როგორ ესახებათ საქართველოში არსებული ნარკოპოლიტიკა პოლიტიკური პარტიების წარმომადგენლებს, რას ფიქრობენ ისინი და რა უნდა მოხდეს იმისთვის, რომ ნარკოპოლიტიკის ლიბერალიზაცია მოხდეს? -ამასთან დაკავშირებით დემოკრატიული ჩართულობის ოზურგეთის ცენტრში დისკუსია გაიმართა.
შეხვედრას ესწრებოდნენ სხვადასხვა პოლიტიკური პარტიებისა და იმ არასამთავრობო ორგანიზაციების წარმომადგნელები, რომლებიც უშუალოდ აღნიშნულ თემასთან დაკავშირებით მუშაობენ.
რას აკეთებს ფსიქიკური ჯანმრთელობისა და ნარკომანიის ცენტრი ნარკოპოლიტიკის შემცირებასთან დაკავშირებით, ამაზე აღნიშნული ცენტრის ხელმძღვანელმა გია თავბერიძემ ისაუბრა, მისი თქმით "ასეთი რაოდენობის ნარკოდამოკიდებული ადამიანი საქართველოში ნამდვილად არ იყო, რაც დღეს არის და დღეს ეს სენიც გაახალგაზრდავდა. იმის გამო, რომ ნარკოტიკს ვერ ღებულობს, დაიწყო უფრო ხელმისაწვდომი ალკოჰოლის მიღებით და დაავადდა ალკოჰოლიზმით. ალკოჰოლიზმით დაავადებული უფრო აგრესიულია ვიდრე ნარკომანით."
"ჩვენი ცენტრი ახორციელებს მეტადონით ჩანაცვლების პროგრამას 2006 წლიდან, ფაქტიურად ნარკომანების რაიოდენა წლიდან წლამდე იზრდება, რამდენიმე წლის წინ მონაცემები იყო დახალოებით 40 000, დღეს ეს ციფრი საგრძნობლად მომატებულია და ის 50 000 შეადგენს. მკარმა პოლიტიკამ გამოიწვია, ის რომ ამ სენით დაავადებულებმა დაიწყეს კუსტარულად დამზადებული ნარკოტიკების მიღება და ეს ყველაზე საშიშია მათი ჯანმრთელობისთვის. ნარკომანია გაახალგაზრდავდა, თუ ადრე 35 წელი და ზევით, ახლა უკვე ეს ასაკი სკოლის ასაკის ბავშვებამდეა დასული. ეს უკვე საშიშია.
საქართველოში დაახლოებით 3 000 -მდე კაცია ჩართული მეტადონით ჩანაცვლების პროგრამაში, ეს ზღვაში წვეთია. ჩვენთან გურიაში კი 65 კაცი გადის მკურნალობის კურსს. ძალიან ბევრი დაკავებულია და ეს არასწორია. სამწუხაროა, ციხეში იჯდეს ადამიანი, რომელიც ავადმყოფი და წამალდამოკოდებულია და ამის გამო ისჯება. ესეც მოგვარებადია, თუ კი იქნება ხელისუფლების და კანონმდებლების ნება."
გია თავბერიძის თქმით, ნარკომანები ჩანაწერებსაც აკეთებდნენ, სადაც ერთ-ერთმა აღნიშნა, რომ "პირველად მივხვდი რომ მყავს ცოლი და შვილი, პირველად მივხვდი, რომ ადამიანი ვარ, აღარ მეშინია ქუჩაში გავლის, როგორც წინათ, როცა პოლიცია მომდევდა და მე გავრბოდი".
"თავისუფალი დემოკრატების" წარმომადგენელმა რაისა ქონიაძემ მარიხუანას დეკრიმინალიზაციასთან დაკავშირებით აღნიშნა, რომ მათი პარტია ემხრობა ნარკოდამოკიდებული ადამიანების დახმარებას და არა სადამსჯელო ღონისძიებებს. საპატიმრო მათ რეაბილიტაციას არ უწყობს ხელს. "თავისუფალ დემოკრატებს" მიაჩნიათ, რომ სახელმწიფო ულმობელი უნდა იყოს ნარკოტიკების გამსაღებლების მიმართ, უნდა გადამზადდეს სამართალდამცავი სტრუქტურები, მოხდეს ნარკოდამოკიდებულის და ნარკორეალიზატორის ერთმანეთისგან გარჩევა".
