“ამომრჩეველს ჰქონდა განცდა, რომ ჩემ კონკურენტ მამაკაცს მეტი შეეძლო”

ორგანიზაცია "საერთაშორისო გამჭვირვალობა _ საქართველოს" კვლევის თანახმად, გურიის მუნიციპალიტეტების საკრებულოების 22 ფრაქციიდან 13 ფრაქციას, დაარსებიდან დღემდე, არც ერთი საკითხის ინიცირება არ მოუხდენია.

არც ერთი საკითხის ინიცირება არ მოუხდენიათ ქალაქ ოზურგეთის საკრებულოს ფრაქციებს; ლანჩხუთის მუნიციპალიტეტის საკრებულოს ფრაქციებმა _ "ქართული ოცნება _ დემოკრატიული საქართველო," "ქართული ოცნება _ მრეწველები", "ქართული ოცნება _ კონსერვატორები" და "მაჟორიტარები", ერთობლივად წარადგინეს "სამება-ჯიხეთის დედათა მონასტრის ტურისტული განვითარების გეგმა"; ლანჩხუთის საკრებულოს ფრაქციამ "ლანჩხუთი ევროანტლანტიკური მომავლისათვის" ჯამში ორი საკითხი წარადგინა და მოითხოვა "შეჭირვებული მოსახლეობის ელექტროენერგიის საფასურის თანადაფინანსების", ასევე "წარმატებული სტუდენტებისა და შესაბამისი სკოლების წახალისების" პროგრამების დამტკიცება;

ოზურგეთის თემთა მუნიციპალიტეტის საკრებულოს ფრაქციამ "ქართული ოცნება _ დემოკრატიული საქართველო" სულ 7 საკითხის ინიცირება მოახდინა. ინიციატივები სოციალურ პროგრამებში ცვლილებების გახორციელებას, სკოლებისა და ბინათმესაკუთრეთა ამხანაგობების თანადაფინანსებას ითვალისწინებდა; ფრაქცია "ქართული ოცნება-ეროვნული ფორუმი" ომისა და სამხედრო ძალების ვეტერანთათვის ბუნებრივი აირის გადასახადის 5-10 ლარით თანადაფინანსების წინადადებით გამოვიდა; ფრაქცია "ქართული ოცნება _ კონსერვატორების" მიერ ინიცირებული საკითხი კი სოფელ ვაკიჯვრის სკოლის რაგბის პედაგოგთა დაფინანსებას ისახავდა მიზნად.

ჩოხატაურის მუნიციპალიტეტის საკრებულოში საკითხების ინიცირება მხოლოდ ერთმა ფრაქციამ  _ "ქართულმა ოცნება _ დემოკრატიულმა საქართველომ" მოახდინა, ფრაქციის მიერ წარდგენილ საკითხთაგან სამი სოციალურ პროგრამებს, ერთი კი "დაბის იერსახის კონცეფციის გეგმას" ეხებოდა.

ჩოხატაურის მუნიციპალიტეტის საკრებულოში სულ 7 ფრაქციაა. აქედან ორი ფრაქციის ხელმძღვანელი ქალბატონია _ ქეთევან სიხარულიძე ფრაქცია "ეროვნული ფორუმი _ ქართული ოცნების" თავმჯდომარეა, მაია გიორგაძე კი ფრაქცია "ქართული ოცნება _ კონსერვატორების".

ორივე ქალბატონი გასულ კვირას, გადაცემის "მონოლოგიდან დიალოგამდე" სტუმარი იყო.

ქეთევან სიხარულიძე არასამთავრობო ორგანიზაციის კვლევას არ დაეთანხმა და აღნიშნა, რომ ყველა ის ინიციატივა, რაც საკრებულომ დააყენა, ერთობლივი მუშაობის შედეგი იყო:

_ გამოკითხვას, რომელიც ჩაატარა "საერთაშორისო გამჭირვალობა _ საქართველომ" და რომლის თანახმადაც ფიქრობდნენ, რომ ფრაქციებს არ ჰქონდათ ინიციატივები და ნაკლებ სამუშაოებს ასრულებენ, რბილად რომ თქვა, არ ვეთანხმები. ვფიქრობ, ყველა იმ ინიციატივაზე, ყველა იმ პროგრამაზე, რომელიც მუშაობს მუნიციპალიტეტში და საკრებულოშია გავლილი, ყველამ ერთად ვიმუშავეთ. ჩემთვის, მაგალითად, არავის არ უკითხავს, თუ რაზე მქონდა ნამუშევარი, _ აღნიშნა ქეთევან სიხარულიძემ.

