ლანჩხუთის მუნიციპალიტეტის საკრებულოს სივრცით-ტერიტორიული დაგეგმარებისა და ინფრასტრუქტურის კომისიის სხდომაზე კომისიის წევრმა დეპუტატებმა, გამგეობის ინფრასტრუქტურისა და არქიტექტურის სამსახურის 9 თვის ანგარიში მოისმინეს, რომელიც მათ სამსახურის უფროსმა ლევან ჩხაიძემ გააცნო.
"ურბანიზაციის და არქიტექტურის განყოფილების მიერ 9 თვის განმავლობაში გაცემულია 7 ნებართვა, შეთანხმდა 8 პროექტი, ექსპლოატაციაში შესულია 12 ობიექტი. ამავე განყოფილებიდან მუნიციპალიტეტის ბიუჯეტში მოსაკრებლის სახით შემოვიდა 7 988 ლარი.
საპროექტო განყოფილებამ საანგარიშო პერიოდში დააპროექტა 211 ობიექტი, რომლის საერთო ღირებულება 2 979 298 ლარია; აქედან, სოფლის მხარდაჭერის პროექტით გათვალისწინებული 147 ობიექტი 817 447 ლარის ღირებულებით, სხვადასხვა პროგრამით გათვალისწინებული 16 პროექტი 179 038 ლარის ღირებულებით. ამის გარდა, სამსახური ზედამხედველობას ახორციელებს მიმდინარე ინფრასტრუქტურული პროექტების გახორციელებაზე", _ თქვა გამგეობის ინფრასტრუქტურისა და არქიტექტურის სამსახურის უფროსმა ლევან ჩხაიძემ.
ჩხაიძის მიერ წარმოდგენილი ანგარიშით თავიდანვე უკმაყოფილონი დარჩნენ კომისიის წევრები.
საკრებულოს წევრმა ია ჩხაიძემ გორგასლის ქუჩის მაცხოვრებელთა პრობლემაზე ისაუბრა, სადაც სანიაღვრე არხის არარსებობის გამო, ძლიერი წვიმისას, წყალი მოსახლეობას სახლებში შესდით: "პრიორიტეტები უნდა გამოვკვეთოთ, რა არის მოსახლეობისთვის უმთავრესი და ისე გავაკეთოთ საქმე. ხალხს სახლკარი უნადგურდება წყლისგან. არავინ ითხოვს ასფალტის დაგებას, სანიაღვრე არხები მოწესრიგდეს ყველგან _ ესაა სწორედ პრიორიტეტი", _ თქვა ჩხაიძემ.
ნათლისმცემლის ქუჩაზე არსებულ ანალოგიურ პრობლემაზე გაამახვილა ყურადღება დეპუტატმა დარეჯან ბურჭულაძემ, კომისიის თავმჯდომარე ბესიკ ტაბიძემ კი კვირკველიასა და ჟორდანიას ქუჩის მცხოვრებთა განცხადება წარმოადგინა, რომლებიც სანიაღვრე არხების მოწესრიგებას ითხოვენ.
შუხუთის მაჟორიტარი დეპუტატის აკაკი იმნაიშვილის თქმით, ქალაქის ცენტრში მდებარე ხუთსართულიანი ბინის სარდაფი წყლითაა სავსე და დროულ მიხედვას საჭიროებს.
ლესის მაჟორიტარმა ელისო ჭიჭინაძემ წყალში გადაყრილად ჩათვალა გზის მოხრეშვისთვის გაწეული ხარჯები: "ყოველ წელს ხრეშავენ, გაწვიმდება და წყალს მიაქვს ნამუშევარიც და დახარჯული ფულიც. უკვე ათი წელია, რაც სტიქიამ ხიდი დააზიანა და არავინაა მომკითხავი. არაერთხელ დავსვი ეს საკითხი, თუმცა, შედეგი აქამდე არ ჩანს. რა მნიშვნელობა აქვს, ორი ოჯახია მოწყვეტილი სოფელს თუ ათი?" _ იკითხა ჭიჭინაძემ.
