ჩოხატაურის მუნიციპალიტეტის ბიუჯეტი შემოსავლების კუთხით 2016 წელს გაზრდილია _ 5 მილიონ 895 ათასი ლარი წელს უნდა დაიხარჯოს.
წლის მთავარი საფინანსო დოკუმენტი ჩოხატაურის საკრებულომ გასული წლის 29 დეკემბერს მიიღო. ბიუჯეტის დამტკიცებას არ ესწრებოდნენ "ნაციონალური მოძრაობის" წარმომადგენლები, ხოლო ფრაქცია "პატრიოტთა ალიანსის" თავმჯდომარემ, ირაკლი ახობაძემ ბიუჯეტს ხმა არ მისცა.
2016 წლის ბიუჯეტი, გასულ წელს დამტკიცებულ ბიუჯეტთან შედარებით, 900 000 ლარითაა გაზრდილი, ხოლო დაზუსტებულ ბიუჯეტთან შედარებით 300 000 ლარით მეტია.
დოკუმენტის თანახმად, გრანტები 2 890,4 ათასი ლარითაა განსაზღვრული, სხვა შემოსავლები კი _ 2001,4 ათასი ლარით.
გაზრდილია გამგებლის სარეზერვო ფონდი _ წელს ირაკლი კუჭავას მუნიციპალიტეტის ბიუჯეტით, გაუთვალისწინებელი გადასახდელების დასაფინანსებლად 100 000 ლარი აქვს.
სახელმწიფო ბიუჯეტიდან მიზნობრივი ტრანსფერის თანხა 183,0 ათასი ლარია, რომელიც გათვალისწინებულია სამხედრო სავალდებულო სამსახურის და საზოგადოებრივი ჯანდაცვისთვის.
სოციალური უზრუნველყოფისთვის დაიხარჯება 553 ათასი ლარი, კომუნალური მომსახურებისთვის (დასუფთავება, გარეგანათება) დაიხარჯება 442 ათასი ლარი, სკოლამდელი დაწესებულებებისთვის _ 955 ათასი ლარი, რაც გამოწვეულია ახალი ბაღების გახსნით, სპორტის მიმართულებით _ 501 ათასი ლარი, კულტურისთვის (ბიბლიოთეკები, მუზეუმები, სამუსიკო სკოლა, სამხატვრო სკოლა, გალერეა, მოსწავლე-ახალგაზრდობა, კულტურის ცენტრი) _ 798,3 ათასი ლარი.
ადგილობრივი ბიუჯეტის შემოსავლებიდან ინფრასტრუქტურისთვის გათვალისწინებულია 113 000 ლარი.
ჩოხატაურის მუნიციპალიტეტის საკრებულოს თავმჯდომარის ზაალ მამალაძის თქმით, აღნიშნულ თანხას წლის დასაწყისში დაემატება ცენტრალური ბიუჯეტიდან მუნიციპალიტეტისთვის გამოყოფილი თანხა და ამ დროის მონაცემებით, ჩოხატაურის მთლიანი ბიუჯეტი 10 მილიონს გადააჭარბებს.
მუნიციპალიტეტის საკრებულოს გასული წლის ბოლო სხდომაზე ზაალ მამალაძემ რამდენიმე მნიშვნელოვანი ინიციატივა გააჟღერა:
_ დიდი ხანია, მიმდინარეობს მუშაობა გორაბერეჟოულის ტექნიკუმის აღდგენაზე, თუმცა, განათლების სამინისტროს მიერ დადებული დასკვნის თანახმად, არსებული შენობა გამოუსადეგარია და დემონტაჟს ექვემდებარება. სამაგიეროდ, მდგრადია, ვარგისია სოფელ ქვემო ერკეთის ყოფილი პროფტექნიკუმის შენობა. ამიტომ, შემოვდივარ წინადადებით, რომ სასწავლო კორპუსად გამოყენებული იქნას ქვემო ერკეთში მდგარი შენობა, ხოლო საცდელი ნაკვეთები და სასწავლო ბაზა განთავსდეს გორაბერეჟოულში. ამ ვარიანტს, რომელიც ორ სოფელს გამოაცოცხლებს და სამუშაო ადგილებს შექმნის, განათლების სამინისტროს უახლოეს ხანში შევთავაზებთ. გარდა ამისა, ვიმუშაოთ იმაზე, რომ ჩოხატაურის აგრარულ ბაზართან მდებარე საცალფეხო ხიდი, რომელიც ბაზრის მიმდებარე ტერიტორიას რამდენიმე სოფელთან აკავშირებს, აღდგეს, როგორც სამანქანო; ეს კი ერკეთის, გუთურის, იანეულის, ხიდისთავის, ჯვარცხმის, ნაბეღლავის, ზოტის, ჩხაკაურას და ქვაბღის მოსახლეობას შეუმოკლებს და გაუადვილებს მოძრაობას. ამავე დროს, უსაფრთხოს გახდის ორ გზაჯვარედინს _ ბენზინგასამართ სადგურ "სოკართან" და სუპერმარკეტ "მარულასთან". გასათვალისწინებელია, რომ ხიდის აღდგენა ბაზარს და მიმდებარე ტერიტორიას გახდის კერძო ბიზნესისთვის მიმზიდველს _ ბევრი რამით შეიძლება ტერიტორიის დატვირთვა, _ აღნიშნა სხდომაზე მამალაძემ.