_ ქალბატონო ქეთევან, ორგანიზაციას გამოკითხვა არ ჩაუტარებია _ ეს კვლევა საკრებულოდან გამოთხოვილი ოფიციალური დოკუმენტების საფუძველზე მომზადდა…

_ ჩემი ინიციატივით, ახალგაზრდული ღონისძიებების დაფინანსება გაიზარდა, ასევე, სოციალურად დაუცველი მოხუცებისთვის ზამთარში შეშით მომარაგების საკითხი ჩემი დაყენებულია და ეს ბიუჯეტშიც იყო გათვალისწინებული.

_ ეს ყველაფერი დოკუმენტურად არის გაფორმებული?

_ დიახ. ასევე გეტყვით, რომ ჩვენ ერთობლივად ვმუშაობთ _ ერთ ინიციატივებს ვაყენებთ, განვიხილავთ, _ თქვა გადაცემაში სტუმრობისას სიხარულიძემ.

"საერთაშორისო გამჭირვალობა _ საქართველოს" კვლევა ეჭვქვეშ არ დაუყენებია მაია გიორგაძეს:

_ ჩვენი ინიციატივები დოკუმენტებში არ არის ასახული და შესაბამისად, ვერ დავაყენებ ეჭვქვეშ ამ კვლევას. მათ გამოითხოვეს დოკუმენტაცია, რაც გამოქვეყნებულ მასალას დაედო საფუძვლად. ამ ყველაფრის მიზეზი ისაა, რომ ჩვენ ვართ ხელისუფლება, ვართ უმრავლესობა და ყველა ერთად, შეჯერებულად, ვაკეთებთ პროექტების ინიცირებას. ოპოზიციაში რომ ვყოფილიყავი, ასე არ მოხდებოდა. მე მაქვს ოპოზიციაში ყოფნის გამოცდილება და მაშინ სხვანაირად ვიქცეოდი _ ყველაფერს ვაფორმებდით, ინიციატივებს ოქმებში ვაფიქსირებდით.

_ ფრაქციებს ვალდებულებები აქვს და საკმაოდ მაღალ ანაზღაურებას ფრაქციის ხელმძღვანელები სწორედ ამ ვალდებულებების შესრულებისთვის, საკითხების ინიცირებისთვის, მუშაობისთვის იღებენ.

_ გეთანხმებით _ თითოეულმა ჩვენგანმა უნდა დავაფიქსიროთ საკუთარი აზრი. გამოგვეპარა, შეცდომით იყო თუ გამოგვრჩა _ ამ კუთხით არ შეგვიხედავს. ვფიქრობ, რომ ჩემი ფრაქცია ბევრ რამეს აკეთებს. ტყუილად არ ვზივართ და ხელფასს არ ვიღებთ ამაში, თუმცა, გეთანხმებით, რომ ეს დოკუმენტურადაც უნდა იყოს გაფორმებული.

_ ჩოხატაურის საკრებულოში 5 ქალბატონია და ხუთივე თანამდებობაზე… ხომ არ გიჭირთ მამაკაცებთან ურთიერთობა?

ქეთევან სიხარულიძე: _ შემიძლია ვთქვა, რომ ქალბატონებს არაოფიციალური ფრაქციაც კი გვაქვს, რადგან ყველა საკითხს ერთმანეთთან ვათანხმებთ, ვაჯერებთ, ვმსჯელობთ, ვკამათობთ, თუმცა, ყოველთვის ერთ აზრამდე მივდივართ. ჩვენს მიერ დასმულ საკითხებზე მამაკაცების მხარდაჭერის მოპოვებასაც ვახერხებთ.

მაია გიორგაძე: _ ჩოხატაურის მუნიციპალიტეტის საკრებულოში ნამდვილად არაჩვეულებრივი მამაკაცები არიან _ ხელმძღვანელიდან, ბატონი ზაალ მამალაძიდან დაწყებული რიგითი დეპუტატით დამთავრებული. განსაკუთრებით ბატონ ზაალს გამოვყოფ, რომელიც ყოველთვის ითვალისწინებს საკრებულოს თითოეული წევრის აზრს. განსაკუთრებით კი ქალბატონებს გვანებივრებს და ყველა ჩვენს ინიციატივას მხარს უჭერს.

