დღეს პარტნიორობა "თავისუფალი არჩევნისთვის" შემავალმა ორგანიზაციებმა: სამოქალაქო კულტურის საერთაშორისო ცენტრმა, საქართველოს რეგიონულ მაუწყებელთა ასოციაციამ, საზოგადოებრივმა დამცველმა, საქართველოს მედიამონიტორინგის ცენტრმა, კონსტიტუციის 42-ე მუხლმა, ადამიანის უფლებათა ცენტრმა, "მრავალეროვანმა საქართველომ" პრესკონფერენცია გამართეს.
პრესკონფერენციაზე ითქვა, რომ პარტნიორი ორგანიზაციები ეთანხმებიან ვენეციის კომისიის და ODIHR–ის ერთობლივ დასკვნაში გამოთქმულ რეკომენდაციებს საარჩევნო რეფორმის მომავალში უკეთ გახორციელების თაობაზე; ასევე მიიჩნევენ, რომ დასკვნაში მითითებული ხარვეზები გამომდინარეობს კონსულტაციებში ყველა დაინტერესებული პირის ნაკლები ჩართულობიდან, რამაც დააზიანა პროცესის ინკლუზიურობა.
პარტნიორობა "თავისუფალი არჩევნისთვის" ჩართული ორგანიზაციები მივიჩნევთ, რომ პროცესი მართლაც არ იყო გამჭვირვალე, რის შესახებაც არაერთხელ მოვუწოდეთ ხელისუფლებას, თუმცა უშედეგოდ; მიგვაჩნია, რომ აუცილებელი იყო შექმნილიყო საარჩევნო საკითხებზე მომუშავე ჯგუფი საზოგადოების ფართო მონაწილეობით. ვენეციის კომისიის დასკვნიდანაც კარგად ჩანს, რომ ამგვარი – გაფართოებული ფორმატის ჯგუფის შექმნა პროცესების გამჭვირვალობის, მაქსიმალური კონსენსუსისა და პასუხისმგებლობის გადანაწილებისთვის დღესაც სასიცოცხლოდ მნიშვნელოვანია, _ ამბობს პარტნიორი ორგანიზაციის – სამოქალაქო კულტურის საერთაშორისო ცენტრის ხელმძღვანელი კონსტანტინე კანდელაკი.
პრესკონფერენციაზე ყურადღება გამახვილდა კონკრეტულ ფაქტზე, თუ რა შეიძლება მოჰყვეს გაუმჭვირვალე პროცესებს: პარლამენტმა პირველი მოსმენით უკვე მიიღო ცვლილებები მაუწყებლობის შესახებ კანონში, რომლის თანახმად, მაუწყებლობაზე ავტორიზებული ლიცენზირებული ტელემაუწყებელი ვალდებულია, პროგრამები განათავსოს მხოლოდ სახელმწიფო ენაზე. აღნიშნული რედაქციის საბოლოო დამტკიცების შემთხვევაში, განსაკუთრებით პრობლემური გახდება ეთნიკური უმცირესობების ინფორმირება. საგულისხმოა, რომ სამცხე-ჯავახეთში სამი ქართულ-სომხურენოვანი, ხოლო ქვემო ქართლში _სამი აზერბაიჯანულ-ქართულენოვანი ადგილობრივი მაუწყებელია.
" მიგვაჩნია, რომ ამ ცვლილებით აშკარად იზღუდება უმცირესობების უფლებები და საქართველოს მოქალაქეები, განსაკუთრებულად მნიშვნელოვან – საარჩევნო პერიოდში, რჩებიან საინფორმაციო ველის მიღმა, რაც გამოუსწორებელ ზიანს მიაყენებს სახელმწიფოებრივ ინტერესებს, "_ ამბობს საქართველოს მედია მონიტორინგის ცენტრის ხელმძღვანელი ია მამალაძე.
პარტნიორობა "თავისუფალი არჩევნისთვის" რესურსების გაერთიანებით, გეგმავს წინასაარჩევნო და არჩევნების დღის მონიტორინგს, რეკომენდაციების შემუშავებას და საზოგადოებისთვის გაცნობას; ასევე, არჩევნების პროცესში მონაწილე ყველა ინსტიტუციასთან, მხარესთან პარტნიორობას და თანამშრომლობას. გაერთიანების მიზანია, ხელი შეუწყოს არჩევნების დემოკრატიულ, სამართლიან და გამჭვირვალე გარემოში ჩატარებას.
