საქართველოს პრეზიდენტის მრჩევლის სოფიო შამანიდის ოჯახის საკუთრებაში ორი საცხოვრებელი სახლი, ბინა და მიწის ნაკვეთია.
ამის შესახებ შამანიდის ქონებრივ დეკლარაციაშია აღნიშნული, რომელიც მან 2016 წლის 5 აპრილს შეავსო.
დეკლარაციის მიხედვით, სოფიო შამანიდია ბორჯომის რაიონის, დაბა ბაკურიანში, ტურბაზის მიმდებარედ, 95.00 კვ.მ-ის ფართობის მშენებარე საცხოვრებელი სახლისა და ამავე ტერიტორიაზე 304.00 კვ.მ-ის ფართობის მიწის ნაკვეთის 100%-იანი მფლობელი. გარდა ამისა, შამანიდია საბერძნეთში, ათენში, არისტარხუს ქუჩაზე მდებარე 43.00 კვ.მ-ის ფართობის ბინის მფლობელიც.
მისი მეუღლე, ლაშა ბუღაძე კი ფლობს თბილისში, ზალდასტანიშვილის შესახვევში, 150.00 კვ.მ-ის ფართობის საცხოვრებელ სახლს.
რაც შეეხება ოჯახის მოძრავ ქონებას, როგორც დეკლარაციაშია აღნიშნული, სოფიო შამანიდი ფლობს 2005 წელს გამოშვებულ მსუბუქ ავტომანქანას Peugeot-307.
ლაშა ბუღაძე კი, 3 ფერწერული ტილოს მფლობელია, რომლის ავტორი გია ბუღაძეა, ხოლო ფასი დეკლარაციის მიხედვით, 10 ათას ლარს აღემატება.
აღსანიშნავია, რომ ოჯახის ფინანსურმა შემოსავალმა 2015 წელს საერთო ჯამში 117 934.75 ლარი და 1735.20 ევრო შეადგინა.
აქედან, სოფიო შამანიდმა თსუ სრული პროფესორის პოსტიდან 13800.00 ლარი მიიღო; ხოლო საქართველოს პრეზიდენტის ადმინისტრაციიდან, სადაც მას მრჩევლის თანამდებობა უჭირავს – 54200.00 ლარი. რაც შეეხება მისი მეუღლის, ლაშა ბუღაძის შემოსავლებს – რადიო "თავისუფლებიდან", სადაც ის გადაცემის ავტორი და წამყვანია – 2122.35 ლარი; ტელეიმედის ტელეწამყვანობისთვის – 9375.00 ლარი; ილიაუნიდან, სადაც ის მიწვეული პროფესორია – 17869.56 ლარი; მარჯანიშვილის სახელობის თეატრის დრამატურგის პოსტიდან კი – 10500.00 ლარი მიიღო.
გარდა ამისა, ოჯახს დეკლარაციაში შემოსავლის სახით დაფიქსირებული აქვს, რომ ლაშა ბუღაძემ საქართველოს საავტორო უფლებათა ასოციაციის საავტორო ჰონორარი 2555.20 ლარი მიიღო; ბაკურ სულაკაურის გამომცემლობიდან ჰონორარი – 4512.99 ლარი; შოთა რუსთაველის სახელობის სახელმწიფო აკადემიური თეატრიდან შემოსავლის სახით 3000.00 ლარის ჰონორარი აქვს მიღებული. სოფიო შამანიდმა კი, ურანისის ფონდის ჰონორარი 1735.20 ევრო მიიღო.
დეკლარაციის შევსების მომენტში კი, სოფიო შამანიდის რესპუბლიკა ბანკის ანაბარზე 3473.00 ევრო; ამავე ბანკის სახელფასო ანგარიშზე 3782 ლარი; საქართველოს ბანკის სახელფასო ანგარიშზე – 56.00 ლარი; რესპუბლიკა ბანკის ანაბარზე 3280.00 დოლარი; მიმდინარე ანგარიშზე კი, – 465.00 ევრო ჰქონდა.
ლაშა ბუღაძეს საქართველოს ბანკის სახელფასო ანგარიშზე 620 ლარი; თი-ბი-სი ბანკის ანაბარზე 11200.09 დოლარი; ხოლო ამავე ბანკის მიმდინარე ანგარიშზე 20.00 ლარი; რესპუბლიკა ბანკის სახელფასო ანგარიშზე კი, – 720.00 ლარი ჰქონდა.
დეკლარაციაში ასევე აღნიშნულია, რომ სოფიო შამანიდი 2008 წელს დარეგისტრირებული შპს "წიწილების" 25%-იანი წილის მფლობელია, თუმცა, როგორც იქვეა ნათქვამი, საწარმოს არ უმუშავია არც ერთი დღე და არ განუხორციელებია რაიმე ოპერაცია.
რაც შეეხება ოჯახის წინა წლების შემოსავლებს, როგორც შამანიდის 2015 წლის დეკლარაციაშია აღნიშნული, ოჯახის 2014 წლის შემოსავალმა 115 115 ლარი შეადგინა; ხოლო 2013 წელს ოჯახის შემოსავალი 70 862 ლარი, 21 120 დოლარი და 17 280.69 ევრო იყო.
ცნობისთვის, სოფიო შამანიდი 1970 წლის 7 მარტს დაიბადა. დაამთავრა ივანე ჯავახიშვილის სახელობის თბილისის სახელმწიფო უნივერსიტეტი. 1999 წლიდან არის ფილოლოგიის მეცნიერებათა დოქტორი.
1992 წლიდან მუშაობს ივანე ჯავახიშვილის სახელობის თბილისის სახელმწიფო უნივერსიტეტში სხვადასხვა თანამდებობაზე. ამჟამად არის ამავე უნივერსიტეტის სრული პროფესორი და ახალი ბერძნული ფილოლოგიის დეპარტამენტის (კათედრის) ხელმძღვანელი.
2003-2013 წლებში იყო კვიპროსის, ბოლონიის, მიუნხენის, ბერლინის, თესალონიკის, პიზის უნივერსიტეტების მიწვეული პროფესორი. არის თსუ ჰუმანიტარულ მეცნიერებათა და საბერძნეთის სხვადასხვა უნივერსიტეტის სადისერტაციო საბჭოს წევრი. არის საქართველოს პრეზიდენტის (1996-1999, 2000-2005) და „ალექსანდროს ონასისის“ ფონდის (1998, 2010) სტიპენდიატი. 1999-2005 წლებში იყო საქართველოს ნეოგრეცისტთა ასოციაციის თავმჯდომარე; 1996 წლიდან არის საბერძნეთის საგარეო საქმეთა სამინისტროს პროგრამის „ბერძნული ენა საქართველოს სკოლებში“ კოორდინატორი. მუშაობდა ეთნიკური უმცირესობების უფლებების საკითხებზე სხვადახვა პროექტის ფარგლებში.
სოფიო შამანიდი არის 5 მონოგრაფიის, ბერძნული ენის 6 სახელმძღვანელოს, მრავალი სამეცნიერო პუბლიკაციის ავტორი, ბერძნულ-ქართული და ქართულ-ბერძნული ლექსიკონების რედაქტორი.
2014 წლის 27 იანვარს დაინიშნა საქართველოს პრეზიდენტის მრჩევლად და უწევს მას კონსულტაციას ეთნიკურ და რელიგიურ უმცირესობებთან დაკავშირებულ საკითხებზე.
ფლობს ბერძნულ, ინგლისურ და რუსულ ენებს.
