საქართველოს მთავარმა პროკურატურამ საკონსტიტუციო სასამართლოს თავმჯდომარე გიორგი პაპუაშვილი დაკითხვაზე დაიბარა. პაპუაშვილს შესაბამისი უწყება უკვე გაეგზავნა.
"გიორგი პაპუაშვილს გაეგზავნა უწყება და მოწმის სახით გამოკითხვის მიზნით დაბარებულია მთავარ პროკურატურაში დღეს, 13:00 საათზე", _ აცხადებს მთავარი პროკურატურის პრესსამსახურის უფროსი ნათია სუხიაშვილი.
ამასთან, პაპუაშვილის გარდა, პროკურატურაში გამოკითხვაზეა დაბარებული საკონსტიტუციო სასამართლოს ცხრავე მოსამართლე.
თუმცა, "ინტერპრესნიუსის" ინფორმაციით, გიორგი პაპუაშვილი პრემიერ-მინისტრთან შეხვედრამდე მთავარ პროკურატურაში მისვლას არ აპირებს.
"პროკურატურაში მივა, თუ მანამდე პრემიერს შეხვდება, თუმცა შეხვდება თუ არა პრემიერს, არ ვიცი. ყველა წამს არ იცვლის აზრს. გუშინ საღამოს რაც თქვა, დილასაც იგივეს ფიქრობს", _ აცხადებენ საკონსტიტუციო სასამართლოს პრესსამსახურში.
გუშინ საკონსტიტუციო სასამართლოს თავმჯდომარემ განაცხადა, რომ საგამოძიებო უწყებაში მისვლისა და მთავარ პროკურორთან შეხვედრის აზრს მხოლოდ პოლიტიკურ ხელმძღვანელობასთან შეხვედრის შემდეგ ხედავს.
"მე უკვე შევხვდი პრეზიდენტს. ახლა ველოდები შეხვედრას პრემიერ-მინისტრთან, რომელიც დამპირდა, რომ როცა მოიცლიდა, დამიკავშირდებოდა. ამის შემდეგ მზად ვარ შევხვდე მთავარ პროკურორს", _ აღნიშნა გუშინ პაპუაშვილმა.
შეგახსენებთ, რომ რამდენიმე დღის წინ გიორგი პაპუაშვილმა საგანგებოდ გამართულ ბრიფინგზე მოსამართლეებზე განხორციელებულ შანტაჟსა და მუქარაზე ისაუბრა. როგორც პაპუაშვილმა აღნიშნა, ბოლო პერიოდის განმავლობაში გარკვეულ მოსამართლეებზე ზეწოლა მიმდინარეობს.
"რაც გამოიხატება მათ ფარულ თვამთვალში, მათი ოჯახის წევრებისა და ახლობლების კომერციული საქმიანობის მიზანმიმართულ შევიწრვოებაში; დაშანტაჟებაში, რომ მათი ახლო ნათესავები დაკავებულები იქნებიან სხვადასხვა საბაბით. აგრეთვე, შესაძლოა გასაჯაროვდეს პირადი ხასიათის ფალსიფიცირებული ინფორმაციები", _ აცხადებს პაპუაშვილი და დასძენს, რომ ყველაფერი ეს დაკავშირებულია იმ მაღალი ინტერესების საქმეებთან, რომლებსაც სასამართლო ახლა განიხილავს.
განცხადების გაკეთებიდან მეორე დღეს გიორგი პაპუაშვილი საქართველოს პრეზიდენტს შეხვდა. შეხვედრის შემდეგ კი, გიორგი მარგველაშვილმაც აღნიშნა, რომ გარკვეული ზეწოლის მცდელობა მისი ოჯახის წევრებზეც იყო.
საქართველოს მთავარმა პროკურატურამ პროკურატურამ პრეზიდენტის და საკონსტიტუციო სასამართლოს თავმჯდომარის განცხადებებზე გამოძიება უკვე დაიწყო.
აღნიშნულთან დაკავშირებით, პარლამენტის თავმჯდომარე დავით უსუფაშვილი პრეზიდენტს, პრემიერს, უზენაესი და საკონსტიტუციო სასამართლოს თავმჯდომარეებს სამუშო ჯგუფის შექმნას სთავაზობს.
"ვთავაზობ ბატონ პრეზიდენტსაც, ბატონ პრემიერ-მინისტრს, ქალბატონ უზენაესი სასამართლოს თავმჯდომარეს, ბატონ საკონსტიტუციო სასამართლოს თავმჯდომარეს, რომ არჩევნებამდე დარჩენილ დროში რაღაცნაირად შევქმნათ ფორმატი სამუშაო ვითარებაში შეხვედრების. ანუ ხელისუფლების ხუთივე შტო, რომელიც ვიმსჯელებთ ინსტიტუციურ გარემოზე პოლიტიკური თავისუფლებებისთვის, ინსტიტუტების თავისუფალი მუშაობისთვის და ეს საშუალებას მოგვცემს საკითხებს სწრაფად და ეფექტურად გავუმკლავდეთ და თავიდან ავიცილოთ ზედმეტი სპეკულაციები და პოლიტიზირება. საჭიროა პოლიტიკური პროცესებისადმი რაც შეიძლება მაღალი ნდობის უზრუნველყოფა და ამისთვის ჩვენ ყველამ ყველაფერი უნდა გავაკეთოთ. თუკი რაიმე კითხვებია რაც შეიძლება სწრაფად უნდა გაეცეს მას პასუხი", _ განაცხადა დავით უსუფაშვილმა.
ამავე თემაზე:
საქართველოს პრეზიდენტის ოჯახის რომელი წევრის სახლში ჩაატარა ჩხრეკა პოლიციამ
ჩემი ოჯახის წევრებზეც იყო გარკვეული ზეწოლის მცდელობა _ გიორგი მარგველაშვილი
მოსამართლეებს უსმენენ და აშანტაჟებენ – საკონსტიტუციო სასამართლოს თავმჯდომარე
