საქართველოს იუსტიციის უმაღლესი საბჭოს მდივნის, ლევან მურუსიძის ოჯახის საკუთრებაში საცხოვრებელი სახლი, ორი ბინა, ორი ავტოფარეხი და მიწის ნაკვეთია. ამის შესახებ მურუსიძის ქონებრივ დეკლარაციაშია აღნიშნული, რომელიც მან 2016 წლის 9 ივნისს შეავსო.
დეკლარაციის მიხედვით, ლევან მურუსიძის 100%-იან მფლობელობაშია საცხოვრებელი ბინა თბილისში, ჯანაშიას ქუჩაზე, რომლის ფართობიც 100.00 კვ.მ-ია და ამავე მისამართზე არსებული 18.00 კვ.მ -ის ფართობის ავტოფარეხი.
ხოლო მურუსიძის მამა, თორნიკე მურუსიძე ფლობს, 100 კვ.მ.-ის ფართობის ბინას თბილისში, ნუცუბიძის პლატოზე, მე-4 მიკრო რაიონში და ამავე მისამართზე მდებარე 12.00 კვ.მ-ის ფართობის ავტოფარეხს.
ასევე, თორნიკე მურუსიძის საკუთრებაშია საცხოვრებელი სახლი ონში, სოფელ სორში, რომლის ფართობიც 100.00 კვ.მ-ია. მისივე საკუთრებაშია 4000.00 კვ.მ-ის ფართობის მიწის ნაკვეთი ამავე სოფელში.
რაც შეეხება ლევან მურუსიძის ოჯახის ფინანსურ მდგომარეობას, ლევან მურუსიძეს გასულ წელს შემოსავლის სახით, უზენაესი სასამართლოს მოსამართლეობისთვის 99 965.66 ლარი აქვს მიღებული. სხვა სახის შემოსავალი დეკლარაციაში არ ფიქსირდება.
ქონებრივი დეკლარაციის შევსების მომენტში კი, ლევან მურუსიძეს რესპუბლიკა ბანკის სახელფასო ანგარიშზე 6000.00 ლარი, ამავე ბანკის საკრედიტო ანგარიშზე 5000.00 ლარი, ხოლო „საქართველოს ბანკის“ საკრედიტო ანგარიშზე 9700.00 ლარი ჰქონდა.
ლევან მურუსიძის სახელზე დეკლარაციის მიხედვით ორი სესხია.
9700.00-ლარიანი საკრედიტო სესხი იუსტიციის უმაღლესი საბჭოს მდივანს 2012 წელს აუღია და ვადა 1 მარტს ამოეწურა. სესხის დასაფარად კი მას 15000.00 ლარის გასავალი ჰქონია.
რაც შეეხება 45000.00-დოლარიან საკრედიტო სესხს, მურუსიძეს ის 2014 წელს აუღია და ვადა 2024 წელს ეწურება, სესხის პროცენტის დასაფარად კი გასულ წელს 34004.00 დოლარი გადაუხდია.
დეკლარაციაში ასევე აღნიშნულია ლევან მურუსიძის დის შემოსავლების შესახებაც. თამარ მურუსიძის შემოსავალმა გასულ წელს ლექციებიდან და კერძო პედაგოგიური საქმიანობიდან 35000.00 ლარი შეადგინა.
რაც შეეხება ლევან მურუსიძის წინა წლების შემოსავლებს. ქონებრივი დეკლარაციებიდან ირკვევა, რომ წლებთან ერთად მურუსიძის შემოსავლებიც შეიცვალა.
2013 – 2014 წლებში მურუსიძის შემოსავალი ერთნაირი იყო – 89225 ლარი; 2012 წელს – 78600 ლარი; 2011 წელს – 78762 ლარი; 2010 წელს – 71 900 ლარი; 2009 წელს – საქართველოს უზენაესი სასამართლოს მოსამართლის თანამდებობისთვის 67 757 ლარი, ხოლო კავკასიის სამართლის სკოლის ლექტორის პოსტიდან 6400 ლარი აუღია. 2008 წელს მურუსიძის შემოსავალი საერთო ჯამში 59 850 ლარი ყოფილა; 2007 წელს – 37654 ლარი; ხოლო 2006 წელს ლევან მურუსიძეს თბილისის საქალაქო სასამართლოს მოსამართლეობისთვის 7000 ლარი, ხოლო უზენაესი სასამართლოს მოსამართლეობისთვის 25514 ლარი აქვს მიღებული.
ცნობისთვის, ლევან მურუსიძე 1975 წლის 1 მარტს თბილისში დაიბადა;
1991 წელს დაამთავრა 170-ე საშუალო სკოლა;
1998 წელს წარჩინებით დაამთავრა საქართველოს ტექნიკური უნივერსიტეტის იურიდიული ფაკულტეტი;
2000-2004 წლებში მუშაობდა თბილისის საოლქო სასამართლოს საგამოძიებო კოლეგიის მოსამართლის თანაშემწედ;
2004-2005 წლებში იყო გორის რაიონული პროკურორის თანაშემწე;
2005 წელს იყო თბილისის საქალაქო სასამართლოს სისხლის სამართლის საქმეთა კოლეგიის მოსამართლე;
2006-2015 წლებში იყო საქართველოს უზენაესი სასამართლოს მოსამართლე;
2013 წლის 9 ივნისს საქართველოს მოსამართლეთა კონფერენციის რიგგარეშე #10 სხდომაზე არჩეულ იქნა საქართველოს იუსტიციის უმაღლესი საბჭოს წევრად;
2013 წლის 16 ივნისს საქართველოს მოსამართლეთა კონფერენციის რიგგარეშე #10 სხდომაზე არჩეულ იქნა საქართველოს იუსტიციის უმაღლესი საბჭოს მდივნად;
2016 წლის იანვრიდან არის თბილისის სააპელაციო სასამართლოს ადმინისტრაციულ საქმეთა პალატის მოსამართლე.
