"საქალაქო სასამართლო, ტრადიციულად აკეთებდა ხოლმე გარკვეულ განცხადებებს რეზონანსულ საქმეებთან დაკავშირებით და არასდროს არ ყოფილა იმის ეჭვი, რომ რომელიმე მოსამართლე, რაიმე განმარტებებისთვის იყო დაბარებული" _ ასე გამოეხმაურია გადაცემა "2030'_ში სტუმრობისას უზანაესი სასამართლოს თავმჯდომარე ნინო გვენეტაძე იუსტიციის უმაღლესი საბჭოს წევრების საყვედურებს, რომელემიც მიიჩნევენ, რომ მოსამართლე ურთმელიძე გვენეტაძეს არ უნდა დაებარებინა:
_ როცა ამ საქმეზე სასამართლოს პირველი გადაწყვეტილების შესახებ გახდა ცნობილი, კომუნიკაცია გვქონდა საქალაქო სასამართლოს თავმჯდომრესთან, მაგრამ ის იმყოფებოდა მივლინებაში. შესაბამისად, ის საზოგადოებრივი ინტერესი რაც იმ დროს გაჩნდა, ვერ დაკმაყოფილდა.
ამის მერე მის მოადგილესთან _ ებანოიძესთან დავამყარეთ კომუნიკაცია და ვთხოვეთ, მაღალი საზოგადოებრივი ინტერესის გამო, "რუსთავი 2"-ის საქმეზე გამოტანილ გადაწყვეტილებასთან მიმართებაში გაკეთებულიყო განცხადება და განმარტება საზოგადოებისთვის მნიშვნელოვან საკითხებზე.
ამ შემთხვევაშიც ჩვენ ვერ მივიღეთ ებანოიძისგან პოზიცია. მან მითხრა, რომ კომუნკაციაში შევიდოდა საქალაქო სასამართლოს თავმჯდომარესთან და ამის მერე გამოჩნდებოდა მათი გადაწყვეტილების შესახებ. ასევე კომუნიკაცია გვქონდა სასამართლოს მენეჯერთან, მაგრამ განცხადების გაკეთებაზე მანაც უარი განაცხადა და თქვა, ასეთი დავალება თავმჯდომარისგან არ მიმიღიაო.
6 ნოემბერს კომუნიკაცია გვქონდა სასამართლოს თავმჯდომარის მოვალეობის შემსრულებელთან და აქ უკვე იყო კითხვა _ ჩემთვის საკმაოდ მოულოდნელი, იმასთან დაკავშირებით, რომ აინტერესებდათ, რა ტიპის განცხადებაზე იყო საუბარი.
ჩვენ დავაკონკრეტეთ და ვთქვით, რომ ვსაუბრობდით იმ ტრადიციულ განცხადებაზე, რომელიც ყველა რეზონანსულ საქმესთან დაკავშირებით კეთდება ხოლმე სასამართლოს მხრიდან. ამის მერე მათგან რაიმე გამოხმაურება არ გვქონია.
მე, ჩემი გადაწყვეტილებით, კომუნიკაცია ვაწარმოე ბატონ ურთმელიძესთან და შევთავაზე მას, თუ ჰქონდა რაიმე ინტერესი და სურვილი, მობრძანებულიყო იუსტიციის საბჭოს ტრადიციულ სხდომაზე და საბჭოს წევრებთან შედგებოდა მისი კომუნიკაცია, რაც არ გულისხმობდა მოსამართლის მხრიდან რაიმე ანგარიშის მოსმენას.
კითხვები უკავშირდებოდა იმ მენეჯერულ და ადმინისტრაციულ პროცედურებს, რომელიც შეეხებოდა ასევე იმ სავარაუდო ზეწოლებს, რომელიც შეიძლებოდა ყოფილიყო განხორციელებული მოსამართლის მიმართ.
მან ამ საკითხთან დაკავშირებით ითხოვა დრო. დღის დასასრულს კი, დაახლოებით 6 საათზე დააფიქსირა მოსაზრება, რომ ის აპირებდა იუსტიციის საბჭოზე მოსვლას.
9 ნოემბერს, საბჭოს სხდომის დაწყებამდე, სადაც მობილიზებული იყო მედიის დიდი ჯგუფი, ურთმელიძემ გამოგზავნა განცხადება და ბრძანა, რომ შესაძლოა, მისი მოსვლა საბჭოზე აღქმულიყო ანგარიშის ჩაბარების მცდელობად, ამიტომ სხდომაზე არ გამოცხადდა.
ამ შემთხვევაში საბჭოს სხდომა საკმაოდ დაძაბულ რეჟიმში წარიმართა და ძირითადად ბრალდებები იყო ჩემი მიმართულებით. თუმცა, შევეცადე ერთხელ კიდევ ამეხსნა მიზანი, რომელიც არამცდაარამც არ იყო მისი ანგარიშის მოსმენა, არამედ იყო მოსამართლის მხარდაჭერა, _ განაცხადა გვენეტაძემ ტელეკომპანია GDS-ის ეთერში.