_ მამაკაცები არასდროს გეკამათებიან?

ქეთევან სიხარულიძე: _ კი, ხდება ხოლმე. ერთ-ერთი კამათის დროს, საკრებულოს თავმჯდომარის მოადგილემ ვლადიმერ სიხარულიძემ მომმართა, ნუ ხმაურობო. გამიკვირდა, რადგან არ ვხმაურობდი. თუმცა, არ შემეპუა, შენ ჩუმად ხმაურობო. ეს არ მწყენია, ჩავთვალე, რომ ჩუმად ვაკეთებდი რაღაცას.

_ ქალბატონო მაია, თქვენც ხომ არ საყვედურობენ "ჩუმად ხმაურისთვის"?

_ მე არ მქონია მსგავსი შემთხვევა. თანაც, მე "ჩუმად ხმაური" არ შემიძლია.

_ ერთად ვმუშაობთ ქალბატონებიო, თქვით. შეგიძლიათ გვითხრათ ის პროექტი, რომელიც თქვენი ინიციატივით გავიდა?

ქეთევან სიხარულიძე: _ სოციალურად დაუცველების დახმარების პროექტი ერთობლივად გავაკეთეთ. ასევე, "ქალთა ფორუმის" დახმარებით უნდა გაგვეკეთებინა უფასო სასადილოს პროექტი. ამაზე ბევრი ვიმუშავეთ, მაგრამ ვერ შევძელით გატანა.

_ ქალბატონო ქეთევან, მაგ საკითხში ვერ დაგეთანხმებით, რადგან უფასო სასადილოს გახსნის ინიციატივა "გურია ნიუსს" ეკუთვნის, რომლითაც ჩვენმა გამოცემამ 2014 წელს მიმართა საკრებულოს და ეს ოქმშიცაა დაფიქსირებული. სამწუხაროდ, ამ შემთხვევაში ვერც ქალბატონებმა და ვერც მამაკაცებმა ვერ მოახერხეს, წლის განმავლობაში 80 000 ლარს გამოყოფა იმისთვის, რომ დაბაში მცხოვრებ 80 ადამიანს ყოველდღე კვება შეძლებოდა…

_ ეს მარტო დაბის პრობლემა არ არის, სოფლებშიც ბევრ ადამიანს შია და იმედია, ამ პროექტის გახორციელებას _ ბიუჯეტში შესაბამისი თანხების გამოყოფას შევძლებთ.

გადაცემის სტუმრებმა საზოგადოებაში არსებულ სტერეოტიპებზეც ისაუბრეს და აღნიშნეს, რომ წლებთან ერთად რეალობაც იცვლება.

ქეთევან სიხარულიძე: _ სოფელ ბუკისციხეში, სადაც მე კანდიდატი ვიყავი, ყველა მიცნობს _ იქ დავიბადე და გავიზარდე. მართალია, მამაკაცი იყო ჩემი კონკურენტი, თუმცა არ მიგრძვნია, რომ ამის გამო მას ჰქონდა უპირატესობა. დროსთან ერთად, ეს სტერეოტიპიც შეიცვალა. ახლაც ფიქრობენ, რომ ქალი არ უნდა იყოს პოლიტიკაში, თუმცა, საგრძნობლად გაუმჯობესებული მდგომარეობაა ამ კუთხით.

მაია გიორგაძის თქმით, ბუკისციხიდან განსხვავებით, ხიდისთავში სტერეოტიპის დამსხვრევა _ "რა უნდა ქალს პოლიტიკაში", ვერ მოხერხდა:

_ ხიდისთავი ძალიან განვითარებული სოფელია, თუმცა, იქ ვერ მოხერხდა სტერეოტიპის დამსხვრევა, რომ მამაკაცს მეტი შეუძლია. ამომრჩეველს ჰქონდა ის განცდა, რომ ჩემ კონკურენტ მამაკაცს მეტი შეეძლო და მას დაუჭირეს მხარი. პირადად ჩემთვის არ უთქვამთ, მაგრამ გამიგია, რომ ამბობდნენ, კაცი უფრო მეტს გააკეთებსო. არადა, ამის საწინააღმდეგო ბევრჯერ დამიმტკიცებია, _ აღნიშნა გიორგაძემ.

გადაცემის სრული ვერსიის ნახვა შეგიძლიათ აქ.