2016 წლის 9 თვეში დევნადაწყებული პირების 33% (61 პირი) საჯარო მოხელეა, რომელთა დიდი ნაწილი (79%) არის სამართალდამცავი ორგანოების (სპეციალური ოპერატიული დეპარტამენტის და კონსტიტუციური უსაფრთხოების დეპარტამენტის სხვადასხვა რგოლის ყოფილი მენეჯერები და ოფიცრები) თანამშრომელი. აღნიშნული პირების მიმართ სისხლისსამართლებრივი დევნა, მეტწილად, დაწყებულია 2012 წლამდე ჩადენილ ფაქტებზე“, _ ამის შესახებ საქართველოს მთავარი პროკურორის, ირაკლი შოთაძის ერთწლიანი მუშაობის ანგარიშშია აღნიშნული რომელიც მან დღეს საპროკურორი საბჭოს წარუდგინა.
ანგარიშის თანახმად, 2016 წლის 9 თვეში სისხლისსამართლებრივი დევნა დაიწყო მაღალი რანგის 16 საჯარო მოხელის მიმართ, მათ შორის ძალადობრივ დანაშაულზე – მაღალი რანგის 9 საჯარო მოხელის მიმართ.
„ამავე საანგარიშო პერიოდში წამების ფაქტებზე სისხლისსამართლებრივი დევნა დაიწყო სამართალდამცავი ორგანოს 3 თანამშრომლის მიმართ. პირადი ცხოვრების ამსახველი ინფორმაციის ან პერსონალური მონაცემების ხელყოფის ფაქტებთან დაკავშირებით (სსკ-ის 157-ე, 158-ე, 159-ე, 332-ე, 332-ე მუხლებით) სისხლისსამართლებრივი დევნა დაიწყო 19 პირის მიმართ, მათ შორის, 7 ყოფილი საჯარო მოხელის მიმართ.
2016 წლის 9 თვეში სისხლისსამართლებრივი დევნის დაწყების ყველაზე მაღალი მაჩვენებელი ფიქსირდება შემდეგ დანაშაულებზე: საქართველოს სსკ-ის 180-ე (თაღლითობა – 25%), 333-ე (სამსახურებრივი უფლებამოსილების გადამეტება – 20%), 182-ე (მითვისება-გაფლანგვა – 7%), 157- 158-ე (პირადი ცხოვრების ამსახველი ინფორმაციის ან პერსონალური მონაცემების ხელყოფა, კერძო კომუნიკაციის საიდუმლოების დარღვევა – 4%), 194-ე (უკანონო შემოსავლის ლეგალიზაცია – 2%) მუხლებით გათვალისწინებული დანაშაულის ჩამდენი პირების მიმართ“, _ აღნიშნულია ანგარიშში.
რაც შეეხება წინა წლების მაჩვენებლებს, პროკურატურის ინფორმაციით, უწყების წარმოებაში არსებულ სისხლის სამართლის საქმეებზე, 2014 წელს სისხლისსამართლებრივი დევნა დაიწყო 159, 2015 წელს – 161, ხოლო 2016 წლის 9 თვეში – 126 პირის მიმართ.
"ცალკეულ საჯარო მოხელეთა მიერ 2012 წლის 01 ოქტომბრამდე ჩადენილ ძალადობრივ და სამოხელეო დანაშაულებთან დაკავშირებით, 2012 წლის ნოემბრიდან 2016 წლის 01 ოქტომბრამდე პერიოდში, საქართველოს პროკურატურის საგამოძიებო დანაყოფებში გამოძიება დაიწყო 200-ზე მეტ სისხლის სამართლის საქმეზე, ხოლო სისხლისსამართლებრივი დევნა – 185 ყოფილი საჯარო მოხელის მიმართ, მათ შორის მაღალი თანამდებობის პირების: შინაგან საქმეთა მინისტრის, იუსტიციის მინისტრის, თავდაცვის მინისტრის, გენერალური შტაბის უფროსის, სამხედრო პოლიციის უფროსის მოადგილის, შს სამინისტროს კონსტიტუციური უსაფრთხოების დეპარტამენტის უფროსის, სპეციალური ოპერატიული დეპარტამენტის უფროსის, კრიმინალური პოლიციის დეპარტამენტის დირექტორის, კონტრდაზვერვის დეპარტამენტის დირექტორის მოადგილის, შს სამინისტროს სპეციალური ოპერაციების ცენტრის უფროსის, სასჯელაღსრულების დეპარტამენტის უფროსის მიმართ.
მოცემული საქმეებიდან, სასამართლოში განსახილველად წარიმართა 145 პირის მიმართ, რომელთაგან 100 პირის მიმართ სასამართლოს მიერ გამოტანილი იქნა გამამტყუნებელი (დაახლოებით 360-მდე დანაშაულებრივ ეპიზოდზე), ხოლო 8 პირის მიმართ – გამამართლებელი განაჩენი. 2012 წლის 01 ოქტომბრამდე ჩადენილ სისტემურ დანაშაულებთან დაკავშირებით, დღევანდელი მონაცემებით, გამოძიება აქტიურად მიმდინარეობს 170-ზე მეტ სისხლის სამართლის საქმეზე, ხოლო სასამართლოში განიხილება 30-ზე მეტი გახმაურებულს სისხლის სამართლის საქმე", _ აღნიშნულია ანგარიშში.
ამავე თემაზე:
აღკვეთის ღონისძიება და გირაო მთავარი პროკურორის ანგარიშში
რამდენ საქმეზე დაიწყო მთავარმა პროკურატურამ სისხლის სამართლებრივი დევნა მიმდინარე წელს