ლევან ჩხაიძის პასუხის მიხედით გაირკვა, რომ ყველაფერი ფინანსებზეა დამოკიდებული და ყველა ობიექტზე სამუშაოები იმის მიხედვით გახორციელდება, თუ რა თანხა გამოიყოფა საამისოდ.
ინფრასტრუქტურულ სამუშაოების მიმართ, შენიშვნები ჰქონდა დეპუტატ გია გოგუაძეს:
"დავიწყებ აკეთის გახმაურებული ნაპირსამაგრის პროექტით, რომელსაც სტიქიამ გვარიანი ზარალი მიაყენა. თავიდან ეჭვი გაგვიჩნდა, როცა ინფრასტრუქტურის სამსახურიდან მივიღეთ ინფორმაცია, რომ ტენდერში გაიმარჯვა ორჯონიკიძეში რეგისტრირებული ფირმის წარმომადგენლობამ. მაშინ უპრეცენდენტო გადაწყვეტილება მიიღო სატენდერო კომისიამ _ სამმილიონიანი პროექტი მისცა იმ ფირმას, რომელსაც არანაირი სამშენებლო გამოცდილება არ ჰქონდა და არანაირი სამუშაოები არ შეუსრულებია საქართველოში. ფირმას წარმოდგენილი აქვს, რომ ალანიაში, მდინარე კიზილკაზე შეასრულა 6 მილიონი ლარის სამუშაოები. ეს შეცდომა იყო. იმ დოკუმენტაციის მიხედვით, რაც ამ ფირმამ წარმოადგინა, დანაშაულად მიმაჩნია მისთვის საქმის მიცემა.
არასწორად მიმაჩნია ისიც, რომ დროის ამ მონაკვეთში დაიწყო მდინარე სუფსაზე ნაპირსამაგრი სამუშაოები. სანამ ბახმაროში თოვლი არ დადნება, რთულია კალაპოტის მიხედვით სუფსასთან ურთიერთობა. მთავარი კი, რაც მინდა ვთქვა, ის არის, რომ როცა სტიქია მოხდა, გაირკვა რომ აქ ეს ფირმა სამუშაოებს საერთოდ არ აწარმოებს და მის ნაცვლად მუშაობს სხვა კომპანია _ "პლადა", რომელსაც ადგილზე უამრავი ტექნიკა ჰყავს მოყვანილი. მიჩნდება ეჭვი, რომ ვიღაცამ იმთავითვე იცოდა, რომ აღნიშნული სამუშაოები სწორედ "პლადას" უნდა შეესრულებინა, რომელიც, ეტყობა, ტენდერით გათვალისწინებულ რაღაც კრიტერიუმს ვერ აკმაყოფილებდა", _ თქვა გოგუაძემ.
ამ საკითხთან დაკავშირებით კომენტარი ვთხოვეთ მუნიციპალიტეტის სახელმწიფო შესყიდვების განყოფილების უფროს მაია აფხაზავას, რომელიც დეპუტატის ამ მოსაზრებას არ იზიარებს: "ვერ გეტყვით, რას გულისხმობს ბატონი გია, მაგრამ ფაქტია, რომ შესყიდვების სამსახურთან მხოლოდ "ვლადნეფტპროდუქტს" აქვს საქმიანი ვალდებულება და ვინ არის ამ კომპანიის ქვეკონტრაქტორი, ჩვენ საქმის კურსში არ ვიყავით და არც გვქონდა ამის ვალდებულება", _ გვითხრა აფხაზავამ.
"გურია ნიუსი" "ვლადნეფტპროდუქტის" ქართველ წარმომადგენელს, ილია დალაქიშვილს დაუკავშირდა, რომელმაც დაადასტურა, რომ სამუშაოებს სხვა კომპანია ახორციელებს: "დიახ, "პლადა" ჩვენი ერთ-ერთი ოპერატორი კომპანიაა. სულ 18 ობიექტი გვაქვს მოგებული და ყველგან ქვეკონტრაქტორი კომპანიების მეშვეობით ვახორციელებთ სამუშაოებს", _ გვითხრა დალაქიშვილმა.