მმართველი პარტიის, "ქართული ოცნების" წარმომადგენელმა მარეხი გობრონიძემ ისაუბრა იმაზე, თუ რა გაკეთდა 2012 წლიდან დღემდე ნარკოპოლიტიკასთან დაკავშირებით:
" მთავარი პრობლემა იყო, ის რომ ფსიქოპრეპარატების უკანონოდ გაყიდვა ხდებოდა. გამკაცრდა კონტროლი აფთიაქებში, შსს და ჯანდაცვის სამინისტროების ინიციატივით პარლამენტში მოხდა საკანონმდებლო ცვლილების ინიცირება და შედეგიც წარმატებული აღმოჩნდა."
რესპუბლიკური პარტიის ოზურგეთის ოფისი ხელმძღვანელი, ქალაქ ოზურგეთის მუნიციალიტეტის საკრებულოს თავმჯდომარის მოადგილე ნინო გოგუაძის თქმით
"რესპუბლიკური პარტია წინასაარჩევნოდ არ ცვლის ხოლმე მიმართულებებს, ჩვენი მიმართულება იგივეა რაც იყო აქამდე, ანუ სრული დეკრიმინალიზაცია. მომხმარებელი არ უნდა იხდიდეს სასჯელს და არ უნდა იხდიდეს იმ წარმოუდგენელ კაბალურ ჯარიმებს. ეს არ არის კრიმინალი, შეუაბამოდ მეჩვენება მათი სანქცირება, დასჯა, ციხეში ჩასმა. პოლიტიკა აუცილებლად უნდა შეიცვალოს ამასთან დაკავშირებით. როცა ადამიანს აქვს სურვილი, რომ ის განიკურნოს, მას არ უნდა გამოეკიდონ ქუჩაში და არ აიძულონ "მოშარდვა".
ადვოკატი და პარტია "გაერთიანებული დემოკრატების" ოზურგეთის ოფისის აღმასრულებელი მდივანი მანუჩარ გოგრაჭაძე აღნიშნულ თემასთან დაკავშირებით განმარტავს, "როგორც ვიცით , დეკრიმილიზაცისათან დაკავშირებული პროექტი, რამდენიმეჯერ ჩავარდა პარლამენტში. ადამიანი, რომელიც საკუთარ თავს აყენებს ზიანს, ამისთვის რა თქმა უნდა, არ უნდა ისჯებოდეს, თუმცა ვერ დავეთანხებით იმაზეც, რომ როცა მოიხმარს, მას თავზე ხელი უნად გადავუსვათ და მადლობა ვუთხრათ. უნდა იყოს ისეთი შეზღუდვები, რაც იძულებულს გახდის, რომ არ მოიხმაროს".
საკრებულოს დამოუკიდებელი დეპუტატი ლევან მგელაძე აღნიშნავს, "რომ საზოგადოების ინფორმირება აღნიშნულთან დაკავშირებით დაბალია, ეს იწვევს იმას, რომ კი არ მცირდება მომხმარებელთა რაოდებონა, პირიქით, იზრდება. ეს სოციალური მოვლენაა. ახალგაზრდებისთვის, სკოლის მოსწავლეებისთვის სპეციალური აღმზრდელობითი პროგრამები უნდა მომზადდეს, მათი გათვითცნობიერებისთვის. მათ უნდა გაითავისონ ის შედეგები, რაც მოჰყვება ნარკოტიკის მოხმარებას."
"ერთიანი ნაციონალური მოძრაობის" წარმომადგენელი, ოზურგეთის მუნიციპალიტეტის საკრებულოს დეპუტატი ბესიკ ქათამაძე აღნიშნავს, რომ "საქართველოში ნარკოპოლიტიკა თითქმის არ არსებობს. რომ გამოითხოვოთ პოლიციიდან ინფორმაცია, ნახავთ რა შედეგია ყოველთვიურად, რამდენ ადამიანს დაარბენინებენ "მოსაშარდად". ეს არის დაუშვებელი. ამ ადამიანებს სჭირდებათ გვერდში დგომა და დახმარება. პოლიტიკა უნდა იყოს უმკაცრესი გამსაღებელთან დაკავშირებით".
