მიმდინარე წლის ზაფხულში ქალაქ ლანჩხუთის რამდენიმე ქუჩაზე სარეაბილიტაციო სამუშაოები გახორციელდა და ასფალტის საფარი დაიგო. თუმცა, სამუშაოების შესრულების პრინციპმა ბევრი კითხვის ნიშანი გააჩინა.
აღმოჩნდა, რომ კითხვები ქალაქის ქუჩებში გახორციელებულ სამუშაოებთან დაკავშირებით, რიგითი ლანჩხუთელების გარდა, ხელისუფლების წარმომადგენლებსაც აქვთ.
ერთ-ერთი, ვინც ამ საკითხზე ხმამაღალი განცხადება გააკეთა, შუხუთის ადმინისტრაციული ერთეულის მაჟორიტარი დეპუტატი აკაკი იმნაიშვილია, რომელიც საკრებულოში "ქართულ ოცნებას" წარმოადგენს:
"მოდის მესიჯები, თუ სად რა ინფრასტრუქტურული სამუშაოები შესრულდა, რაც ძალიან კარგია. მაგრამ გაცილებით უკეთესი იქნება, იმასაც თუ გავითვალისწინებთ, საქმე სანახევროდ არ კეთდებოდეს", _ აღნიშნა იმნაიშვილმა ლანჩხუთის მუნიციპალიტეტის საკრებულოს ერთ-ერთ ბოლო სხდომაზე და მაგალითად მუსხელიშვილის ქუჩა მოიყვანა:
"მოვიდა მესიჯი, რომ მუსხელიშვილის ქუჩაზე სარეაბილიტაციო სამუშაოები გახორციელდა. ამ ქუჩაზე ჩემი ნათესავები ცხოვრობენ და კარგად ვიცი, რომ აქ სამუშაოები ბოლომდე არ შესრულებულა. ქუჩის დასაწყისი გაუკეთებელია. რომ ვთქვათ, არ იყო გასაკეთებელიო, ასე არაა. რატომ გაკეთდა სანახევროდ?!" _ კითხვა დასვა დეპუტატმა, რასაც დარბაზში მყოფი აღმასრულებელი ხელისუფლების წარმომადგენლების მხრიდან პასუხი არ მოჰყოლია.
მუსხელიშვილის ქუჩის სრული რეაბილიტაცია, არც წინა ხელისუფლების დროს მომხდარა _ მაშინ ყოფილი ინტერნატის ეზოს შესასვლელთან შეაჩერეს გზის ასფალტირება და კვირკველიას ქუჩის კვეთამდე გზა მოუწესრიგებელი დარჩა.
როგორც ირკვევა, ამგვარი გამონაკლისი მარტო მუსხელიშვილის ქუჩა არაა. ქალაქის ცენტრალური პარკის მიმდებარედ არსებულ ზაალ მდინარაძის ქუჩაზე, ასფალტის საფარი წელს მხოლოდ იმ ნაწილზე დაიგო, სადაც "ქართული ოცნების" ოფისი მდებარეობს, ქუჩის მეორე ნაწილი კი ისევ ძველ მდგომარეობაში დარჩა. გაუგებარია, რა გახდა ქუჩის ორ ნაწილად გაყოფის მიზეზი.
რატომ სანახევროდ და არა სრულად? ამ კითხვით ჩვენ გამგეობის ინფრასტრუქტურისა და არქიტექტურის სამსახურის უფროსს, ლევან ჩხაიძეს მივმართეთ. ჩხაიძესთან საუბრის შედეგად გაირკვა, სამუშაოები ქალაქის ყველა ქუჩაზე პროექტის შესაბამისად გახორციელდა, მოცემული თანხების შესაძლებლობის ფარგლებში.
"მდინარაძის ქუჩა საკმაოდ მოკლე მონაკვეთს მოიცავს, მაგრამ თანხის თვალსაზრისით მეტის შესაძლებლობა არ გვქონდა და ამიტომაც მხოლოდ ქუჩის ნაწილის რეაბილიტაცია გახორციელდა", _ გვითხრა ჩხაიძემ.
ცნობისთვის, ინფრასტრუქტურული პროექტებით, წელს, ქალაქ ლანჩხუთში, მთლიანობაში, 13 ქუჩაზეა გასახორციელებელი სარეაბილიტაციო სამუშაოები. აქედან ექვს ქუჩაზე უნდა გაკეთდეს როგორც რკინა-ბეტონის სანიაღვრე არხები, ასევე, დაიგოს ასფალტის საფარი, ხოლო დარჩენილ შვიდზე მხოლოდ რკინა-ბეტონის სანიაღვრე არხის მოწყობა იგეგმება.