სხდომაზე გოგუაძემ უკვე გახორციელებულ სამუშაოებზე გამოთქვა გარკვეული პრეტენზიები:
"ჩოლობარგში, საზოგადოებრივი სახლის რემონტზე 11 მაისს გამოცხადებული ტენდერი რატომ ჩავარდა?! საქმე ისაა, რომ ვინმე გიორგი რუსიას წინასწარ გააკეთებინეს ეს ობიექტი და უთხრეს, რომ შემდგომ, როცა მოვიდოდა თანხა, ტენდერში გაამარჯვებინებდნენ. თუმცა, სხვამ გაიმარჯვა, ამიტომაც ტენდერი ჩაიშალა და რომ გადახედოთ შემდგომში შესრულებულ ობიექტთა ნუსხას, რუსიას ყველგან ნახავთ _ ჩოჩხათში, აკეთში, ჯურუყვეთსა და ასე შემდეგ. ეს, ალბათ, იმიტომ, რომ მას ჩოლობარგში დახარჯული თანხა ამოეღო.
შუხუთში ერთ-ერთ ობიექტზე სამუშაოები შეწყდა იმის გამო, რომ იქ მომუშავე ფირმას _ "გურია 2015"-ს არ ჰქონდა წარმოდგენილი აუცილებელი სატენდერო დოკუმენტაცია. როცა დისკვალიფიკაციას აძლევთ, თავისთავად, ორგანიზაცია უნდა "გააშავოთ". ამის შემდეგ ხდება ის, რომ იმავე "გურია 2015"-ის ხელმძღვანელი ხდება ელგუჯა ხელაძე, ყოფილი ხელმძღვანელი კი აჰყავთ ტექნიკურ ზედამხედველად. ახლა ეს ფირმა არაერთ დიდ პროექტს ახორციელებს. სხვათა შორის, იგივე განმეორდა ჭანჭათშიც, სადაც ტენდერი "დრომ" მოიგო.
სხვა სოფლებისგან განსხვავებით, ნიგოითის ზონაში სამუშაოებს სტაბილურად მხოლოდ ოთარ ჯაში აწარმოებს, რომელიც, ამავდროულად, საფეხბურთო კლუბ ლანჩხუთის "გურიას" ადმინისტრატორია. ასევე, სტაბილურად აწარმოებს სამუშაოებს სოფელ სუფსაში სამუსიკო სკოლის მნე იროდიონ პატეიშვილი. ისეთი ინდმეწარმეების სახელი და გვარებია, გაგიკვირდებათ, რეალურად კი შემსრულებელი სხვაა", _ დასძინა გოგუაძემ.
თემა გააგრძელა ლესის მაჟორიტარმა, ელისო ჭიჭინაძემ: "ჩემს სოფელში ოთხი ინდმეწარმეა, მაგრამ არც ერთს არ მისცეს უფლება ტენდერში მიეღო მონაწილეობა _ გამოცდილება არ აქვთო. გამცეს ვინმემ პასუხი, რა ხდება აკეთში _ ქალი მოსკოვში თუ იჯდა მეათე სართულზე და იმან მოიგო ტენდერი, რატომ არ შეიძლება უპირატესობა ადგილობრივს მივანიჭოთ?!
რვა ოქტომბრის სტიქიის სალიკვიდაციო სამუშაოები დაწყებულა და შემთხვევით ვიგებ, რომ ჩემს სოფელში სხვა ზონის დეპუტატი შემოდის. ყველას ჩემი თავი გენაცვალოთ, მაგრამ ელემენტარულად, კოლეგიალურად არ უნდა ვიყო საქმის კურსში? შეიძლება, ვცდები და ცრუ ინფორმაცია მაქვს, მაგრამ ფაქტია, რომ ყველანაირი კანონი დარღვეულია. სოფელში ხალხი უმუშევარია და შემოდის სხვა. ყველა მეწარმე უნდა იყოს ჩართული საქმეში და არა მხოლოდ ერთი", _ თქვა ჭიჭინაძემ.
