17 ივლისს ქალაქ ოზურგეთში, საქართველოს სახალხო არტისტის, ცნობილი მოცეკვავისა და ქორეოგრაფის, გიორგი სალუქვაძის სახელობის საერთაშორისო ფოლკლორული კონკურს-ფესტივალი გაიმართა. მასში ქართული და უცხოური ანსამბლები მონაწილეობდნენ. ფოლკლორული და ქორეოგრაფიული ანსამბლების საზეიმო აღლუმი ჭავჭავაძის ქუჩიდან დაიწყო. მონაწილეებმა გიორგი სალუქვაძის ხსოვნას პატივი მიაგეს და ცნობილი ქორეოგრაფის ბარელიეფი ყვავილებით შეამკეს. ფესტივალის ფარგლებში, გურიის გუბერნატორმა გია სალუქვაძემ, მოადგილესთან გია ებრალიძესთან ერთად, რეგიონში ჩამოსულ სტუმრებს სამხარეო ადმინისტრაციაში უმასპინძლა, სადაც ერთმანეთს სამახსოვრო საჩუქრები გადასცეს. აღნიშნული ფესტივალი ალ. წუწუნავას სახელობის სახელმწიფო დრამატულ თეატრში გალა კონცერტით დასრულდა.
" ქალაქ ოზურგეთში კიდევ ერთი არაჩვეულებრივი ფესტივალი დასრულდა. კონკურს – ფესტივალს ძალიან ბევრი მონაწილე ჰყავდა. საუკეთესოს გადაეცა სუხიშვილებისა და გიორგი სალუქვაძის სახელობის სპეციალური პრიზი. მინდა აღვნიშნო, რომ ასეთი ფესტივალების ჩატარება ხელს უწყობს ფოლკლორის განვითარებას. ჩვენ უახლოეს მომავალში ფოლკლორის საერთაშორისო ფესტივალსაც ვუმასპინძლებთ, რომელიც შეკვეთილში ჩატარდება. მინდა კიდევ ერთხელ მივულოცო ფესტივალის მონაწილეებს ეს დღე და წარმატებები ვუსურვო,“-აღნიშნა გურიის გუბერნატორმა, გია სალუქვაძემ. როგორც ფესტივალის ერთ-ერთმა დამფუძნებელმა, მერაბ მორჩილაძემ განაცხადა, გიორგი სალუქვაძის სახელობის საერთშორისო კონკურს-ფესტივალი 2010 წელს დაარსდა და წელს იგი მეშვიდედ გაიმართა. „ფესტივალში მონაწილოეობა 15-მა ანსამბლმა მიიღო. აღნიშნული ფესტივალი 16 ივლისს, ურეკის კულტურის სახლში გაიხსნა. ღონისძიების მხარდამჭერნი გურიის გუბერნატორი და ოზურგეთის მუნიციპალიტეტის გამგებელი გახლდათ, რისთვისაც მათ მადლობას ვუხდი. რომ არა მათი მხარდაჭერა, ჩვენ ამ ფესტივალის ჩატარებას ვერ შევძლებდით,“- მერაბ მორჩილაძე. • გიორგი სალუქვაძის დამსახურებით მრავალი მივიწყებული ქართული ცეკვის (შიპრობა, ფუნდრუკი, ფარცაკუკუ, იდუმალა და სხვა) აღდგენა მოხდა. იგი იყო საქართველოს სამუსიკო და ქორეოგრაფიული საზოგადოების გამგეობის თავმჯდომარე. მისი ინიციატივით შეიქმნა გურული სიმღერების აღმდგენი და შემსწავლელი ოთხწლიანი სალოტბარო სკოლა. 1973 წლიდან სალუქვაძე ხელმძღვანელობდა მახარაძის რაიონის სიმღერისა და ცეკვის ეთნოგრაფიულ ანსამბლ "იადონს."
