ერთიანი ეროვნული გამოცდები 1 ივლისს ქართული ენისა და ლიტერატურის გამოცდით იწყება და 22 ივლისს ფიზიკის გამოცდით დასრულდება.
გამოცდების დაწყებამდე 1 დღით ადრე მედიის წარმომადგენლებს, შეფასებისა და გამოცდების ეროვნული ცენტრის ხელმძღვანელმა, მაია მიმინოშვილმა თბილისის 175-ე საჯარო სკოლაში საგამოცდო სესიის პროცედურები სრულად გააცნო.
როგორც ცნობილია, 2016 წლის გამოცდები ნაწილობრივ ელექტრონული ფორმატით ჩატარდება, ელექტრონული ფორმატით ტესტის კითხვები იქნება წარმოდგენილი და არა პასუხების ფურცელი.
საგამოცდო ცენტრები ხვალ ბათუმში, ფოთში, ზუგდიდში, ოზურგეთში, ქუთაისში, ახალციხეში, გორში, თბილისში, რუსთავში, თელავსა და ხულოში გაიხსნება.
შეფასებისა და გამოცდების ეროვნული ცენტრის ხელმძღვანელის, მაია მიმინოშვილის თქმით, წელს მთელი ქვეყნის მასშტაბით 21 საგამოცდო ცენტრია.
"წელს მთელი საქართველოს მასშტაბით 21 საგამოცდო ცენტრია და ყველა მათგანი გუშინდელი დღიდან სრულ მზადყოფნაშია, რადგან დღეს კიდევ ერთი გენერალური რეპეტიცია გვქონდა დაგეგმილი, რომელში ყველა ის ადამიანი იღებს მონაწილეობას, რომლებიც ხვალიდან ჩვენს აპლიკანტებს მოემსახურებიან. ჯერ-ჯერობით არანაირი ტექნიკური შეფერხება არ დაფიქსირებულა და დიდი იმედი მაქვს საგამოცდო პროცესები შეფერხებების გარეშე წაიმართება,"_ აცხადებს მიმინოშვილი.
როგორც მიმინოშვილმა აღნიშნა, ოსურ და აფხაზურ ენაზე შექმნილი უნარების საგამოცდო ტესტები აპლიკანტებს სერიოზულ ბარიერს შეუქმნის.
"არ მიმაჩნია გამართლებულად, რომ ჩვენს აპლიკანტებს ოსურ და აფხაზურ ენებზე უნდა შევთავაზოთ საგამოცდო ტესტები, რადგან არც ჩვენთან, არც სამაჩაბლოში, ოსეთის მხარეში და არც აფხაზეთში აფხაზური ან ოსურენოვანი სკოლები არ არსებობს. აფხაზურენოვან და ოსურენოვან სკოლებს არქმევენ ისეთ სკოლებს, სადაც სავალდებულო საგნად არის ოსური ან აფხაზური ენა და ლიტერატურა, ხოლო სხვა საგნებს მოსწავლეები სწავლობენ რუსულ ენაზე, ამიტომ ჩემი აზრით, ზოგადი უნარების ტესტი მათთვის გადაულახავი ბარიერი იქნება, გარდა ამისა, ძალიან რთულია სამეცნიერო ტერმინოლოგიის თარგმნა. ჩვენ აფხაზ აბიტურიენტებს ალტერნატივა მოვუძებნეთ და მათ ვთავაზობთ აფხაზურ ენასა და ლიტერატურაში გამოცდას უნარების გამოცდის ნაცვლად, რაც მისაღებია მათთვის. ერთადერთი აბიტურიენტი გვყავს, რომელმაც აირჩია ოსურ ენაზე ზოგადი უნარების გამოცდა და ასევე ერთი აბიტურიენტი გვყავს, რომელიც აფხაზურ ენასა და ლიტერატურას აბარებს,"_ აღნიშნავს მიმინოშვილი.
შეფასებისა და გამოცდების ეროვნული ცენტრის ხელმძღვანელი ასევე ამბობს, რომ საგამოცდო პროცესი მალე სრულად ელექტრონულ ვერსიაზე გადავა.
"საბოლოო ჯამში გვინდა ელექტრონულ ვერსიაზე გადავიდეთ, ძალიან ბევრი უპირატესობა აქვს, რადგან ძალიან ბევრ შესაძლებლობებს გვაძლევს დავალებების მრავალფეროვნებისთვის. ეს პირველი ნაბიჯია და თუ ყველაფერი წარმატებით ჩაივლის მე ხმამაღლა ვიტყვი, რომ საქართველო მოწინავეა იმ ქვეყნებს შორის, რომლებმაც საგამოცდო სისტემის ელექტრონულ ვერსიაზე გადასვლა დაიწყეს, როგორიცაა ამერიკის შეერთებული შტატები, დიდი ბრიტანეთი,"_ ამბობს მიმინოშვილი.
მიმინოშვილი მოუწოდებს აბიტურიენტებს მაქსიმალურად დაიცვან გამოცდების პროცესზე დასასწრები წესები.
"მაქსიმალურად ვთხოვ აბიტურიენტებს დაიცვან გამოცდებზე დასასწრები წესები. წელს მოგვიწია დასაცავი წესების სიაში ჩაგვეწერა ისიც, რომ აბიტურიენტი გამოცდაზე ნასვამი არ უნდა მოვიდეს. აპლიკანტებს წარმატებებს ვუსურვებ,"_აღნიშნა მიმინოშვილმა ჟურნალისტებთან შეხვედრისას.
როგორც ცნობილია, წელს ერთიან ეროვნულ გამოცდებში 38 500-ზე მეტი აბიტურიენტი, სტუდენტა საგრანტო კონკურსში 4 000-მდე სტუდენტი, საერთო სანაგისტრო გამოცდებში 12 500-ზე მეტი კანდიდატი, ხოლო პედაგოგთა საგნობრივ გამოცდებში 22 700-ზე მეტი პედაგოგი გამოიცდება.