მისივე თქმით, კარგი იქნება თუ კულტურის სახლს, რომელის მშენებლობაც აქტიურად მიმდინარეობს, ნინო რამიშვილის სახელი მიენიჭება:
_ ჩოხატაურს ბევრი საამაყო პიროვნება ჰყავს. მათ შორის, არის სახელოვანი მოცეკვავე, ქართული ქორეოგრაფიის ფუძემდებელი ნინო რამიშვილი და ვფიქრობ, კარგი იქნება თუ კულტურის სახლს მის სახელს მივანიჭებთ. ასევე, იხსნება ახალი სამხატვრო გალერეა და ვფიქრობ, მას თანამედროვე სასახელო მხატვრის _ ედმონდ კალანდაძის სახელი უნდა მიენიჭოს, _ აღნიშნა საკრებულოს თავმჯდომარემ.
ზაალ მამალაძემ "კრიმანჭულის" და ოთარ რამიშვილის სახელობის ფესტივალების ჩატარების მნიშვნელობაზეც ისაუბრა, რომლის გაკეთება მან "გურია ნიუსთან" რამდენიმე ხნის წინ დააანონსა და ამ საკითხზე მხარდაჭერა ჩოხატაურის მუნიციპალიტეტის გამგებელმა ირაკლი კუჭავამაც გამოხატა.
აღსანიშნავია, რომ 2016 წლის ბიუჯეტში, საკრებულოს ინიციატივით და გამგეობის მხარდაჭერით, ჩაიდო თანხა, რომელიც განკუთვნილია კონკურსებისთვის.
_ დაბის იერსახის კონცეფციის შექმნაზე მუნიციპალიტეტი მალე კონკურსს გამოაცხადებს და გამარჯვებული დაჯილდოვდება კიდეც. კონკურსი ყველაფერს მოიცავს _ როგორი უნდა იყოს შენობები, ნაგვის ურნები, დასასვენებელი პარკები, ქვაფენილები. გვინდა, რომ ჩოხატაურს საკუთარი, განუმეორებელი სახე ჰქონდეს და მუდამ ასე დაუგეგმავად არ შენდებოდეს. მის გალამაზებაში ყველა უნდა ჩაერთოს. ასევე, გამოცხადდება კონკურსი _ შეიქმნას სლოგანი სპეციალურად ჩოხატაურისთვის, _ აღნიშნა მამალაძემ.
წლევანდელ ბიუჯეტში საკრებულოს კიდევ ერთი ინიციატივა იქნა გათვალისწინებული _ 2016 წელს სახელოვნებო და სპორტულ ა(ა)იპ-ებში სოფლებიდან ბავშვების ჩამოსაყვანად უფასო ტრანსპორტი დაინიშნება:
_ სულ ოთხი მიმართულება იქნება _ ჩოხატაური- ვან-ზომლეთი-სამება-ამაღლება-შუა ამაღლება, გოგოლესუბანი; ზემოხეთი-საჭამიასერი-კოხნარი- ბურნათი-წიფნარი, ზემოფარცხმა-ჩოხატაური; დაბლაციხე-ბუკისციხე-იანეული-ერკეთი-გუთური-ჩოხატაური; გორა-ბუკნარი-ქვენობანი-ხიდისთავი-ჩოხატაური. აღნიშნულ სოფლებში მცხოვრებ ახალგაზრდებს, რომლებსაც სხვადასხვა წრეზე უნდათ სიარული, მაგრამ უტრანსპორტობის გამო ვერ ახერხებდნენ, ექნებათ საშუალება, სრულიად უფასოდ ჩამოვიდნენ ჩოხატაურში და შემდეგ, ამავე ტრანსპორტით სახლებში დაბრუნდნენ, _ თქვა ზაალ მამალაძემ.
