ქალაქ ოზურგეთის მუნიციპალიტეტის საკრებულოს ბოლო სხდომაზე, დეპუტატმა გოჩა ძიმისტარაშვილმა გააკეთა განცხადება, რომ ოზურგეთის დრამატული თეატრი კულტურის სამინისტროსგან უნდა ფინანსდებოდეს.
"ეს არის საჯარო სამართლის იურიდიული პირი, რომელიც ექვემდებარება პირდაპირ კულტურის სამინისტროს და თვითონ ნიშნავს დირექტორს. მინდა გითხრათ, რომ ადგილობრივ ხელისუფლებას საკადრო პოლიტიკაში ჩარევის არანაირი ბერკეტი არ აქვს", _ თქვა გოჩა ძიმისტარაშვილმა "გურია ნიუსთან" საუბრის.
ძიმისტარაშვილის პოზიციას არ იზიარებს ქალაქ ოზურგეთის საკრებულოს მუნიციპალიტეტის თავმჯდომარე გელა კობალაძე. მისი თქმით, 2016 წლის ბიუჯეტში თეატრის დაფინანსება ისევ იგეგმება და ამისთვის 350 000 ლარია გამოყოფილი. ოზურგეთის მუნიციპალიტეტის 2016 წლის ბიუჯეტის პროექტში, გრანტის სახით, თეატრისთვის 50 000 ლარია გავალისწინებული.
თეატრის საკითხი საუბრის თემად იქცა ოზურგეთის მუნიციპალიტეტის საკრებულოს სხდომაზეც: "ეს არის ჩვენი კეთილი ნება, რომ ოზურგეთის მუნიციპალიტეტის ბიუჯეტში თეატრის დაფინანსებისთვის გამოყოფილი იყოს თანხა. აქედან გამომდინარე, კარგი იქნება, თუ მოხერხდება თვეში ერთ ან ორ უფასო სპექტაკლს დაესწროს ოზურგეთის მუნიციპალიტეტში მცხოვრები", _ თქვა ოზურგეთის მუნიციპალიტეტის საკრებულოს თავმჯდომარის მოადგილემ დიმიტრი კვერღელიძემ.
ოზურგეთის მუნიციპალიტეტის საკრებულოს დეპუტატის ხვიჩა წულაძის თქმით, 50 000 ლარის ფარგლებში, კარგი იქნება, თოვლის ბაბუა სოფელში მცხოვრებ ბავშვებს ადგილზე შეხვდეს.
ალექსანდრე წუწუნავას სახელობის დრამატული თეატრის სამხატვრო ხელმძღვანელის, ვასილ ჩიგოგიძემ მედიის წარმომადგენლებთან საუბრის დროს თქვა, რომ მომავალი წლიდან უფრო მეტი აქტივობები არის დაგეგმილი, რათა მათ მიერ დადგმული სპექტაკლები უფრო მეტმა ადამიანმა ნახოს: _ ჩვენ ვთხოვთ ხელისუფლებას, რადგან ტრანსპორტი არ გყავს, ხალხის გადმოიყვანონ სოფლებიდან და ჩვენ მათ უფასო სპექტაკლს ვაჩვენებთ. თუ ეს არ მოხერხდება, მაშინ ერთი ტრანსპორტი მოგვცენ და ჩვენ ჩავალთ ყველა სოფელში, ოღონდ ტრანსპორტით უნდა უზრუნველგვყონ. მადლიერები ვართ იმისთვის, რომ კონკრეტული თანხა არის ჩასმული ბიუჯეტში. სამწუხაროდ, ლანჩხუთის და ჩოხატაურის მუნიციპალიტეტები ვერ დავაინტერესეთ, რომ ჩავიდეთ და იქ ვაჩვენოთ ჩვენი სპექტაკლები, _ თქვა ჩიგოგიძემ.
მსახიობმა ზურაბ ცინცქილაძემ ვასილ ჩიგოგიძეს იდეა მიაწოდა: "თუ არ იქნება ტრანსპორტი, მაშინ ურმით წავიდეთ და ამის შემდეგ იმედია, მოგვაქცევენ ყურადღებას!"
_ კი წავალთ ურმით, მაგრამ როდის ჩავალთ, ის არის მთავარი, _ უპასუხა ჩიგოგიძემ.
კითხვით _ თეატრი ადგილობრივი ბიუჯეტიდან უნდა ფინანსდებოდეს თუ ცენტრალური ბიუჯეტიდან? _ "გურია ნიუსმა" თეატრის კრიტიკოსს ლაშა ჩხარტიშვილს და დრამატურგ დავით გაბუნიას მიმართა.
ლაშა ჩხარტიშვილი ამბობს, რომ თეატრი უნდა ფინანსდებოდეს როგორც ცენტრალური, ისე ადგილობრივი ბიუჯეტიდან.
"თეატრი ცენტრალური ბიუჯეტიდან უნდა ფინანსდებოდეს სუბსიდიის სახით და რეგიონის ბიუჯეტიდან ცალკეული პროექტები, რომელსაც თეატრი ახორციელებს, თეატრის დაფინანსება მათი ინტერესის საგანი უნდა იყოს, ვინაიდან რეგიონში თეატრი არის კულტურის ერთადერთი ცოცხალი კერა", _ ამბობს ჩხარტიშვილი.
მისივე თქმით, რეგიონულ თეატრებში ბევრი პრობლემაა: "აუცილებელია მატერიალურ ტექნიკური ბაზის გაუმჯობესება, თეატრის შენობა 21-ე საუკუნეში უნდა პასუხობდეს თანამედროვე მოთხოვნებს, ვერ ვისაუბრებთ სპექტაკლების მხატვრულ ხარისხზე, პირობები არ შეიქმნა. ტექნიკური პროგრესის პირობებში, სადაც თეატრში დიდი ადგილი მულტიმედიამ და სცენურმა ეფექტებმა დაიკავეს, ძნელია, კვლავ ძველი მეთოდოლოგიით იმუშაოს თეატრმა", _ თქვა ლაშა ჩხარტიშვილმა.
დავით გაბუნია მიიჩნევს, რომ ყველა თეატრისთვის მთავარია, რა რეპერტუარით წარსდგება ის მაყურებლის წინაშე.
_ ჩემი აზრით, ორივე ბიუჯეტიდან უნდა ფინანსდებოდეს თეატრი. გასაგებია, რომ შეიძლება ამას ბევრი მოწინააღმდეგე ჰყავდეს, მაგრამ თუ კულტურის გაძლიერება გვინდა, მაშინ ასე უნდა იყოს. თუ ასე არ იქნება, შეიძლება, სავალალო შედეგი მივიღოთ. ოღონდ, ეს ფინანსები არ უნდა იყოს წყალში გადაყრილი ფული, რაღაც პასუხისმგებლობას უნდა გულისხმობდეს თეატრებისგან. ვთქვათ, როგორი ექნება სარეპერტუარო პოლიტიკა, რას დადგამენ, გაითვალისწინებენ თუ არა სპექტაკლებს სხვადასხვა ასაკობრივი ჯგუფებისთვის, _ გვითხრა დავით გაბუნიამ.
