სოციალური მომსახურების სააგენტოს ჩოხატაურის რაიონული განყოფილება, რამდენიმე წელია, ნაქირავებ შენობაში ფუნქციონირებს. სააგენტოს თანამშრომლებს, რომლებსაც სხვებზე ზრუნვა და სხვების დახმარება ევალებათ, სასწრაფოდ სჭირდებათ დახმარება.
საქმე იმაშია, რომ შენობაში, სადაც სააგენტოა განთავსებული არც საპირფარეშოა, არც წყალი და არც მუშაობისთვის აუცილებელი სხვა პირობები.
ერთ ოთახში შეხიზნულ 9 თანამშრომელს" უკვე ოთხი წელია დოკუმენტაციის შენახვის საშუალებაც კი არ აქვთ. მათი მუშაობა გაუსაძლისი განსაკუთრებით ზამთარშია _ ორი ცალი ელექტროღუმელი გათბობის საშუალებას არ იძლევა. ამიტომაც, იქ შესულებს ზოგიერთი თანამშრომელი პლედმოფარებული თუ დაგვხდათ, არ უნდა გაგიკვირდეთ.
არადა, სააგენტოს ახალი შენობის აშენება 2012 წელს დაიწყო, რომელიც ერთ წელიწადში უნდა დასრულებულიყო. მას შემდეგ კი 4 წელი გავიდა _ ამ დროის განმავლობაში ის ტერიტორია, სადაც მომსახურების სააგენტოს მშენებლობაა დაწყებული, ნაგვის და ქვეწარმავლების ბუდედ იქცა. ამ თემაზე "გურია ნიუსი" არაერთხელ წერდა, შესაბამისად, ბევრი პირობა მოვისმინეთ, რომ მშენებლობა განახლდებოდა და მალე დასრულდებოდა, თუმცა, არაფერი შეცვლილა.
სოციალური მომსახურების სააგენტოს პრესსამსახურის ინფორმაციით, შეჩერებული მშენებლობა ნოემბრის ბოლოს აუცილებლად განახლდება:
"სოციალური მომსახურების სააგენტოს ჩოხატაურის რაიონული განყოფილების ახალი შენობის მშენებლობა 2012 წელს დაიწყო. შპს "რეალშენმა", სამწუხაროდ, ვერ შეასრულა თავისი ვალდებულებები და 2013 წელს არაკეთილსინდისიერად მიატოვა მშენებლობა. სააგენტომ კომპანიის წინააღმდეგ სარჩელი შეიტანა სასამართლოში, რომელმაც შპს "რეალშენს" სანქცია- ჯარიმები დააკისრა ბიუჯეტის სასარგებლოდ. კომპანიამ მიღებული თანხა ბიუჯეტში დააბრუნა. ძიებას და სასამართლო პროცესებს დრო დასჭირდა, ამიტომ ამ სამართლებრივი დავის დასრულებამდე არ გვქონდა შესაძლებლობა, ახალი ტენდერი გამოგვეცხადებინა. გარდა ამისა, წლების წინ მიტოვებულ მშენებლობას სჭირდებოდა ხელახალი ექსპერტიზა. სპეციალისტებმა შეისწავლეს დაკონსერვებული მშენებლობა და მათი დასკვნის საფუძველზე ცნობილი გახდა, რომ კარკასის ადგილზე შესაძლებელია მშენებლობის განახლება. ახლა ტენდერი უკვე გამოცხადებულია და ნოემბრის ბოლო რიცხვებში უნდა გამოვლინდეს ახალი სამშენებლო კომპანია, რომელიც განაახლებს სააგენტოს ოფისის მშენებლობას. იმედი გვაქვს, ეს პროცესი 2017 წლის გაზაფხულზე დასრულდება," _ აღნიშნა ჩვენთან საუბრისას სოციალური მომსახურების სააგენტოს პრესსამსახურის ხელმძღვანელმა ტატა გამყრელიძემ.
მისივე თქმით, ამ ეტაპზე შეუძლებელია იმ ოთახის მოწესრიგება და ნორმალური სამუშაო პირობების შექმნა, სადაც ამჟამად სააგენტოს ჩოხატაურის განყოფილებაა განთავსებული:
"რაც შეეხება სააგენტოს ამჟამინდელი შენობის მდგომარეობას, ეს ფართი რაიონულ ოფისს ნაქირავები აქვს. ჩვენ კი არ გვაქვს უფლება, სხვისი კუთვნილი ფართი სახელმწიფო თანხებით გავარემონტოთ," _ გვითხრა გამყრელიძემ.
აღსანიშნავია, რომ სოციალური მომსახურების სააგენტოს ჩოხატაურის განყოფილების თანამშრომლების მსგავსად, ძალიან რთულ პირობებში უხდებათ მუშაობა სახანძრო-სამაშველო და სასწრაფო დახმარების სამსახურის თანამშრომლებს _ ორივე ორგანიზაცია ამორტიზირებულ შენობაშია განთავსებული.
სახანძრო-სამაშველო სამსახურში არსებული ძალიან მძიმე მდგომარეობის შესახებ "გურია ნიუსმა" სტატია გასულ წელს მოამზადა. მაშინ ვწერდით, რომ მაშველებს განსაკუთრებულად რთულ პირობებში უხდებოდათ მუშაობა _ ავარიული შენობა დღითი-დღე ინგრევა; ოთახებში, სადაც მათ ღამის გათევა უწევთ, ზოგჯერ წვიმა ჩამოდის და ძალიან ცივა, ფანჯრებზე "ცელოფნებია" აკრული; ორსართულიანი შენობის ნაწილი ნაგვითაა სავსე.
ჩოხატაურელ მაშველებს სააბაზანოც კი არ აქვთ; სახელდახელოდ შეჭედილი საპირფარეშო შენობის გარეთ მდებარეობს. იქვეა საგანგებოდ მოწყობილი ხელსაბანი.
ამ ყველაფერს კი ავარიული მანქანებიც ემატება, რომლის შეკეთებას თავად მაშველები ცდილობენ, თუმცა, ტექნიკის სიძველის გამო, ეს, ხშირ შემთხვევაში, არ ხერხდება.
უფრო მეტიც _ ამ პრობლემის შესახებ იმდროინდელ პრემიერ-მინისტრს ირაკლი ღარიბაშვილსაც ვუამბეთ და პრობლემის მოგვარების პირობაც მივიღეთ, თუმცა, სიტუაცია აქაც უცვლელია. ღარიბაშვილის სიტყვების მსგავსად დაპირებად დარჩა საგანგებო სიტუაციების მართვის სააგენტოს მიერ გაკეთებული განცხადებაც, რომ წელს ჩოხატაურელ მაშველებს ნორმალურ პირობებში მოუწევდათ მუშაობა.
ასევე, "გურია ნიუსის" ისტორიას შემორჩა ჯანდაცვის უწყების დაპირებაც, რომლის თანახმადაც, ჩოხატაურში, ავარიულ შენობაში მყოფ სასწრაფო სამედიცინო დახმარების ექიმებს შენობის პრობლემა მოუგვარდებოდათ.
შესაბამისად, ჩოხატაური დღეს იმ რეალობაში დგას, რომ იმ ადამიანებს, რომელთაგან ყოველდღიურად ათობით მოქალაქე დახმარებას ელის, ნორმალური სამუშაო პირობების შესაქმნელად სასწრაფოდ სჭირდებათ დახმარება სახელმწიფოსგან, სადაც მილიონობით ლარი წლების განმავლობაში, პრემიებზე, დანამატებზე იხარჯებოდა და იხარჯება.
