საქართველოს სოფლის მეურნეობის სამინისტროს გურიის რეგიონული სამმართველოს უფროსი კონსტანტინე სარიშვილი ქალაქ ოზურგეთში დერვისების ბიომეურნეობის განვითარების ინიციატივით გამოდის. პირველი ოფიციალური შეხვედრა ქალაქ ოზურგეთის მუნიციპალიტეტის საკრებულოს სხდომაზე გაიმართა.
"ჩვენი ქვეყანა მცირემიწიანია და ამ მცირე მიწებზე რას, როგორ და რამდენს მოვიყვანთ, ამას უდიდესი მნიშვნელობა აქვს არა მხოლოდ ქვეყნის აგრარული განვითარებისთვის, არამედ მოსახლეობის სოციალური პირობების გაუმჯობესებისათვის", _ თქვა კონსტანტინე სარიშვილმა.
მისივე თქმით, დერვისების ბიომეურნეობა ნათელი მაგალითია იმისა, საკუთარი მეურნეობისა და კულტურებისადმი სწორი მიდგომით, რის მიღწევა შეიძლება მცირემიწიანობის პირობებშიც კი.
"დერვისის ოთხწევრიანი ოჯახი (მამა და სამი შვილი) წლიურად 20 ათას დოლარ მოგებას იღებს 900 კვადრატულ მეტრამდე მიწის ნაკვეთიდან, საიდანაც ბიომეურნეობისთვის მხოლოდ 450 კვადრატულ მეტრს იყენებენ.
დერვისებმა, უპირველესად, ალეოპათიას _ ცოცხალი ორგანიზმების ერთმანეთთან შეთავსებას ან შეუთავსებლობას გადახედეს, ამ კონკრეტულ შემთხვევაში, სწორედ ალეოპათიაა უხვმოსავლიანობისა და მაღალი მოგების საიდუმლოება. მაგალითად, საყოველთაოდ ცნობილია, რომ ვაზს სასტიკად თრგუნავს კომბოსტო; ქერისა და ვიკას (პარკოსანი) გვერდიგვერდ დათესვით კი 20-30%-ით იზრდება ორივე კულტურის მოსავლიანობა.
დერვისები და მისი მსგავსი ბიოფერმერები გაერთიანებულნი არიან მეურნეთა კავშირში, აწყობენ შეხვედრებს, სადაც ერთმანეთს უზიარებენ თავიანთ გამოცდილებებს და კონცერტებსაც კი მართავენ".
დამსწრე საზოგადოებას სარიშვილმა აჩვენა ვიდეოსიუჟეტი, სადაც ნაჩვენებია კალიფორნიის შტატში, ქალაქ პასადენაში ოჯახური ბიომეწარმეობის სასწაული. სიუჟეტიდან ჩანს, რომ დერვისებს, ძირითადად, მოჰყავთ ბოსტნეული: ბროკოლი, სალათები, სტაფილო, ჭარხალი, ყაბაყი, კიტრი, პომიდორი, საკვები ყვავილები (ნასტურცია), კენკროვნები, კერძოდ, მარწყვი. ამავე დროს, ჰყავთ ფუტკარი, ქათმები, იხვები და ორად ორი თხა. უხვ მოსავალს იღებენ ასევე სვეტისებრი, ერთღეროიანი ვაშლიდან.
"სარიშვილის წინადადება საინტერესო იყო, რადგანაც იგი შეეხებოდა ძალიან მცირე მიწის ფართობის გამოყენებით დიდი ოდენობით სოფლის მეურნეობის პროდუქტის პირველად მიღებას. ქალაქ ოზურგეთის მოსახლეობის 80%-ს გააჩნია საკარმიდამო ნაკვეთი, სადაც შესაძლებელია ასეთი მცირე მეურნეობების მოწყობა. კარგი იქნება თუ კი თვითმმართველობა იზრუნებს ასეთი და სხვა სახის მეურნეობის განვითარებაზე", _ თქვა ჩვენთან საუბრისას საკრებულოს დეპუტატმა თამარ ნადირიძემ.
ნადირიძის თქმით, ასევე, საინტერესოა შედის თუ არა ეს ყველაფერი თვითმმართველობის უფლებამოსილების სფეროში:
"ჩემი აზრით, შედის, რადგანაც ხელს უწყობს დასაქმებას და შემოსავლის გაზრდას. თუმცა, ვფიქრობ მაინც მოსაძებნი და შესამუშევებელია ის ფორმები, რომლითაც თვითმმართველობას შეეძლება შეამსუბუქოს ჩვენი მოსახლეობის პრობლემებიდან უპირველესი _ დასაქმება. ასევე, ვიტყვი, რომ ყველა ნორმალურ ქვეყანაში არსებობს მუნიციპალური განვითარების გეგმები, რომლებიც ითვალისწინებს სხვადასხვა სახის პრობლემების მოგვარების ხელშეწყობას. შესაბამისად, ასეთი ტიპის ინიციატივებისადმი მეტი ყურადღება მართებს ქალაქის საკრებულოს".