ინფრასტრუქტურის კომისიის თავმჯდომარის ბესიკ ტაბიძის თქმით, მას ჯერ დაფინანსებაც არ ეგონა დაწყებული და თანხები უკვე განაწილებული დახვდა: "სტიქიის თანხები ისე უცბად განაწილდა, არც გამიგია. ძალიან ცუდია, რაც ხდება. ქალბატონმა ელისომ არ დაასახელა ამ კაცის სახელი, მაგრამ ყველამ ძალიან კარგად ვიცით, ვინცაა. დამალული არაფერია, ყველამ ყველაფერი იცის და ბოლოს პასუხიც მოეთხოვება. ადგილობრივი მეწარმისთვის თუ არ შეიძლება გამოცდილების არქონის გამო პროექტის მიცემა, სხვისთვის რატომაა დასაშვები?!" _ იკითხა ტაბიძემ.
საუბარში გია გოგუაძე ჩაერთო, რომელმაც თქვა, რომ "კომისიის სხდომაზე მიმდინარე ეს საუბარი, პირველ რიგში, მამათისა და აცანის მაჟორიტარებს _ კახა ურუშაძესა და ემზარ თევდორაძეს უნდა მოესმინათ, რომლებსაც ამ მომენტისთვის სხდომა დატოვებული ჰქონდათ.
საზოგადოების ნაწილსა და რიგ დეპუტატებს შორის მუსირებს აზრი, რომ ტენდერებს ლანჩხუთში რამდენიმე დეპუტატი ლობირებს და ისინი მეწარმეებად დარეგისტრირებული სხვადასხვა პიროვნებების სახელს არიან ამოფარებულები".
ლევან ჩხაიძემ ამის საპასუხოდ განაცხადა, რომ ტენდერი ელექტრონულად ტარდება, მთავარი აქ გამოცდილებაა და ამ კრიტერიუმით ხდება შემსრულებელთა შერჩევა. თუმცა, სხვა საქმეა ტენდერი და სხვა საქმეა გამარტივებული წესით ერთ პირთან მოლაპარაკება. სწორედ, ამ წესით შერჩეულ შემსრულებლებზე გააკეთა აქცენტი გია გოგუაძემ:
"რვა ოქტომბრის სტიქიის შედეგების აღმოსაფხვრელად 700 ათასი ლარია გამოყოფილი, რაც ჯერ კიდევ არ არის ასახული ბიუჯეტში და მასზე წარმოება მიმდინარეობს. თუმცა, აღმოჩნდა, რომ ხელშეკრულებები უკვე გაფორმებულია ამ თანხაზე. ჩემთვის გაურკვეველია, საიდან მოიყვანეთ ინდმეწარმე ალექსანდრე ხუხუნაიშვილი, რომელმაც ოთხ სოფელში უნდა შეასრულოს 169 ათასი ლარის სამუშაოები. ეს თბილისელი კაცია და ლანჩხუთში არანაირი საქმიანობა არ უწარმოებია. ასევე, რამაზ არველაძე, რომელსაც 187 ათასი ლარის დაფინანსება მიეცა და ლანჩხუთში კი არა, საერთოდ არანაირი გამოცდილება არ აქვს. რა კრიტერიუმით შეირჩა ეს ინდმეწარმეები, აქ ხომ ტენდერი არ იყო და ვინ და რატომ გააკეთა ამ ორგანიზაციებზე არჩევანი, ესაა საკითხავი", _ თქვა გოგუაძემ.
აღნიშნულ თემასთან დაკავშირებით, "გურია ნიუსი" მოკვლევას აწარმოებს და უახლოეს ხანში გავასაჯაროებთ, კონკრეტულად ვინ და რა სამუშაოებს აწარმოებს მუნიციპალიტეტის ტერიტორიაზე და რა გამოცდილება გააჩნიათ საამისოდ.
