საერთო ჯამში, შემოწირული თანხების ოდენობა 24 მილიონ ლარამდეა. აქედან 21 719 263 ლარი კერძო კომპანიების შემოწირულობებია, 2 767 993 ლარი კი, მოქალაქეებისგან შემოწირული. დახმარებები 1000-მდე კომპანიისა და კერძო პირისგან მივიღეთ. მათ მიერ შემოწირული თანხები კი, დაზარალებული მოქალაქეების საცხოვრისით უზრუნველყოფას, დაზიანებული საცხოვრებლების რეაბილიტაციას და დაზარალებულთათვის პირველადი ნივთების შესაძენად კომპენსაციების გაცემისთვის", _ აღნიშნა ლექვინაძემ და დასძინა, რომ თანხების ნაწილი უკვე ათვისებულია.
გარდა ამისა, დედაქალაქის მერის მოადგილემ პრეზენტაციისას განაცხადა, რომ ფულადი დახმარებების გარდა რამდენიმე ქვეყნის დიასპორამ ტვირთები გამოგზავნა.
"ამერიკის შეერთებულმა შტატებმა, ავსტრიამ, უკრაინამ, პოლონეთმა, თურქეთმა, ისრაელმა და ჩეხეთმა გამოგზავნა ტვირთები, რომელთა გადანაწილებაც დღემდე გრძელდება", _ აღნიშნა ლექვინაძემ.
მისივე თქმით, სტიქიის სალიკვიდაციოდ, მთავრობის სარეზერვო ფონდიდან 1 557 000 ლარი გამოიყო, პრეზიდენტის ფონდიდან – 2 000 000 ლარი, რეგიონებში განხორციელებული პროექტების ფონდიდან – 27 800 000 ლარი, მერიის სარეზერვო ფონდიდან – 356 729 ლარი, უცხო სახელმწიფოთა მთავრობებისგან კი, 495 616 ლარი შემოვიდა, ბიუჯეტის ქვეპროგრამებში მოძიებულმა თანხამ კი, 2 651 000 ლარი შეადგინა.
ლექვინაძის განმარტებით, მოძიებული თანხებიდან, 18 779 600 ლარი დაზარალებულთა ბინებით უზრუნველყოფას მოხმარდა; 2 150 000 ლარი ეკოლოგიისა და გამწვანების საქალაქო სამსახურს გადაეცა, 25 285 000 ლარი კი, კეთილმოწყობის საქალაქო სამსახურისთვის გამოიყო.
მისივე თქმით, თბილისში 13 ივნისს მომხდარმა სტიქიამ 194 ოჯახი და 800-ზე მეტი ფიზიკური პირი დააზარალა. დაზარალებული ოჯახების დიდი ნაწილი ფართების მესაკუთრე იყო, თუმცა, ნაწილი ადგილზე ფართების მფლობელები არ იყვნენ.
მისივე თქმით, ის ადამიანები, რომლებიც არ იყვნენ ქონების მფლობელები სტიქიის ზონაში, არ ექვემდებარებოდნენ მართლზომიერ ლეგალიზაციას, დონორი და კერძო კომპანიების დახმარებით საცხოვრისით მაინც დაკმაყოფილდნენ.
"ასეთი იყო 17 ოჯახი, რომელთა სიაც გადავეცით კერძო კომპანიებსა და დონორებს. მათ თვითონ შეარჩიეს ბინები მათთან ერთად და ამ ადამიანებისთვისაც განხორციელდა საცხოვრისით უზრუნველყოფა", _ განაცხადა ლექვინაძემ.
"ლეგალიზებული იყო 152 სახლი, არალეგალიზებული 42. სრულად კი, 52 სახლია დანგრეული. აქედან, 21 ოჯახს ბინა უკვე აქვს, 15 ოჯახთან კი გაფორმებულია ხელშეკრულება და როგორც კი ისინი ბინას შეარჩევენ, თანხას გადავურიცხავთ", _ აღნიშნა ლექვინაძემ და დასძინა, რომ სტიქიისას დაზარალებულთა ოჯახების 14 % სოციალურ დახმარებას იღებდა.
"არ შემიძლია არ აღვნიშნო წითელი ჯვრის დახმარება, რომლითაც შევძელით თითოეული დაზარალებულისთვის საჭიროების კვლევა ჩაგვეტარებინა. მათი მხარდაჭერით დღესაც გრძელდება ტვირთების და ნივთების განაწილება.
რომ არ ყოფილიყო დონორების მახარდაჭერა, ჩვენ ვერ შევძლებდით დაზარალებულებისთვის საცხოვრისით უზრუნველყოფის ხარჯების გაღებას. რადგან კანონმდებლობა ითვალისწინებს მხოლოდ 22-ათასლარიანი დახმარებას ერთჯერადი კომპენსაციის სახით და ამის იქეთ კანონმდებლობა დახმარების საშუალებას არ გვაძლევდა, თუმცა, შემოწირულობებმა მოგვცა საშუალება, რომ საცხოვრისით უზრუნველყოფისთვის მიგვეღო სპეციალური წესი, რომელიც ქართულ რეალობაში უპრეცედენტოა. ის ყველა დაზარალებულს აძლევდა საშუალებას, რომ თვითონ გაეკეთებინა არჩევანი, რა მიმართულებით სურდა წინადადების შერჩევა, რომელიც მისთვის მომგებიანი იყო. საუბარია ორ ძირითად მიმართულებაზე – სულადობის მიხედვით იყო შეფასებული და განსაზღვრული კონკრეტული ფართის რაოდენობა, იმ ტერიტორიაზე არსებული საბაზრო ფასის ადეკვატურად და მეორე – სტიქიის ზონაში, სტიქიამდე შეფასებული საბაზრო ფასების მიხედვით დაკმაყოფილებულიყვნენ დაზარალებულები საცხოვრებელი ფართებით", _ აღნიშნა ლექვინაძემ.
გარდა ამისა, მერის მოადგილემ აღნიშნა, რომ ერთჯერადი 500-ლარიანი დახმარება თითქმის ყველა ოჯახმა მიიღო. ასევე დაზარალებულებმა მიიღეს კომპენსაციები პირველადი ნივთების შესაძენადაც.
"პაკეტების მიხედვით გვაქვს დაყოფილი ტექნიკის, ავეჯისა და სხვა საჭირო ნივთების ჩამონათვალი. 11 500 ლარამდე, იმ ადამიანებმა ვინც მიიღო საცხოვრისით უზრუნველყოფისთვის თანხა, დამატებით მიეცათ ამ მოცულობის საკომპენსაციო თანხები.
გარდა ამისა, ყველა გარდაცვლილის სარიტუალო მომსახურება მერიამ საკუთარ თავზე აიღო. მათ ოჯახებს იკი, დაახლოებით 10 000-ლარიანი დახმარებები გადაეცათ. გარდა ამისა, ვფიქრობთ, დამატებითი რესურსები მივმართოთ ამ ადამიანების ოჯახებისთვის – მათი ოჯახის წევრებისა და შვილების დასაქმების და სწავლების მიმართულებით გარკვეული კონტრიბუცია გავიღოთ", _ განაცხადა ლექვინაძემ .
